לקוטי שיחות חלק יט האזינו ב

אִין סִיּוּם הַסֶּדְרָהא ווֶערְט דֶערְצֵיילְט "וַיְדַבֵּר ה' אֶל מֹשֶׁה בְּעֶצֶם הַיּוֹם הַזֶּה לֵאמֹר עֲלֵה אֶל הַר הָעֲבָרִים הַזֶּה הַר נְבוֹ גו' וּמֻת בָּהָר גו'". שְׁטֶעלְט זִיךְ רַשִׁ"י אוֹיף דִי ווֶערְטֶער "וַיְדַבֵּר ה' אֶל מֹשֶׁה בְּעֶצֶם הַיּוֹם הַזֶּה" אוּן אִיז מְפָרֵשׁ "בְּג' מְקוֹמוֹת נֶאֱמר בְּעֶצֶם הַיּוֹם הַזֶּה", אוּן עֶר בְּרֵיינְגְט אַרָאפּ דִי אַנְדֶערֶע צְווֵיי עֶרְטֶערב וואוּ דָאס ווֶערְט גֶעזָאגְט: בַּיְים אַרַיְינְגֵיין פוּן נֹחַ'ן וכו' אִין דֶער תֵּיבָה ("בְּעֶצֶם הַיּוֹם הַזֶּה בָּא נֹחַ וגו'"ג ) אוּן בַּיי יְצִיאַת מִצְרַיִם ("בְּעֶצֶם הַיּוֹם הַזֶּה הוֹצִיא ה'"ד ) – ווָאס כְּשֵׁם ווִי דָארְטְן מֵיינְט עֶס, אַז בְּנֵי דוֹרוֹ שֶׁל נֹחַ אוּן דִי מִצְרִים הָאבְּן גֶעזָאגְט "בְּכָךְ וְכָךְ אִם אָנוּ מַרְגִּישִׁין כו' וְלֹא עוֹד אֶלָּא אָנוּ נוֹטְלִין וכו'" (אוּן זֵיי ווֶעלְן נִיט דֶערְלָאזְן אַז נֹחַ זָאל אַרַיְין אִין דֶער תֵּיבָה, אוּן נִיט לָאזְן אַרוֹיסְגֵיין אִידְן פוּן מִצְרַיִם, ווִי רַשִׁ"י אִיז מַאֲרִיךְ אִין דִי פְּרָטֵי הַדְּבָרִים), "אָמַר הַקָּדוֹשׁ בָּרוּךְ הוּא הֲרֵינִי כו' בַּחֲצִי הַיּוֹם וְכָל מִי שֶׁיֵּשׁ בּוֹה כֹּחַ לִמְחוֹת יָבוֹא וְיִמְחֶה": אַזוֹי אִיז עֶס אוֹיךְ בַּיי פְּטִירַת מֹשֶׁה אַז דִי אִידְן הָאבְּן דַאן גֶעזָאגְט "אֵין אָנוּ מַנִּיחִים אוֹתוֹ (אוּן רַשִׁ"י בְּרֵיינְגְט דִי כַּמָּה טוֹבוֹת ווָאס מֹשֶׁה הָאט גֶעטָאן פַאר אִידְן) אָמַר הַקָּדוֹשׁ בָּרוּךְ הוּא הֲרֵינִי מַכְנִיסוֹ בַּחֲצִי הַיּוֹם וכו'".

דָאס ווָאס רַשִׁ"י דַארְף בִּכְלַל זוּכְן אַ פֵּירוּשׁ אוֹיף "בְּעֶצֶם הַיּוֹם הַזֶּה" אִיז מוּבָן אִין פַּשְׁטוּת, ווַיְיל דִי ווֶערְטֶער זַיְינֶען לִכְאוֹרָה אִיבֶּערִיקו : עֶס שְׁטֵייט שׁוֹין אִין אָנְהֵייבּ פוּן דֶעם עִנְיָן (בְּפַרְשַׁת וַיֵּלֶךְז ) "בֵּן מֵאָה וְעֶשְׂרִים שָׁנָה אָנֹכִי הַיּוֹם", אוּן עֶר אִיז דָאךְ אִין דֶעם טָאג נִפְטָר גֶעווָארְן, פַארְשְׁטֵייט מֶען שׁוֹין אַז אַלְץ ווָאס הָאט פַּאסִירְט נָאכְדֶעם אִיז גֶעווֶען "בְּ(עֶצֶם) הַיּוֹם הַזֶּה"; אוּן אוֹיבּ צוּלִיבּ "בְּעֶצֶם" – מַאי נַפְקָא מִנֵּיהּ פוּן דֶעם?

דֶערִיבֶּער זָאגְט רַשִׁ"י אַז דָאס קוּמְט מְרַמֵּז זַיְין, אַז אִידְן הָאבְּן דָאס (פְּטִירַת מֹשֶׁה) נִיט גֶעווָאלְט דֶערְלָאזְן, אוּן אַלְס עֶנְטְפֶער אוֹיף דֶעם הָאט דֶער אוֹיבֶּערְשְׁטֶער גֶעזָאגְט: "הֲרֵינִי מַכְנִיסוֹ בַּחֲצִי הַיּוֹם וכו'".

מְ'דַארְף אָבֶּער פַארְשְׁטֵיין:

א) בִּשְׁלָמָא בְּנֵי דוֹרוֹ שֶׁל נֹחַ, הָאבְּן גֶעקֶענְט מֵיינֶען אַז זֵיי זַיְינֶען בְּכֹחַ אָפְּצוּהַאלְטְן נֹחַ'ס אַרַיְינְגֵיין אִין דֶער תֵּיבָה; אוֹיךְ דִי מִצְרִים הָאבְּן זִיךְ גֶעקֶענְט אַיְינְרֵיידְן אַז זֵיי ווֶעלְן נִיט דֶערְלָאזן דִי אִידְן אַרוֹיסְגֵיין פוּן מִצְרַיִם, ווִיבַּאלְד אַז זֵיי זַיְינֶען גֶעווֶען דֶער רוֹב – אָבֶּער ווִי אִיז עֶס שַׁיָּיךְ אַז אִידְן זָאלְן מֵיינֶען אַז זֵיי זָאלְן אָפְּהַאלְטְן פְּטִירָתוֹ שֶׁל מֹשֶׁה, אַ זַאךְ ווָאס אִיז אִינְגַאנְצְן נִיט בִּידֵי בָּשָׂר וָדָםח ?

