אוֹיפן פָּסוּק "קוֹל גָּדוֹל וְלֹא יָסָף" (אַז דֶער קוֹל פוּן דִי עֲשֶׂרֶת הַדִּבְּרוֹת אִיז נִיט נִפְסָק גֶעווָארְן), בְּרֶענְגְט דֶער מִדְרָשׁא דְרַיי פֵּירוּשִׁים: א) "קוֹל אֶחָד נֶחְלַק לְז' קוֹלוֹת וְהֵם נֶחְלָקִים לְע' לָשׁוֹן" (דֶער קוֹל אִיז נִיט פַארְבְּלִיבְּן בַּיי לָשׁוֹן קוֹדֶשׁ אַלֵיין, נָאר עֶר אִיז אַרָאפְּגֶעקוּמֶען אִין זִיבְּן קוֹלוֹת אוּן זֵיי הָאבְּן זִיךְ צֶעטֵיילְט אִין אַלֶע שִׁבְעִים לָשׁוֹן). ב) "שֶׁמִּמֶּנּוּ נִתְנַבְּאוּ כָּל הַנְּבִיאִים שֶׁעָמְדוּ" (דֶער קוֹל הָאט זִיךְ נִיט אוֹיסְגֶעלָאזְט בְּעֵת מַעֲשֶׂה, נָאר עֶר צִיט זִיךְ שְׁטֶענְדִיק, דָאס הֵייסְט אַז פוּן דֶעם קוֹל פוּן מַתַּן תּוֹרָה נֶעמֶען זִיךְ אַלֶע עִנְיָנִים ווָאס זַיְינֶען דֶערְנָאךְ נִתְגַּלֶּה גֶעווָארְן דוּרְךְ דִי נְבִיאִים (אוּן דִי חֲכָמִיםב שֶׁבְּכָל דּוֹר וָדוֹר). ג) "שֶׁלֹּא הָיָה לוֹ בַּת קוֹל" (עֶר הָאט נִיט גֶעהַאט קֵיין ווִידֶער־קוֹל (עֶכָא), ווִי עֶס אִיז בַּיי אַלֶע קוֹלוֹת, ווָאס קְלִינְגֶען אָפּ צוּרִיק).
דַארף מֶען פַארְשְׁטֵיין: מִיט ווָאס דְרִיקְט אוֹיס דֶער דְרִיטֶער פֵּירוּשׁ (אַז "לֹא הָיָה לוֹ בַּת קוֹל") – דִי גְרוֹיסְקַיְיט אוּן בְּלִי גְבוּל פוּן דֶעם קוֹל בַּיי עֲשֶׂרֶת הַדִּבְּרוֹת? לוֹיט דִי עֶרְשְׁטֶע צְווֵיי פֵּירוּשִׁים אִיז פַארְשְׁטַאנְדִיק: דֶער קוֹל אִיז נִיט גֶעווֶען בַּאגְרֶענֶעצְט צוּ לָשׁוֹן קוֹדֶשׁ אַלֵיין אָדֶער צוּם זְמַן פוּן מַתַּן תּוֹרָה אַלֵיין, נָאר עֶר אִיז אַרָאפְּגֶעטְרָאגְן גֶעווָארְן אוּן זִיךְ צֶעשְׁפְּרֵייט אִין אַלֶע לְשׁוֹנוֹת אוּן עֶר צִיט זִיךְ אִין אַלֶע דוֹרוֹת. אָבֶּער דָאס ווָאס "לֹא הָיָה לוֹ בַּת קוֹל" ווַיְיזְט נִיט לִכְאוֹרָה אוֹיף דֶער שְׁטַארְקַיְיט פוּן קוֹל. אַדְּרַבָּה – ווָאס דֶער קוֹל אִיז שְׁטַארְקֶער הָאט עֶר אַלְץ אַ שְׁטַארְקֶערְן אָפְּקְלַאנְג. ווִיבַּאלְד אַז דֶער קוֹל הָאט נִיט גֶעהַאט קֵיין אָפְּקְלַאנְג, ווַיְיזְט דָאךְ עֶס, לִכְאוֹרָה, גָאר אוֹיף זַיְין שְׁווַאכְקַיְיט.
אוֹיךְ דַארְף מֶען פַארְשְׁטֵיין: דֶער אוֹיבֶּערְשְׁטֶער מַאכְט דָאךְ נִיט קֵיין נֵס אוּמְזִיסְטג, אָן אַ נֵייטִיקַיְיט, אוּן ווִיבַּאלְד אַז יֶעדֶער קוֹל הָאט בְּטֶבַע אַ בַּת קוֹל, אוּן אַ קוֹל גָּדוֹל הָאט אַ שְׁטַארְקְן ווִידֶער־קוֹל, אִיז צוּלִיבּ ווָאס הָאט דָא גֶעדַארְפְט זַיְין שִׁינּוּי הַטֶּבַע, אַז דֶער קוֹל גָּדוֹל פוּן מַתַּן תּוֹרָה זָאל נִיט הָאבְּן קֵיין ווִידֶערְקוֹל?