ב) צוּלִיבּ ווָאס דַארְף רַשִׁ"י מְבַאֵר זַיְין דָא אַז "בְּג' מְקוֹמוֹת נֶאֱמר בְּעֶצֶם הַיּוֹם הַזֶּה" (אוּן נָאךְ בְּרֵיינְגֶען דִי גַאנְצֶע אֲרִיכוּת בְּשַׁיְיכוּת צוּ דִי אַנְדֶערֶע ב' מְקוֹמוֹת) – עֶר הָאט גֶעדַארְפְט אָפְּטַיְיטשְׁן פְּשׁוּטוֹ שֶׁל מִקְרָא – בְּלוֹיז אוּנְזֶער פָּסוּק (אַז אִידְן הָאבְּן נִיט גֶעווָאלְט דֶערְלָאזְן דִי פְּטִירָה פוּן מֹשֶׁה, "אָמַר הַקָּדוֹשׁ בָּרוּךְ הוּא וכו'"), וּבִפְרַט אַז עֶר טוּט אַזוֹי בְּפֵירוּשׁוֹ אוֹיף דִי ווֶערְטֶער בְּפַרְשַׁת נֹחַ^ג, וואוּ עֶר אִיז מְפָרֵשׁ "לִמֶּדְךָ הַכָּתוּב שֶׁהָיוּ בְּנֵי דוֹרוֹ וכו'ט אָמַר הַקָּדוֹשׁ בָּרוּךְ הוּא אֲנִי מַכְנִיסוֹ לְעֵינֵי כֻלָּם וכו'", אוּן בְּרֵיינְגְט דֶערְצוּ נִיט קֵיין דוּגְמָא מִמָּקוֹם אַחֵר (אַז דָאס אִיז דֶער פֵּירוּשׁ פוּן "בְּעֶצֶם הַיּוֹם הַזֶּה")?

נָאכְמֶער: כָּל שֶׁכֵּן וְקַל וָחֹמֶר, מַה דָאךְ דֶעם עֶרְשְׁטְן מָאל אַז עֶר אִיז אַזוֹי מְבַאֵר דִי ווֶערְטֶער דַארְף עֶר נִיט הָאבְּן קֵיין דוּגְמָא וְרַאְיָה, עַל אַחַת כַּמָּה וְכַמָּה – דֶעם דְרִיטְן מָאל!

נָאכְמֶער: אִין פַּרְשַׁת בֹּא אִיז רַשִׁ"י גָארְנִיט מְפָרֵשׁ אוֹיפְן פָּסוּק "בְּעֶצֶם הַיּוֹם הַזֶּה הוֹצִיא ה'"י – בְּפַשְׁטוּת, אִיז דֶער טַעַם ווַיְיל עֶר פַארְלָאזְט זִיךְ אוֹיף זַיְין פֵּירוּשׁ אִין פַּרְשַׁת נֹחַ; אִיז פַארְווָאס דָא בְּפַרְשָׁתֵנוּ, דַארְף עֶר יֶע מְפָרֵשׁ זַיְין ווָאס דֶער פָּסוּק מֵיינְט מִיט "בְּעֶצֶם הַיּוֹם הַזֶּה" (אוּן נָאךְ מִיט דוּגְמָאוֹת וְרַאְיוֹת אוּן בַּאֲרִיכוּת!)?

מוּז מֶען זָאגְן, אַז אִין אוּנְזֶער פָּסוּק אִיז דֶער פֵּירוּשׁ נִיט גְלַאטִיק, נָאר הֱיוֹת מ'גֶעפִינְט דֶעם פֵּירוּשׁ אוֹיף דִי זֶעלְבֶּע ווֶערְטֶער אִין אַנְדֶערֶע מְקוֹמוֹת, אִיז דָאס אַ הוֹכָחָה אַז אוֹיךְ אִין אוּנְזֶער פָּסוּק אִיז דֶער פֵּירוּשׁ אַזוֹייא.

[ווָאס דֶערְפַאר אִיז רַשִׁ"י מְדַיֵּיק צוּ זָאגְן (נָאכְן אַרָאפְּבְּרֵיינְגֶען דִי דוּגְמָאוֹת פוּן נֹחַ אוּן מִצְרַיִם) "אַף כַּאן כו'" – נִיט ווִי אִין סִפְרִי, דֶער מָקוֹר פוּן דֶעם פֵּירוּשׁ רַשִׁ"י, וואוּ עֶס שְׁטֵייט (ווִי בַּיי יְצִיאַת מִצְרַיִם) "וּמָה רָאָה לוֹמַר כַּאן כו'" – צוּ מַדְגִּישׁ זַיְין אַז עֶרְשְׁט נָאכְדֶעם ווִי מְ'גֶעפִינְט אַז אַזוֹי אִיז דֶער פֵּירוּשׁ בַּיי נֹחַ אוּן מִצְרַיִם, אִיז "אַף כַּאן" דֶער פֵּירוּשׁ אַזוֹי].

אוֹיךְ זַיְינֶען פַארַאן כַּמָּה דִיּוּקִים אִין לְשׁוֹן רַשִׁ"י – אוּן אֵיינִיקֶע פוּן זֵיי:

א) בַּיי נֹחַ אוּן מִצְרַיִם אִיז רַשִׁ"י נִיט מְפָרֵשׁ קֵיינֶע טַעֲמִים פַארְווָאס בְּנֵי דוֹרוֹ שֶׁל נֹחַ אוּן דִי מִצְרִים הָאבְּן גֶעזָאגְט "אֵין אָנוּ מַנִּיחִים כו'" – ווַיְיל סְ'אִיז פַארְשְׁטַאנְדִיק פוּן זִיךְ אַלֵיין – אוּן בַּא מֹשֶׁה דַארְף רַשִׁ"י יָא מְפָרֵשׁ זַיְין דִי טוֹבוֹת ווָאס מֹשֶׁה הָאט גֶעטָאן פַאר אִידְן ווָאס צוּלִיבּ דֶעם הָאבְּן אִידְן גֶעזָאגְט "אֵין אָנוּ מַנִּיחִים אוֹתוֹ": פַארְווָאס אִיז אוֹיךְ דָא נִיט מוּבָן וּפָשׁוּט, אַז אִידְן הָאבְּן נִיט גֶעווָאלְט מִיתַת מֹשֶׁה?