דָא מְפָרְשִׁים ווָאס זַיְינֶען מְבַאֵר, אַז דִי נוֹיטִיקַיְיט פוּן דֶעם נֵס אִיז גֶעווֶען, בִּכְדֵי נִיט צוּ גֶעבְּן קֵיין אָרְט צוּ הָאבְּן אַ טָעוּת, אוּן מֵיינֶען אַז דֶער אָפְּקְלַאנְג אִיז אַן אַנְדֶער קוֹל. דֶער פֵּירוּשׁ אִיז אָבֶּער נִיט מוּבָן, ווָארוּם אִין אַ בַּת קוֹל אִיז דָאךְ קֶענְטִיק אַז עֶר אִיז אַ אָפְּקְלַאנְג פוּן דֶעם קוֹל אַלֵיין; אִין אִים הֶערְט מֶען דָאךְ דִי זֶעלְבֶּע שְׁטִימֶע אוּן דִי זֶעלְבֶּע ווֶערְטֶער. וּמַה־דָאךְ אַז סְ'אִיז נִיט גֶעווֶען קֵיין טָעוּת ווֶען דֶער קוֹל פוּן מַתַּן תּוֹרָה אִיז גֶעקוּמֶען פוּן ד' רוּחוֹת הָעוֹלָם וּמִשָּׁמַיִם וָאָרֶץד פוּן אַלֶע זַיְיטְן אִין דֶער זֶעלְבֶּער צַיְיט – אִיז דָאךְ גֶעווִיס נִיט שַׁיָּיךְ צוּ חוֹשֵׁשׁ זַיְין פַאר אַ טָעוּת בַּיי אַ בַּת קוֹל ווָאס קוּמְט אַ קְלֵיינֶע ווַיְילֶע נָאךְ דֶעם קוֹל, אוּן סְ'אִיז קֶענְטִיק אִין אִים (דוּרְךְ דֶעם ווָאס אִין אִים הֶערְט זִיךְ דִי זֶעלְבֶּע שְׁטִימֶע אוּן ווֶערְטֶער) אַז עֶר אִיז בְּלוֹיז אַן אָפְּקְלַאנְג פוּן דֶעם קוֹל ווָאס אִיז גֶעווֶען מִיט אַ ווַיְילֶע פְרִיעֶר.
אוֹיךְ דַארְף מֶען פַארְשְׁטֵיין; תּוֹרָה דֶערְצֵיילְט דָאךְ נִיט סְתַּם קֵיין סִיפּוּרִים, נָאר בִּכְדֵי צוּ אָפְּלֶערְנֶען פוּן זֵיי אַ הוֹרָאָה בַּעֲבוֹדָתֵינוּ – ווָאס פַאר אַ הוֹרָאָה אִין עֲבוֹדָה הָאבְּן מִיר פוּן דֶעם סִיפּוּר אַז בַּיי מַתַּן תּוֹרָה אִיז גֶעווֶען אַ קוֹל גָּדוֹל וְלֹא יָסָף?
דִי הַתְחָלָה, ווָאס הָאט אִין זִיךְ כּוֹלֵל גֶעווֶען אַלֶע עֲשֶׂרֶת הַדִּבְּרוֹת, אִיז דֶער ווָארְט "אָנֹכִי"ה. זָאגְט אוֹיף דֶעם דִי גְמָרָאו אַז אָנֹכִי אִיז רָאשֵׁי תֵּיבוֹת "אֲנָא נַפְשִׁי כְּתָבִית יְהָבִית". דָאס הֵייסְט אַז בַּיי מַתַּן תּוֹרָה הָאט זִיךְ עַצְמוּת אַלֵיין כִּבְיָכוֹל אַרַיְינְגֶעשְׁרִיבְּן אוּן אַרַיְינְגֶעגֶעבְּן אִין דִי עֲשֶׂרֶת הַדִּבְּרוֹת ווֶעלְכֶע עֶר הָאט דַאן גֶעזָאגְט, אוּן גֶעזָאגְט הָאט עֶר זֵיי צוּ יֶעדֶער אִידְן בַּאזוּנְדֶער – "אָנֹכִי הֲוָיָ' אֱלֹקֶיךָ" לְשׁוֹן יָחִיד, אוּן נִיט בְּלוֹיז צוּ דִי אִידְן פוּן יֶענֶעם דוֹר, נָאר, ווִי דִי רַזַ"ל זָאגְןז, אַז אַלֶע נְשָׁמוֹת, סַיי דִי ווֶעלְכֶע זַיְינֶען גֶעווֶען פַאר מַתַּן תּוֹרָהח אוּן סַיי דִי אַלֶע שְׁפֶּעטֶערְדִיקֶע דוֹרוֹת, זַיְינֶען גֶעווֶען בַּיְים מַעֲמַד הַר סִינַי, אוּן צוּ יֶעדֶערְן פוּן זֵיי הָאט דֶער אוֹיבֶּערְשְׁטֶער גֶעזָאגְט "אָנֹכִי הֲוָיָ' אֱלֹקֶיךָ" אוּן "אֲנָא נַפְשִׁי כְּתָבִית יְהָבִית" – צוּ יֶעדֶער אִידְן בַּאזוּנְדֶער הָאט עֶר זִיךְ כִּבְיָכוֹל אָפְּגֶעגֶעבְּן מִיט זַיְין גַאנְצֶע עַצְמִיּוּת.