ב) בַּיי נֹחַ אוּן מִצְרַיִם אִיז רַשִׁ"י זִיךְ נִיט מִסְתַּפֵּק מִיט דֶעם ווָאס זֵיי הָאבְּן גֶעזָאגְט "אֵין אָנוּ מַנִּיחִים כו'" (כִּבְנִדּוֹן דִּידַן), נָאר עֶר אִיז מוֹסִיף: בַּיי נֹחַ – "וְלֹא עוֹד אֶלָּא אָנוּ נוֹטְלִין כַּשִּׁילִין וְקַרְדֻּמּוֹת וּמְבַקְּעִין אֶת הַתֵּבָה", בַּיי מִצְרַיִם – "וְלֹא עוֹד אֶלָּא אָנוּ נוֹטְלִין סְיָפוֹת וּכְלֵי זַיִן וְהוֹרְגִין בָּהֶם" – דָאס הֵייסְט אַז נִיט נָאר ווֶעלְן זֵיי נִיט דֶערְלָאזְן דִי כְּנִיסָה וִיצִיאָה כו', נָאר זֵיי ווֶעלְן אוֹיךְ מְבַטֵּל זַיְין דִי מֶעגְלִיכְקַיְיט אוֹיף דֶער כְּנִיסָה וִיצִיאָה ("מְבַקְּעִין אֶת הַתֵּבָה", "הוֹרְגִין בָּהֶם")?

ג) ווָאס אִיז דֶער טַעַם ווָאס אִין דֶער הוֹסָפָה גוּפָא, "וְלֹא עוֹד אֶלָּא אָנוּ נוֹטְלִין כו'", דֶערְמָאנְט רַשִׁ"י צְווֵיי פְּרָטִים (סַיי בַּיי נֹחַ סַיי בַּיי מִצְרַיִם): בַּיי נֹחַ – (א) כַּשִּׁילִין (ב)וְקַרְדֻּמּוֹת; בַּיי מִצְרַיִם – (א) סְיָפוֹת (ב) וּכְלֵי זַיִן?

ד) בַּיי נֹחַ אוּן מִצְרַיִם בְּרֶענְגְט רַשִׁ"י דֶעם גַאנְצְן סִיּוּם (פוּן "אָמַר הַקָּדוֹשׁ בָּרוּךְ הוּא וכו'") "וְכָל מִי שֶׁיֵּשׁ בְּיָדוֹ (בּוֹ) כֹּחַ לִמְחוֹת יָבוֹא וְיִמְחֶה", מַה שֶׁאֵין כֵּן אִין אוּנְזֶער פַאל שְׁרַיְיבְּט עֶר נָאר "אָמַר הַקָּדוֹשׁ בָּרוּךְ הוּא הֲרֵינִי מַכְנִיסוֹ בַּחֲצִי הַיּוֹם (אוּן אִיז מַמְשִׁיךְ) וכו'" – וְלִכְאוֹרָה: ווִיבַּאלְד אַז בַּיי מִצְרַיִם שְׁרַיְיבְּט רַשִׁ"י דֶעם אוֹיסְפִיר בְּפֵירוּשׁ (נִיט פַארְלָאזֶענְדִיק זִיךְ אוֹיף דֶעם ווָאס עֶר הָאט גֶעזָאגְט פְרִיעֶר בַּיי נֹחַ'ן), פַארְווָאס דָא אִיז עֶר דָאס נָאר מְרַמֵּז מִיט "וכו'"? וּמִמָּה נַפְשָׁךְ: אָדֶער אִין בֵּיידֶע שְׁרַיְיבְּן "וכו'", אָדֶער אִין בֵּיידֶע אוֹיסְפִירְן בְּפֵירוּשׁ.

ה) ווֶען רַשִׁ"י רֶעכְנְט אוֹיס דִי טוֹבוֹת ווָאס מֹשֶׁה רַבֵּינוּ הָאט גֶעטָאן פַאר אִידְן – פַארְווָאס קְלַיְיבְּט אוֹיס רַשִׁ"י דַוְקָא דִי טוֹבוֹתיב : "הוֹצִיאָנוּ מִמִּצְרַיִם וְקָרַע לָנוּ אֶת הַיָּם וְהוֹרִיד לָנוּ אֶת הַמָּן וְהֵגִיז לָנוּ אֶת הַשְּׂלָו וְהֶעֱלָה לָנוּ אֶת הַבְּאֵר וְנָתַן לָנוּ אֶת הַתּוֹרָה"יג ? אִין מֶשֶׁךְ פוּן דִי אַרְבָּעִים שָׁנָה ווָאס אִידְן זַיְינֶען גֶעווֶען אִין מִדְבָּר הָאט מֹשֶׁה רַבֵּינוּ גֶעטָאן נָאךְ אַ סַךְ טוֹבוֹת פַאר אִידְן (וּלְדוּגְמָא: הַמְתָּקַת מַיִם הַמָּרִים אִין מָרָה, כִּבּוּשׁ אֶרֶץ סִיחוֹן וְעוֹגיד, וכו' וכו').

ו) נָאכְמֶער: אִין סִפְרִי דָא שְׁטֵייט אוֹיךְ "וְעָשָׂה לָנוּ נִסִּים וּגְבוּרוֹת" – פַארווָאס אִיז דָאס רַשִׁ"י מַשְׁמִיטטו ?

[וּלְבָאֵר: הֲגַם אַז דֶער לָשׁוֹן פוּן פֵּירוּשׁ רַשִׁ"י – ווָאס אִין אִים זַיְינֶען דִי דִיּוּקִים הַנַּ"ל – אִיז גֶענוּמֶען פוּן סִפְרִי – ווִיבַּאלְד אָבֶּער רַשִׁ"י אִיז מְפָרֵשׁ לְפִי פְּשׁוּטוֹ שֶׁל מִקְרָא, וּבִפְרַט אַז רַשִׁ"י אִיז דָא נִיט מְצַיֵּין אַז דֶער פֵּירוּשׁ אִיז פוּן סִפְרִי, מוּז מֶען זָאגְן אַז דִי אַלֶע דִיּוּקִים זַיְינֶען מַסְבִּיר פְּשׁוּטוֹ שֶׁל מִקְרָא].

ז) רַשִׁ"י בְּפֵירוּשׁוֹ אִיז מְפָרֵשׁ בְּלוֹיז דִי ווֶערְטֶער "בְּעֶצֶם הַיּוֹם הַזֶּה" – פַארְווָאס אִיז עֶר מַעְתִּיק אִין זַיְין דִּיבּוּר הַמַּתְחִיל אוֹיךְ דִי ווֶערְטֶער "וַיְדַבֵּר ה' אֶל מֹשֶׁה"?

דֶער בִּיאוּר אִין דֶעם:

דֶער אוּנְטֶערְשֵׁייד, בְּפַשְׁטוּת, צְווִישְׁן אוּנְזֶער פַאל אוּן דִי גֶעבְּרַאכְטֶע דוּגְמָאוֹת פוּן נֹחַ אוּן מִצְרַיִם: דָארְטְן זַיְינֶען זֵיי (דִי בְּנֵי דוֹרוֹ שֶׁל נֹחַ אוּן דִי מִצְרִים) גֶעווֶען רְשָׁעִים, אוּן זֵיי זַיְינֶען גֶעווֶען גְרֵייט צוּ טָאן הֵיפֶּךְ פוּן דֶעם אוֹיבֶּערְשְׁטְנְס רָצוֹן, דֶערִיבֶּער אִיז פַארְשְׁטַאנְדִיק פַארְווָאס זֵיי הָאבְּן נִיט גֶעווָאלְט דֶערְלָאזְן כְּנִיסַת נֹחַ אִין דֶער תֵּיבָה אוּן יְצִיאַת בְּנֵי יִשְׂרָאֵל פוּן מִצְרִים (הֵיפֶּךְ רְצוֹן ה').

אָבֶּער אִין אוּנְזֶער פַאל אִיז נִיט מוּבָן: ווִי קֶען מֶען זָאגְן אַז אִידְן זָאלְן ווֶעלְן מוֹרֵד זַיְין, חַס וְשָׁלוֹם, אִין דֶעם אוֹיבֶּערְשְׁטְן אוּן טָאן הֵיפֶּךְ רְצוֹנוֹ? – דָא רֶעדט זִיךְ נִיט ווֶעגְן דֶעם דּוֹר הַמִּדְבָּר (בַּיי ווֶעלְכֶע מֶען גֶעפִינְט כַּמָּה פְּעָמִים אַז זֵיי הָאבְּן גֶעטָאן הֵיפֶּךְ פוּן דֶעם רָצוֹן פוּן אוֹיבֶּערְשְׁטְן), נָאר ווֶעגְן דֶעם דּוֹר שֶׁנִּכְנְסוּ לָאָרֶץ, אוֹיף ווֶעלְכְן מֶען זָאגְן וְאַתֶּם הַדְּבֵקִים בַּה' אֱלֹקֵיכֶםטו* – אִיז שְׁווֶער צוּ מְפָרֵשׁ זַיְין אַז זֵיי הָאבְּן זִיךְ אַנְטְקֶעגְן גֶעשְׁטֶעלְט דֶעם רָצוֹן פוּן אוֹיבֶּערְשְׁטְן אַז מֹשֶׁה רַבֵּינוּ זָאל נִפְטָר ווֶערְן.

אוּן דֶערִיבֶּער, ווֶען נִיט דִי הוֹכָחָה אַז "בְּג' מְקוֹמוֹת נֶאֱמַר בְּעֶצֶם הַיּוֹם הַזֶּה וכו'", ווָאלְט מֶען דָא מֵהַאי טַעְמָא נִיט גֶעלֶערְנְט דֶעם פֵּירוּשׁ (אַז דָאס אִיז אַן עֶנְטְפֶער אוֹיף "אֵין אָנוּ מַנִּיחִים כו'"); ווִיבַּאלְד אָבֶּער "בְּג' מְקוֹמוֹת נֶאֱמַר וכו'" אוּן דִי אַנְדֶערֶע צְווֵיי מְקוֹמוֹת אִיז אָט דֶער פֵּירוּשׁ מוּכָח (אוּן אָן שׁוּם שְׁווֶערִיקַיְיט) פוּן דִי ווֶערְטֶער – אִיז עֶס אַ רַאְיָה אַז "אַף כַּאן" אִיז דֶער פֵּירוּשׁ אַזוֹי.

ווִי אַזוֹי הָאבְּן דִי אִידְן גֶעמֵיינְט נִיט צוּ דֶערְלָאזְן פְּטִירַת מֹשֶׁה? – אוֹיךְ דָאס בַּאווָארְנְט רַשִׁ"י דוּרְךְ זַיְין לָשׁוֹן (נָאכְן אַרָאפְּבְּרֵיינְגֶען דִי אֲרִיכוּת ווֶעגְן נֹחַ אוּן מִצְרַיִם) "אַף כַּאן כו'", ווָאס דֶערְמִיט אִיז עֶר מַדְגִּישׁ אַז דֶער עִנְיָן פוּן "אֵין מַנִּיחִים כו'" אִיז גְלַיְיךְ אִין דִי אַלֶע דְרַיי מְקוֹמוֹת:

כְּשֵׁם ווִי בַּיי בְּנֵי דוֹרוֹ שֶׁל נֹחַ אוּן דִי מִצְרִים הָאבְּן זֵיי גֶעווָאלְט נִיט דֶערְלָאזְן דֶעם אִיבֶּערְגֵיין פוּן אֵיין אָרְט צוּם צְווֵייטְן (דִי כְּנִיסָה פוּן נֹחַ'ן אוּן דִי יְצִיאָה פוּן אִידְן), אַזוֹי אוֹיךְ בְּנִדּוֹן דִּידַן: אִידְן הָאבְּן גֶעווָאלְט נִיט דֶערְלָאזְן אַן אִיבֶּערְגֵיין – אַז מֹשֶׁה רַבֵּינוּ זָאל עוֹלֶה זַיְין לָהָר; אוּן ווִיבַּאלְד דֶער אוֹיבֶּערְשְׁטֶער הָאט גֶעזָאגְט "וּמֻת בָּהָר גו'", ווֶעט דֶער אָפְּהַאלְטְן פוּן מֹשֶׁה'ס עֲלִיָּה לָהָר בְּדֶרֶךְ מִמֵּילָא גּוֹרֵם זַיְין אוֹיךְ אַן אָפְּהַאלְט פוּן פְּטִירַת משׁהטז.

דֶערְמִיט אִיז אוֹיךְ מוּבָן פַארְווָאס אִין אוּנְזֶער פַאל אִיז מַסְפִּיק דֶער זָאגְן "אֵין אָנוּ מַנִּיחִים אוֹתוֹ", אוּן אִין דִי אַנְדֶערֶע צְווֵיי פַאלְן מוּז רַשִׁ"י מוֹסִיף זַיְין "וְלֹא עוֹד וכו'":

בְּנֵי דוֹרוֹ שֶׁל נֹחַ אוּן דִי מִצְרִים זַייְעֶנְדִיג רְשָׁעִים, אִיז בַּיי זֵיי נִיט גֶעווֶען זִיכֶער אַז דֶעם אוֹיבֶּערְשְׁטְנְ'ס אָנְזָאג ווֶעגְן דֶער כְּנִיסָה אִין תֵּיבָה "לְיָמִים עוֹד שִׁבְעָה"יז אוּן דִי יְצִיאָה פוּן מִצְרַיִם "כַּחֲצוֹת הַלַּיְלָה גו' וְאַחֲרֵי כֵן אֵצֵא"יח – מוּז דָאס זַיְין בְּדִיּוּק ווִי גֶעזָאגְט פוּן אוֹיבֶּערְשְׁטְן, בְּמֵילָא אִיז נִיט גֶענוּג דֶער "אֵין אָנוּ מַנִּיחִים אוֹתוֹ" דֶעם בַּאשְׁטִימְטְן טָאג; זֵיי ווֶעלְן מוּזְן הִיטְן טֶעג אוּן ווָאכְן תָּמִיד, יוֹמָם וָלַיְלָה, אַז נֹחַ זָאל נִיט אַרַיְינְגֵיין אִין תֵּיבָה אוּן דִי אִידְן זָאלְן נִיט אַרוֹיסְגֵיין פוּן מִצְרַיִם – הָאבְּן זֵיי דֶערִיבֶּער גֶעמוּזְט טָאן אַ פְּעוּלָּה ווָאס זָאל מְבַטֵּל זַיְין דִי גַאנְצֶע אֶפְשָׁרִיּוּת לִכְנִיסָה וִיצִיאָה – "מְבַקְּעִין אֶת הַתֵּבָה", "הוֹרְגִין בָּהֶם".

מַה שֶׁאֵין כֵּן אִין אוּנְזֶער פַאל, וואוּ עֶס רֶעדט זִיךְ ווֶעגן אִידְן צַדִּיקִים, הָאבְּן זֵיי גֶעוואוּסְט בְּפַשְׁטוּת אַז דִי גְזֵירָה פוּן אוֹיבֶּערְשְׁטְן ווָאס הָאט גֶעבְּרַאכְט אַז מֹשֶׁה הָאט זֵיי גֶעזָאגְט אַז הַיּוֹם מָלְאוּ יָמַי – בְּיוֹם זֶה אָמוּתיט אִיז בְּדִיּוּק; הָאבְּן זֵיי גֶעטְרַאכְט אַז אוֹיבּ מֹשֶׁה ווֶעט נִיט זַיְין אוֹיפְן הַר אִין דֶעם טָאג אוֹיף ווֶעלְכֶע סְ'אִיז נִגְזַר גֶעווָארְן מִיתַת מֹשֶׁה, ווֶעט דִי גְזֵירָה בָּטֵל ווֶערְן [עַל דֶּרֶךְ ווִי רַשִׁ"י הָאט פְרִיעֶרכ גֶעבְּרַאכְט, אַז נָאכְן כִּיבּוּשׁ אֶרֶץ סִיחוֹן וְעוֹג הָאט מֹשֶׁה רַבֵּינוּ גֶעטְרַאכְט אַז "הוּתַּר הַנֶּדֶר"].

אוּן דֶערִיבֶּער אִיז "אֵין אָנוּ מַנִּיחִים אוֹתוֹ" (אַרוֹיפְצוּגֵיין אוֹיפְן הַר) בְּיוֹם זֶה גֶענוּג צוּ אַרָאפְּנֶעמֶען דִי גְזֵירָה פוּן פְּטִירַת מֹשֶׁה.

פַארְווָאס בְּרֵיינְגְט רַשִׁ"י צְווֵיי פְּרָטִים (אִין דֶעם עִנְיָן פוּן "וְלֹא עוֹד אֶלָּא אָנוּ נוֹטְלִין כו'"):

בַּיי נֹחַ – ווִיבַּאלְד בְּנֵי דוֹרוֹ הָאבְּן גֶעזֶען אַז דֶער אוֹיבֶּערְשְׁטֶער ווִיל רַאטֶעווֶען נֹחַ'ן פוּן מַבּוּל דוּרְךְ זַיְין כְּנִיסָה אִין דֶער תֵּיבָה, הָאבְּן זֵיי גֶערֶעכְנְט, אַז ווֶען זֵיי ווֶעלְן צוּבְּרֶעכְן דִי תֵּיבָה, דֶעם מְקוֹם מִקְלָט פוּן נֹחַ'ן, ווֶעט שׁוֹין דֶער אוֹיבֶּערְשְׁטֶער "נִיט קֶענֶען" בְּרֵיינְגֶען דֶעם מַבּוּל.