קֶען מֶען דָאךְ מֵיינֶען, אַז דֶער "אֲנָא נַפְשִׁי כְּתָבִית יְהָבִית" אִיז גֶעווֶען נָאר בַּיי דִי עֲשֶׂרֶת הַדִּבְּרוֹת, אָבֶּער דִי עִנְיָנִים פוּן תּוֹרָה ווֶעלְכֶע זַיְינֶען נִתְגַּלֶּה גֶעווָארְן נָאכְדֶעם וּבִפְרַט – דוּרְךְ דִי נְבִיאִים אוּן חֲכָמִים שֶׁבְּכָל דּוֹר וָדוֹר – אִיז כָאטשׁ אוֹיךְ זֵיי הָאבְּן דִי נְבִיאִים אוּן חֲכָמִים נִיט גֶעזָאגְט חַס וְשָׁלוֹם פוּן זִיךְ אַלֵיין, נָאר "רוּחַ הֲוָיָ' דִּבֶּר בָּם וּמִלָּתוֹ עַל לְשׁוֹנָם"ט (דֶעם אוֹיבֶּערְשְׁטְנְס גַיְיסְט הָאט גֶערֶעדט אִין זֵיי אוּן זַיְין ווָארְט – אוֹיף זֵייעֶר צוּנְג) – הָאבְּן זֵיי נִיט דֶעם כֹּחַ פוּן מַתַּן תּוֹרָה; אִין זֵיי שְׁטֵייט נִיט דֶער "אָנֹכִי", עַצְמוּתוֹ וּמַהוּתוֹ, נָאר זֵיי זַיְינֶען בְּדוּגְמַת דִי צִיווּיִם ווָאס זַיְינֶען גֶעווֶען צוּ דִי אָבוֹת פַאר מַתַּן תּוֹרָהי, אוּן – אַז זֵיי זַיְינֶען צוּם גַאנְצְן כְּלַל אוּן נִיט קֵיין הוֹרָאוֹת צוּ יֶעדֶערְן בַּאזוּנְדֶער, (יֶעדֶער אִיד אִיז זֵיי טַאקֶע מְחוּיָב צוּ טָאן, אָבֶּער נָאר ווַיְיל עֶר אִיז אַ חֵלֶק פוּן דֶעם כְּלַל, אוּן נִיט עֶס אִיז אַ צִיווּי מְיוּחָד צוּ יֶעדֶער יָחִיד) – אוֹיף דֶעם זָאגְט מֶען: "קוֹל גָּדוֹל וְלֹא יָסָף" – אַלֶע עִנְיָנִים פוּן תּוֹרָה, ווָאס ווֶערְן נִתְגַּלֶּה בְּכָל דּוֹר וָדוֹר, אִיז אַלְץ דֶער זֶעלְבֶּער "קוֹל גָּדוֹל" פוּן מַתַּן תּוֹרָה, דֶער קוֹל פוּן "אָנֹכִי הֲוָיָ' אֱלֹקֶיךָ" (לְשׁוֹן יָחִיד), ווָאס עַצְמוּת רֶעדט צוּ יֶעדֶער אִידְן־יָחִיד בַּאזוּנְדֶער; אוּן דָאס ווָאס סְ'אִיז נִיט נִתְגַּלֶּה גֶעווָארְן בִּיז דֶער נָבִיא אוּן חָכָם הָאט עֶס גֶעזָאגְט, אִיז עֶס ווַיְיל "עַד אוֹתָהּ שָׁעָה לֹא נִתְּנָה לוֹ רְשׁוּת לְהִתְנַבְּאוֹת"א, ווָארוּם "וְעֵת לְכָל חֵפֶץ"יא, יֶעדֶער עִנְיָן אִין תּוֹרָה הָאט זִיךְ זַיְין זְמַן ווֶען עֶר דַארְף נִתְגַּלֶּה ווֶערְן פוּן דֶעם קוֹל פוּן מַתַּן תּוֹרָה.
דָאס זֶעלְבֶּע אִיז אוֹיךְ בְּנוֹגֵעַ דֶעם פֵּירוּשׁ אִין "קוֹל גָּדוֹל גו'", אַז דֶער קוֹל פוּן מַתַּן תּוֹרָה אִיז צֶעטֵיילְט גֶעווָארְן אִין שִׁבְעִים לָשׁוֹן: בְּנֵי נח זַיְינֶען מְחוּיָב אִין דִי שֶׁבַע מִצְווֹתיב*, אוּן אַ אִיד דַארְף צְווִינְגֶען (וּבִזְמַן שֶׁאֵין יַד יִשְׂרָאֵל תַּקִּיפָה – מִשְׁתַּדֵּל זַיְין זִיךְ) אַז בְּנֵי נֹחַ זָאלְן מְקַיֵּים זַיְין זֵייעֶרֶע שֶׁבַע מִצְווֹתיב. אִיז בִּכְדֵי מֶען זָאל נִיט מֵיינֶען, אַז זֵייעֶרֶע שֶׁבַע מִצְווֹת זַיְינֶען אַ זַיְיטִיקֶע זַאךְ, ווָאס הָאט נִיט צוּ טָאן מִיט מַתַּן תּוֹרָה, זָאגְט דִי תּוֹרָה: "קוֹל גָּדוֹל וְלֹא יָסָף", דֶער קוֹל פוּן מַתַּן תּוֹרָה אִיז "נֶחְלַק לְע' לָשׁוֹן", אַז אוֹיךְ דִי מִצְווֹת פַאר דִי שִׁבְעִים לָשׁוֹן, דִי אוּמוֹת הָעוֹלָם, קוּמֶען פוּן דֶעם קוֹל גָּדוֹל פוּן מַתַּן תּוֹרָה, ווָאס דֶערִיבֶּער אִיז אוֹיךְ דֶער קִיּוּם פוּן זֵייעֶרֶע מִצְווֹת דַארְף בַּיי זֵיי זַיְין מִצַּד דֶעם צִיווּי בַּיי מַתַּן תּוֹרָה; נִיט נָאר דַארְפְן זֵיי מְקַיֵּים זַיְין דִי מִצְווֹת מִצַּד צִיווּי הֲוָיָ' – אוּן נִיט ווַיְיל דֶער שֵׂכֶל אִיז זֵיי מְחַיֵּיב – נָאר נָאךְ מֶערֶער, זֵיי דַארְפְן דָאס מְקַיֵּים זַיְין ווַיְיל אַזוֹי הָאט דֶער אוֹיבֶּערְשְׁטֶער אָנְגֶעזָאגְט אִין תּוֹרָה אוּן מוֹדִיעַ גֶעווֶען דוּרְךְ מֹשֶׁה רַבֵּינוּ, אַז בְּנֵי נֹחַ דַארְפְן מְקַיֵּים זַיְין דִי שֶׁבַע מִצְווֹתיג. אוּן דִי יְדִיעָה אִיז נוֹגֵעַ אוֹיךְ צוּ אִידְן: אַ אִיד דַארְף צְווִינְגֶען (אוּן מִשְׁתַּדֵּל זִיךְ זַיְין) דִי אוּמוֹת הָעוֹלָם, אַז זֵיי זָאלְן מְקַיֵּים זַיְין זֵייעֶרֶע זִיבְּן מִצְווֹת אִיבֶּער דֶעם ווָאס דֶער אוֹיבֶּערְשְׁטֶער הָאט אָנְגֶעזָאגְט אוֹיף זֵיי דוּרְךְ מֹשֶׁה רַבֵּינוּ עָלָיו הַשָּׁלוֹם.
נָאךְ אַ הוֹרָאָה עִיקְרִית אִין דֶעם "קוֹל גָּדוֹל גו'", ווָאס "נֶחְלַק לְע' לָשׁוֹן": סְ'אִיז יָדוּעַ דֶער פֵּירוּשׁ אוֹיף דֶעם מַאֲמַר רַזַ"ליד "לֹא הִגְלָה הַקָּדוֹשׁ בָּרוּךְ הוּא אֶת יִשְׂרָאֵל לְבֵין הָאֻמּוֹת אֶלָּא כְּדֵי שֶׁיִּתּוֹסְפוּ עֲלֵיהֶם גֵּרִים" (דִי אִידְן זַיְינֶען פַארְטְרִיבְּן גֶעווָארְן אִין גָלוּת נָאר בִּכְדֵי עֶס זָאלְן צוּקוּמֶען צוּ זֵיי גֵרִים), אַז "גֵרִים" ווֶערְן דָא גֶעמֵיינְט דִי נִיצוֹצוֹת הַקְּדוּשָּׁה ווֶעלְכֶע גֶעפִינֶען זִיךְ אִין גָלוּת בַּיי דִי אוּמוֹת הָעוֹלָם, אוּן דוּרְךְ דֶעם ווָאס אִידְן זַיְינֶען אִין גָלוּת אוּן טוּעֶן דָארְט זֵייעֶר עֲבוֹדַת הַבֵּירוּרִים, ווֶערְן נִיתּוֹסֵף "גֵרִים" – דִי נִיצוֹצוֹת ווֶעלְכֶע