אוּן דֶערִיבֶּער פַארְשְׁטֵייעֶנְדִיק אַז נֹחַ ווֶעט זִיכֶער זִיךְ מִשְׁתַּדֵּל זַיְין נִיט צוּ דֶערְלָאזְן אַז זֵיי זָאלְן צוּבְּרֶעכְן דִי תֵּיבָה, הָאבְּן זֵיי גֶעמוּזְט זוּכְן אַ מִיטְל צוּ קֶענֶען צוּבְּרֶעכְן דִי תֵּיבָה אוּן צוּזַאמֶען דֶערְמִיט פַארְהִיטְן אַז נֹחַ זָאל דוּרְךְ דֶעם נִיט דֶערְהַרְגְט ווֶערְן – ווָארוּם אוֹיבּ זֵיי ווֶעלְן אִים הַרְגְ'נֶען, ווֶעט דָאךְ שׁוֹין ווִידֶער נִיט זַיְין קֵיין מְנִיעָה אַז דֶער אוֹיבֶּערְשְׁטֶער זָאל בְּרֵיינְגֶען דֶעם מַבּוּלכא.

דֶערְפַאר זָאגְט רַשִׁ"י אַז זֵיי הָאבְּן גֶענוּמֶען (נִיט נָאר "קַרְדֻּמּוֹת" ווָאס דֶערְמִיט אִיז מֶען "מְבַקְּעִין הַתֵּבָה", נָאר) אוֹיךְ "כַּשִּׁילִין":

רַשִׁ"י הָאט שׁוֹין גֶעבְּרַאכְט אִין פַּרְשַׁת שׁוֹפְטִיםכב אַז דִי "שָׂרֵי צְבָאוֹת" הָאבְּן גֶעהַאט "כַּשִּׁילִין שֶׁל בַּרְזֶל בִּידֵיהֶם וְכָל מִי שֶׁרוֹצֶה לַחֲזוֹר הָרְשׁוּת בְּיָדוֹ לְקַפֵּחַ אֶת שׁוֹקָיו" – כַּשִּׁילִין אָבֶּער הַרְגְ'נֶען נִיט, [דָאס אִיז אָנְגֶעדַיְיטֶעט אִין דֶעם ווָארְט "כַּשִּׁילִין" – פוּן לְשׁוֹן כִּשְׁלוֹן: אַ שְׁטְרוֹיכְלוּנְג, אַן אָפְּהַאלְט, אָבֶּער נִיט הַרְגְ'נֶעןכג ].

אוּן אַזוֹי אוֹיךְ בְּנִדּוֹן דִּידַן, הָאבְּן זֵיי זִיךְ גֶעגְרֵייט מִיט "כַּשִּׁילִין" אוֹיף נִיט דֶערְלָאזְן אַז נֹחַ זָאל זֵיי שְׁטֶערְן אִין זֵייעֶר צוּבְּרֶעכְן דִי תֵּיבָה.

אוּן עַל דֶּרֶךְ זֶה בַּיי מִצְרַיִם: דִי מִצְרִים הָאבְּן גֶעוואוּסְט, אַז ווִי נָאר זֵיי ווֶעלְן נֶעמֶען הַרְגְ'נֶען דִי אִידְן רַחֲמָנָא לִצְלַן, ווֶעט בַּאלְד אוֹיסְבְּרֶעכְן אַ מִלְחָמָה מִצַּד דִי אִידְן, דֶערִיבֶּער הָאבְּן זֵיי זִיךְ בַּאווָאפְנְט נִיט נָאר מִיט "סְיָפוֹת" (כְּלֵי־הֲרִיגָה), נָאר אוֹיךְ "כְּלִי זַיִן"כד אִין אַלְגֶעמֵיין, כּוֹלֵל אוֹיךְ כְּלֵי הֲגָנָהכה.

עֶס בְּלַיְיבְּט נָאךְ אָבֶּער אַלְץ שְׁווֶער: ווִי אַזוֹי הָאבְּן אִידְן פָארְט גֶעווָאלְט טָאן אַ פְּעוּלָּה אוֹיף אָפְּצוּהַאלְטְן דִי פְּטִירָה פוּן מֹשֶׁה – סוֹף סוֹף אִיז עֶס דָאךְ הֵיפֶּךְ רְצוֹן ה'?

אִיז רַשִׁ"י מַמְשִׁיךְ אַז אִידְן הָאבְּן גֶעזָאגְט "אָדָם שֶׁהוֹצִיאָנוּ מִמִּצְרַיִם וכו'": אִין פַּרְשַׁת תָּבוֹאכו הָאט מֶען גֶעלֶערְנְט אַז בְּשַׁעַת דֶער אוֹיבֶּערְשְׁטֶער בֶּענְטשְׁט אַ אִידְן מִיט אַ שָׂדֶה מִיט פֵּירוֹת, טָאר עֶר נִיט זַיְין אַ כָּפוּי טוֹבָה אוּן אִיז מְחוּיָּב צוּ בְּרֵיינְגֶען בִּיכּוּרִים אוּן דַאנְקֶען דֶעם אוֹיבֶּערְשְׁטְן.

הָאבְּן אִידְן גֶע'טַעֲנֶה'ט: ווִיבַּאלְד מֹשֶׁה רַבֵּינוּ הָאט זֵיי גֶעטָאן אַזוֹיפִיל טוֹבוֹת, לִיגְט אוֹיף זֵיי אַ חִיּוּב נִיט צוּ זַיְין קֵיין כָּפוּי טוֹבָה, וּבְמֵילָא טָאן אַלְץ ווָאס אִיז אִין זֵייעֶר יְכוֹלֶת נִיט צוּ דֶערְלָאזְן זַיְין פְּטִירָה (אֲפִילוּ ווֶען דָאס אִיז דוֹחֶה דֶעם צִיווּי ה'כז פוּן "עֲלֵה אֶל הַר הָעֲבָרִים גו'").