זֵיי זַיְינֶען מְבָרֵר אוּן מַעֲלֶה אִין קְדוּשָּׁה. אוֹיךְ ווֶערְט מִיט "גֵרִים" גֶעמֵיינְט דִי נִיצוֹצוֹת הַקְּדוּשָּׁה ווֶעלְכֶע גֶעפִינֶען זִיךְ אִין דִי שִׁבְעִים לָשׁוֹן; דוּרְךְ דֶעם ווָאס אִידְן בַּאנוּצְן זִיךְ מִיט ווֶערְטֶער פוּן דִי שִׁבְעִים לָשׁוֹן אִין זֵייעֶרֶע גֶעשֶׁעפְטְן עַל־פִּי תּוֹרָה לְשֵׁם שָׁמַיִם, אוּן ווֶער רֶעדט, ווֶען מְ'בַּאנוּצְט זִיךְ מִיט אָט־דִי ווֶערְטֶער אִין לִימּוּד הַתּוֹרָה אַלֵיין (ווִי מִיר גֶעפִינֶען אַז תַּנָּאִים וְאָמוֹרָאִים הָאבְּן זִיךְ בַּאנוּצְט אִין מִשְׁנָה אוּן גְמָרָא מִיט ווֶערְטֶער פוּן לָשׁוֹן אֲרַמִּי וְכַדּוֹמֶה), אִיז מֶען מַעֲלֶה אָט־דִי נִיצוֹצוֹת הַקְּדוּשָּׁה פוּן דִי שִׁבְעִים לָשׁוֹן, עֶס ווֶערְט נִיתּוֹסֵף "עֲלֵיהֶם גֵּרִים"טו.
קֶען מֶען דָאךְ מֵיינֶען, אַז דִי תּוֹרָה ווֶעלְכֶע מֶען לֶערְנְט אִין דִי שִׁבְעִים לָשׁוֹן הָאט נִיט אִין זִיךְ דִי קְדוּשָּׁה פוּן תּוֹרָה ווִי זִי אִיז בַּא מַתַּן תּוֹרָה – זָאגְט מֶען, אַז אָט־דֶער קוֹל גָּדוֹל פוּן מַתַּן תּוֹרָה אִיז נֶחְלַק לְע' לָשׁוֹן. עֶר אִיז אַרָאפְּגֶעקוּמֶען אוּן זִיךְ אָנְגֶעטָאן אִין נִידֶערִיקֶערֶע לְבוּשִׁים, אָבֶּער דֶער פְּנִימִיּוּת פוּן דֶעם קוֹל אִיז דֶער זֶעלְבֶּער ווִי דֶער קוֹל גָּדוֹל פוּן "אָנֹכִי הֲוָיָ' אֱלֹקֶיךָ" (וְאַדְּרַבָּה, עֶס הָאט נָאךְ אַ טִיפֶערְן שׁוֹרֶשׁטז, "דְּכָל הַגָּבוֹהַּ גָּבוֹהַּ בְּיוֹתֵר יוֹרֵד לְמַטָּה מַּטָּה יוֹתֵר")יז.
דָאס אִיז אַלְץ אַ בִּיאוּר אוֹיף דִי עֶרְשְׁטֶע צְווֵיי פֵּירוּשִׁים. ווָאס אִיז אָבֶּער דֶער בִּיאוּר אוֹיף דֶעם דְרִיטְן פֵּירוּשׁ פוּן "קוֹל גָּדוֹל וְלֹא יָסָף", "שֶׁלֹּא הָיָה לוֹ בַּת קוֹל"?
בַּת קוֹל אִיז בְּדוּגְמָא פוּן "אוֹר חוֹזֵר": ווֶען אַן אוֹר ווֶערְט נִמְשָׁךְ אוּן קוּמְט צוּ אַן אָרְט וואוּ עֶס אִיז דָא אַ זַאךְ ווָאס פַארְשְׁטֶעלְט אוּן לָאזְט נִיט דֶעם אוֹר גֵיין ווַיְיטֶער, אִיז דֶער אוֹר "חוֹזֵר", עֶר קְלַאפְּט זִיךְ אָפּ אוּן גֵייט אוֹיף צוּרִיק. אַזוֹי אִיז עֶס אוֹיךְ בַּיי אַ בַּת קוֹל: בְּשַׁעַת דֶער קוֹל טְרֶעפְט אָן אוֹיף אַ ווַאנְט אָדֶער אוֹיף עֶפֶּעס אַנְדֶערְשׁ ווָאס פַארְהַאלְט אִים, קְלִינְגְט אָפּ דֶער קוֹל אוֹיף צוּרִיק, אוּן דָאס ווֶערְט גֶערוּפְן (דָא אִין מִדְרָשׁ)יח בַּת קוֹל. וְעַל דֶּרֶךְ ווִי אַ כַּדּוּר (אַ בָּאל) ווָאס שְׁפְּרִינְגְט אָפּ פוּן אַ ווַאנְט. אַ תְּנַאי בַּא דֶעם אַלֶעם אִיז אָבֶּער, אַז דִי ווַאנְט אָדֶער דִי זַאךְ "זַאפְּט" נִיט אַרַיְין אִין זִיךְ דֶעם כַּדּוּר אָדֶער דֶעם קוֹל וְאוֹר.
ווֶען דֶער אוֹיבֶּערְשְׁטֶער הָאט גֶעזָאגְט "אָנֹכִי הֲוָיָ' אֱלֹקֶיךָ" אִיז דָאס גֶעווֶען בְּקוֹל גָּדוֹל – קֵיין זַאךְ הָאט נִיט גֶעקֶענְט אָפְּשְׁטֶעלְן דֶעם קוֹל, עֶר הָאט דוּרְכְגֶענוּמֶען דִי גַאנְצֶע ווֶעלְט, אוֹיךְ דֶעם דוֹמֵם; יֶעדֶער זַאךְ הָאט אִין זִיךְ אַיְינְגֶעזַאפְּט אוּן דוּרְכְגֶענוּמֶען גֶעווָארְן מִיט דֶעם קוֹל פוּן "אָנֹכִי" (ווַיְיל בַּיי מַתַּן תּוֹרָה אִיז גֶעווֶען ווִי דֶער גִילּוּי דְּלֶעָתִידיט, ווֶען עֶס ווֶעט זַיְין "וְנִגְלָה כְּבוֹד הֲוָיָ' וְרָאוּ כָל בָּשָׂר", אַז דֶער גִילּוּי פוּן כְּבוֹד הֲוָיָ' ווֶעט דוּרְכְנֶעמֶען אוּן נִקְלָט ווֶערְן אֲפִילוּ אִין דֶעם בָּשָׂר הַגַּשְׁמִי), אוּן דֶערִיבֶּער הָאט עַל פִּי טֶבַע נִיט גֶעקֶענְט זַיְין קֵיין בַּת קוֹל. "לֹא הָיָה לוֹ בַּת קוֹל" – נִיט צוּלִיבּ חֲלִישׁוּת פוּן דֶעם קוֹל, נָאר אַדְּרַבָּה: ווַיְיל עֶר אִיז גֶעווֶען אַ "קוֹל גָּדוֹל" אִיז דֶערְפַאר "וְלֹא יָסָף" – "לֹא הָיָה לוֹ בַּת קוֹל".
דָאס אִיז נִיט גֶעווֶען קֵיין נֵס, נָאר אַן עִנְיָן טִבְעִי: ווֶען סְ'אִיז נִיטָא קֵיין אָפְּהַאלְט אוּן פַארְשְׁטֶעל אוֹיף אַ קוֹל, אָדֶער ווֶען אַ קוֹל ווֶערְט נִקְלָט (אַיְינְגֶעזַאפְּט) הָאט עֶר נִיט קֵיין בַּת קוֹלכ.
בֶּאֱמֶת אִיז אִיצְט אוֹיךְ אַזוֹי: ווֶען אַ אִיד לֶערְנְט תּוֹרָה, נֶעמְט דוּרְךְ דֶער קוֹל הַתּוֹרָה נִיט נָאר עֶם נָאר אֲפִילוּ דִי ווֶענְט פוּן דֶער הוֹיז אִין ווֶעלְכֶער עֶר לֶערְנְט, ווִי חַזַ"ל זָאגְןכא, אַז לֶעָתִיד "קוֹרוֹת בֵּיתוֹ שֶׁל אָדָם מְעִידִים בּוֹ" (דִי בַּאלְקְנְס פוּן זַיְין הוֹיז ווֶעלְן עֵדוּת זָאגְן ווֶעגְן דֶעם מֶענְטשְׁן), ווַיְיל אִיצְטֶער זַאפְּן זֵיי אִין זִיךְ אַרַיְין זַיְינֶע רֵייד אוּן מַעֲשִׂים, נָאר אִיצְטֶער אִיז עֶס בְּהֶעְלֵם (אוּן דֶער הֶעְלֵם הָאט אוֹיךְ אַן אָרְט עַל פִּי תּוֹרָה, תּוֹרַת אֱמֶת, ווָאס דֶערְפַאר זַיְינֶען פַארַאן חִילּוּקִים אִין הֲלָכָה – לְדוּגְמָא בְּהַנּוֹגֵעַ לִצְנִיעוּתכב – צִי מֶען טוּט אַ זַאךְ בְּחַדְרֵי חֲדָרִים אָדֶער בְּגָלוּי) אוּן לֶעָתִיד ווֶעלְן דִי ווֶענְט אוּן בַּאלְקְנְס אַרוֹיסְשְׁרַייְעֶן דָאס ווָאס זֵיי הָאבְּן אַיְינְגֶעזַאפְּט אִין זִיךְ אִיצְטֶער – "אֶבֶן מִקִּיר תִּזְעַק וְכָפִיס מֵעֵץ יַעֲנֶנָּה"כג.