אוּן דֶערְפַאר אִיז רַשִׁ"י זִיךְ נִיט מִסְתַּפֵּק מִיט בְּרֵיינְגֶען בְּלוֹיז אֵיינֶע פוּן דִי טוֹבוֹת אוּן שְׁרַיְיבְּן "וכו'", נָאר עֶר אִיז זֵיי מְפָרֵט, ווַיְיל ווָאס גְרֶעסֶער סְ'אִיז דִי צָאל טוֹבוֹת ווָאס אִידְן הָאבְּן בַּאקוּמֶען פוּן מֹשֶׁה'ן, אַלְץ גְרֶעסֶער אוּן שְׁטַארְקֶער אִיז זֵייעֶר חִיּוּב נִיט צוּ זַיְין קֵיין כְּפוּיֵי טוֹבָה, אוּן אַלְץ מֶער בַּארֶעכְטִיקְט עֶס זֵייעֶר הִשְׁתַּדְּלוּת צוּ מוֹנֵעַ זַיְין דֶעם קִיּוּם פוּן צִיווּי ה' – "עֲלֵה אֶל הַר גו'".

עַל פִּי זֶה אִיז מוּבָן פַארְווָאס רַשִׁ"י קְלַיְיבְּט אוֹיס דַוְקָא דִי אוֹיבְּנְדֶערְמָאנְטֶע טוֹבוֹת ווָאס מֹשֶׁה רַבֵּינוּ הָאט זֵיי גֶעטָאן אוּן נִיט דִי אַנְדֶערֶע:

בְּנוֹגֵעַ דִי טוֹבוֹת ווָאס מֹשֶׁה רַבֵּינוּ הָאט גֶעטָאן דִי אִידְן בְּמֶשֶׁךְ דִי אַלֶע יָארְן בְּעָבַר, הָאבְּן זֵיי דָאךְ זִיכֶער – נִיט זַייְעֶנְדִיק כְּפוּיֵי טוֹבָה – שׁוֹין אוֹיסְגֶעדְרִיקְט זֵייעֶר דַאנְקְבַּארְקַיְיט.

דֶערִיבֶּער רֶעכְנְט רַשִׁ"י נָאר דִי טוֹבוֹת ווָאס אִידְן הָאבְּן פוּן זֵיי נֶהֱנֶה גֶעווֶען (אוֹיךְ) "בַּיּוֹם הַזֶּה" אִין דֶעם טָאג פוּן עֲלִיַּת מֹשֶׁה לָהָר, ווָאס דֶערְפַאר לִיגְט אוֹיף זֵיי אִיצְט אַ חִיּוּב נִיט צוּ זַיְין קֵיין כְּפוּיֵי טוֹבָה.

אוּן מֶען קֶען נִיט פְרֶעגְן פַארְווָאס רַשִׁ"י בְּרֵיינְגְט אוֹיךְ "הוֹצִיאָנוּ מִמִּצְרַיִם וְקָרַע לָנוּ אֶת הַיָּם . . וְנָתַן לָנוּ אֶת הַתּוֹרָה"כח – הֲגַם דָאס זַיְינֶען זַאכְן ווָאס זַיְינֶען גֶעטָאן גֶעווָארְן בְּעָבַר (נָאכְמֶער – בְּשַׁיְיכוּת צוּם דּוֹר הַמִּדְבָּר) – ווַיְיל דִי טוֹבוֹת הָאבְּן אַ הֶמְשֵׁךְ'דִיקֶע שַׁיְיכוּת (עַל דֶּרֶךְ ווִי "פְּעוּלָּה נִמְשֶׁכֶת") צוּ אַלֶע אִידְן פוּן אַלֶע דוֹרוֹת אוּן זְמַנִּים: ווֶעגְן יְצִיאַת מִצְרַיִם (אוּן קְרִיעַת יַם סוּף ווָאס אִיז דֶער גְמַר אוּן אָפְּשְׁלוּס פוּן יְצִיאַת מִצְרַיִםכט ) הָאט מֶען שׁוֹין גֶעלֶערְנְט פְרִיעֶרל, אַז "כִּי יִשְׁאָלְךָ בִנְךָ מָחָר גו'" – ווָאס מָחָר מֵיינְט (כְּפֵירוּשׁ רַשִׁ"י) "מָחָר שֶׁהוּא אַחַר זְמַן" (אָן קֵיין הַגְבָּלָה) – "וְאָמַרְתָּ לְבִנְךָ גו' וְאוֹתָנוּ הוֹצִיא מִשָּׁם גו'"; אוּן עַל דֶּרֶךְ זֶה אִיז אוֹיךְ נְתִינַת הַתּוֹרָה נִיט גֶעווֶען בַּאגְרֶענִיצְט פַאר יֶענֶעם דוֹר אַלֵיין, נָאר פַאר אַלֶע אִידְן בְּמֶשֶׁךְ כָּל הַדּוֹרוֹתלא.

[אוּן דֶערִיבֶּער אִיז רַשִׁ"י מַשְׁמִיט דָאס ווָאס שְׁטֵייט אִין סִפְרִי "וְעָשָׂה לָנוּ נִסִּים וּגְבוּרוֹת" – ווַיְיל, כַּנַּ"ל, רֶעכְנְט רַשִׁ"י דִי טוֹבוֹת ווָאס אִידְן הָאבְּן פוּן זֵיי גֶענָאסְן (אוֹיךְ) אִינֶעם טָאג פוּן עֲלִיַּת מֹשֶׁה לָהָר, מַה שֶׁאֵין כֵּן דִי סְתַּם "נִסִּים וּגְבוּרוֹת" ווָאס זֵייעֶר טוֹבָה אִיז גֶעווֶען בְּעָבַר].

לִכְאוֹרָה אִיז אָבֶּער פָארְט נִיט גְלַאט: סוֹף־סוֹף אִיז גֶעווֶען אַ צִיווּי מְפוֹרָשׁ פוּן אוֹיבֶּערְשְׁטְן "עֲלֵה אֶל הַר גו'" – הַיְינְט ווִי הָאבְּן אִידְן גֶעקֶענְט טְרַאכְטְן אַז מִצַּד דֶעם חִיּוּב נִיט צוּ זַיְין קֵיין כְּפוּיֵי טוֹבָה מֶעגְן זֵיי אָפְּהַאלְטְן פְּטִירַת מֹשֶׁה?