אוּן פוּן דֶעם גִילּוּי דְּלֶעָתִיד אִיז פַארַאן אַ מֵעֵין אוֹיךְ אִיצְטֶער בַּא צַדִּיקִים. ווִי עֶס ווֶערְט דֶערְצֵיילְט אִין יְרוּשַׁלְמִיכד אוֹיף אֵיינֶעם פוּן דִי זִקְנֵי גָלִיל: "מַקְלוֹ שֶׁל רַבִּי מֵאִיר הָיְתָה בְּיָדוֹ וְהִיא הָיְתָה מְלַמַּדְתּוֹ דַעַת" (רַבִּי מֵאִיר'ס שְׁטֶעקְן אִיז גֶעווֶען בַּיי אִים, אוּן דֶער שְׁטֶעקְן הָאט אִים גֶעלֶערְנְט דַעַת). וְלִכְאוֹרָה, ווִי קֶען אַ מַקֵּל לֶערְנֶען דַעַת? אוּן נָאךְ אַזַא דַעַת ווָאס מַאנְכֶע תַּנָּאִים דַאמָאלְס, זַיְינֶען דֶערְצוּ נִיט צוּגֶעקוּמֶעןכה ? נָאר ווַיְיל דִי תּוֹרָה פוּן רַבִּי מֵאִיר'ן הָאט דוּרְכְגֶענוּמֶען אוֹיךְ דִי גַשְׁמִיּוּת'דִיקֶע זַאכְן, ווֶעלְכֶע זַיְינֶען גֶעווֶען אַרוּם אִים בְּשַׁעַת זַיְין לֶערְנֶען, ווִי גֶערֶעדט פְרִיעֶר, אִיז זַיְין תּוֹרָה אַיְינְגֶעזַאפְּט גֶעווָארְן אוֹיךְ אִין דֶעם מַקֵּל. אוּן בְּשַׁעַת דֶער זָקֵן הָאט בַּאקוּמֶען דֶעם מַקֵּל, אִיז אִים צוּגֶעקוּמֶען דַעַת אִין תּוֹרָה, ווַיְיל פַאר אִים הָאט זִיךְ אַנְטְפְּלֶעקְט דָאס ווָאס עֶס אִיז גֶעווֶען בְּהֶעְלֵם אִין דֶעם מַקֵּלכו.
(דָאס אִיז אוֹיךְ דֶער טַעַם אוֹיף דֶעם ווָאס כַּמָּה הָאבְּן אָנְגֶעזָאגְטכז, אַז דֶעם אָרוֹן פַאר זֵיי זָאל מֶען מַאכְן פוּן דֶעם טִישׁ אָדֶער שְׁטֶענְדֶער אוֹיף ווֶעלְכֶע זֵיי הָאבְּן גֶעלֶערְנְט (אָדֶער גֶעגֶעבְּן עֶסְן אָרֶעמֶעלַיְיט) – ווַיְיל דִי הָאלְץ פוּן טִישׁ אָדֶער שְׁטֶענְדֶער ווֶעט עֵדוּת זָאגְן אוֹיף זֵייעֶר לֶערְנֶען תּוֹרָה ווַיְיל זִי אִיז אִין זֵיי אַיְינְגֶעזַאפְּט גֶעווָארְן דוּרְךְ זֵייעֶר לֶערְנֶען).
דִי הוֹרָאָה דֶערְפוּן בַּעֲבוֹדָתֵינוּ:
אַלֶע גִילּוּיִים דְּלֶעָתִיד הֶענְגֶען אָפּ אִין אוּנְזֶער אִיצְטֶערְדִיקֶער עֲבוֹדָהכח. מֶען דַארְף זִיךְ מִשְׁתַּדֵּל זַיְין אַז דִי תּוֹרָה ווָאס מְ'לֶערְנְט זָאל עֶם דוּרְכְנֶעמֶען אִינְגַאנְצְן – בִּיז צוּ דֶעם חֵלֶק הַדּוֹמֵם שֶׁבְּאָדָם. אַזוֹי ווִי דִי כְּלָלוּת הַבְּרִיאָה ווֶערְט גֶעטֵיילְט אִין פִיר סוּגִים, דּוֹמֵם צוֹמֵחַ חַי מְדַבֵּר, אַזוֹי אִיז אוֹיךְ בַּיי דֶעם אָדָם, עוֹלָם קָטָןכט, זַיְינֶען פַארַאן דִי פִיר סוּגִים: מְדַבֵּר – רֹאשׁ (שֵׂכֶל) שֶׁבְּאָדָם כו', דּוֹמֵם – עֵקֶב (מַעֲשֶׂה) שֶׁבּוֹ. דַארְף דִי תּוֹרָה דוּרְכְנֶעמֶען אוֹיךְ דֶעם עֵקֶב, ווִי עֶס שְׁטֵייט אוֹיף אַבְרָהָם אָבִינוּ: "עֵקֶב אֲשֶׁר שָׁמַע אַבְרָהָם בְּקוֹלִי" – אַז אוֹיךְ זַיְין פְּיַאטֶע הָאט דֶערְהֶערְט אֱלֹקוּתל.
אוּן עַל־דֶּרֶךְ ווִי בַּיי מַתַּן תּוֹרָה הָאט דֶער קוֹל פוּן עֲשֶׂרֶת הַדִּבְּרוֹת דוּרְכְגֶענוּמֶען אוֹיךְ דֶעם גַּשְׁמִי, דֶערְפַאר ווַיְיל עֶר אִיז גֶעווֶען אַ "קוֹל גָּדוֹל וְלֹא יָסָף", אַ קוֹל אָן הַגְבָּלוֹת – ווָארוּם רוּחְנִיּוּת אוּן גַּשְׁמִיּוּת זַיְינֶען הֲפָכִיִּים; גַּשְׁמִיּוּת קֶען נִיט אַיְינְזַאפְּן רוּחְנִיּוּת אוּן רוּחְנִיּוּת קֶען נִיט דוּרְכְנֶעמֶען גַּשְׁמִיּוּת; נָאר דַוְקָא דֶער קוֹל גָּדוֹל, ווָאס אִיז הֶעכֶער פוּן הַגְבָּלוֹת וְהִשְׁתַּלְשְׁלוּת, פַאר ווֶעמֶען גַּשְׁמִיּוּת אוּן רוּחְנִיּוּת זַיְינֶען גְלַיְיךְ, עֶר דַוְקָא קֶען קוּמֶען אוֹיךְ בְּגַשְׁמִיּוּתלא – עַל דֶּרֶךְ זֶה אִיז עֶס אוֹיךְ אִין עֲבוֹדַת הָאָדָם: אָט־דֶער כֹּחַ, אַז דִי תּוֹרָה ווָאס אַ איד לֶערְנְט זָאל דוּרְכְנֶעמֶען אוֹיךְ דֶעם עֵקֶב, אִיז עֶס נִיט מִצַּד דֶעם שֵׂכֶל פוּן תּוֹרָה, ווָארוּם שֵׂכֶל מִיט דּוֹמֵם הָאבְּן צְווִישְׁן זִיךְ קֵיין שַׁיְיכוּת נִיט, נָאר דָאס אִיז מִצַּד דֶעם אֱלֹקוּת שֶׁבַּתּוֹרָה, ווָאס פַאר אֱלֹקוּת זַיְינֶען נִיטָא קֵיין הַגְבָּלוֹתלב. אוּן בְּשַׁעַת דֶער לִימּוּד הַתּוֹרָה נֶעמְט דוּרְךְ דֶעם גַאנְצְן מֶענְטשְׁן בִּיז צוּ זַיְין עֵקֶב, "עֲרוּכָה בְּכָל רְמַ"ח אֵבָרִים", אִיז זִי "מִשְׁתַּמֶּרֶת"לג, זִי ווֶערְט גֶעהִיט, ווָארוּם דָאס דֶערְלַאנְגְט אִין בְּחִינָה פוּן "לִפְנֵי כִסֵּא כְבוֹדֶךָ"לד, ווָאס דָארְט אִיז "אֵין שִׁכְחָה", עֶס אִיז נִיטָא קֵיין הַגְבָּלָה (ווָאס דֶערְפוּן קוּמְט – הֶפְסֵק וְשִׁכְחָה) – "וְלֹא יָסָף".
בְּשַׁעַת דֶער לִימּוּד הַתּוֹרָה אִיז אִין אַזַא אוֹפֶן ווָאס נֶעמְט דוּרְךְ אוֹיךְ דֶעם דּוֹמֵם שֶׁבְּאָדָם, אִיז עֶס "וְלֹא יָסָף" אוֹיךְ אִין זְמַן (כַּנַּ"ל – שֶׁאֵין שׁוֹכֵחַ – אוּן אוֹיךְ) אַז דִי תּוֹרָה דֶערְנֶעמְט אִים נִיט נָאר בְּשַׁעַת'ן לֶערְנֶען, נָאר אוֹיךְ שְׁפֶּעטֶערלה, ווֶען עֶר אִיז פַארְנוּמֶען (בְּהֶיתֵּר הַתּוֹרָה) אִין דִּבְרֵי הָרְשׁוּת, אִיז אִין אַלֶע זַיְינֶע הַנְהָגוֹת קֶענְטִיק אַז עֶר אִיז אַ אִיד ווָאס לֶערְנְט תּוֹרָהלו, אוּן דִי תּוֹרָה הֶערְט זִיךְ אָן אִין אַלֶע זַיְינֶע עִנְיָנִים, אוֹיךְ אִין דִי גַשְׁמִיּוּת'דִיקֶע, בִּיז אַז "בְּכָל דְּרָכֶיךָ – דָעֵהוּ"לז, אוּן עֶר מַאכְט פוּן חֶלְקוֹ בָּעוֹלָם אַ דִירָה לוֹ יִתְבָּרֵךְ.
(משיחת חגה״ש תשכ״ג)