צוּ פַארְעֶנְטְפֶערְן דִי שְׁאֵלָה, אִיז רַשִׁ"י מַעְתִּיק פוּן פָּסוּק אוֹיךְ דִי ווֶערְטֶער "וַיְדַבֵּר ה' אֶל מֹשֶׁה" – אַז דֶער צִיווּי "עֲלֵה אֶל הַר הָעֲבָרִים גו'" אִיז גֶעווֶען בְּלוֹיז צוּ מֹשֶׁה אוּן נִיט צוּ זֵיי.

אוּן ווִיבַּאלְד אַז צוּ זֵיי גוּפָא אִיז נִיטָא קֵיין צִיווּילב, אוּן מֹשֶׁה ווָאלְט נִיט עוֹלֶה גֶעווֶען אַלְס אָנוּס, ווָאס אוֹיף דֶערוּף זָאגְט מֶען לֹא תַעֲשֶׂה דָבָרלג, סְ'אִיז נָאר אַ עִנְיָן פוּן גוֹרֵם זַיְין אַז מֹשֶׁה רַבֵּינוּ זָאל נִיט מְקַיֵּים זַיְין זַיְין צִיווּי ה' – הָאבְּן זֵיי גֶעהַאלְטְן, אַז זֵייעֶר חִיּוּב נִיט צוּ זַיְין קֵיין כְּפוּיֵי טוֹבָה אִיז דוֹחֶה דֶעם עִנְיָן פוּן דֶעם גְרַםלד.

וְעַל פִּי כָּל הַנַּ"ל אִיז מוּבָן ווָאס רַשִׁ"י אִיז נִיט מְסַיֵּים בִּמְפוֹרָשׁ "(אָמַר הַקָּדוֹשׁ בָּרוּךְ הוּא וכו') וְכָל מִי שֶׁיֵּשׁ בּוֹ כֹּחַ לִמְחוֹת יָבוֹא וְיִמְחֶה" נָאר בְּדֶרֶךְ רֶמֶז (וכו'): דָא זַיְינֶען אִידְן נִיט גֶעווֶען אוֹיסְן צוּ מוֹחֶה זַיְין חַס וְשָׁלוֹם אַנְקֶעגן דֶעם אוֹיבֶּערְשְׁטְן, נָאר, אַדְּרַבָּה, מְקַיֵּים זַיְין (לְדַעְתָּם) אַ תּוֹרָה'דִיקְן חִיּוּב נִיט צוּ זַיְין אַ כָּפוּי טוֹבָה; אוּן דֶערְפַאר ווֶען רַשִׁ"י ווָאלְט גֶעשְׁרִיבְּן בְּפֵירוּשׁ "כָּל מִי שֶׁיֵּשׁ בּוֹ כֹּחַ לִמְחוֹת וכו'" ווָאלְט מֶען עֶס גֶעקֶענְט אוֹיסְטַיְיטשְׁן (אוֹיפְן זֶעלְבְּן אוֹפֶן ווִי בַּיי בְּנֵי דוֹרוֹ שֶׁל נֹחַ אוּן מִצְרִים) ווִי אַ מְרִידָה ("מוֹחֶה") פוּן אִידְן אִין אוֹיבֶּערְשְׁטְןלה. אוּן דֶערִיבֶּער אִיז רַשִׁ"י בְּלוֹיז מְרַמֵּז אוֹיפְן עִנְיָן מִיט "וכו'".

וּלְתוֹסֶפֶת בִּיאוּר: סוֹף־סוֹף אִיז דָאךְ גֶעווֶען אַ צִיווּי פוּן אוֹיבֶּערְשְׁטְן (עַל כָּל פָּנִים) צוּ מֹשֶׁה'ן עֶר זָאל עוֹלֶה זַיְין לָהָר, הַיְינְט ווִי הָאבְּן דִי אִידְן גֶעווָאלְט אִים נִיט דֶערְלָאזְן מְקַיֵּים זַיְין אַ צִיווּי ה'?

אִיז דֶער בִּיאוּר אִין דֶעם: אִידְן הָאבְּן גֶעטַיְיטשְׁט אַז דָאס גוּפָא ווָאס וַיְדַבֵּר הֲוָיָ' אֶל מֹשֶׁה (דַוְקָא) אוּן אוֹיךְ גֶעשְׁטֶעלְט אַ תְּנַאי (נָאכְדֶעם ווִי "עֲלֵה אֶל הַר") אִיז נִיט נָאר אַז עֶס קֶען זַיְין נָאר "עַל כָּרְחָן"לו ווִי בַּא מִלְחֶמֶת מִדְיָן, נָאר "כַּאן פָּתַח לוֹ פֶּתַח וְהוֹדִיעוֹ שֶׁהַדָּבָר תָּלוּי בּוֹ"לז (מוֹנֵעַ זַיְין דֶעם "עֲלֵה") – וּבִפְרַט אַז מֹשֶׁה ווֶעט זַיְין אַן אָנוּס – ווִי בַּא גְזֵירַת מַעֲשֵׂה הָעֵגֶל.

וּבִפְנִימִיּוּת הָעִנְיָנִים יֵשׁ לוֹמַר: כָאטשׁ סְ'אִיז שׁוֹין גֶעווֶען נָאכְן גְּזַר דִּין פוּן פְּטִירַת מֹשֶׁה, ווִיבַּאלְד אָבֶּער דָאס אִיז אַן עִנְיָן שֶׁל צִבּוּר, קֶען דָאךְ תְּשׁוּבַת הַצִּבּוּר מְבַטֵּל זַיְין דֶעם גְּזַר דִּין "אַף עַל גַּב שֶׁנֶּחְתַּם"לח.

דָאס אִיז אוֹיךְ אַ טַעַם פַארְווָאס רַשִׁ"י פִירְט נִיט אוֹיס "כָּל מִי שֶׁיֵּשׁ בּוֹ כֹּחַ לִמְחוֹת וכו'" – ווַיְיל בֶּאֱמֶת זַיְינֶען אִידְן יֶע בְּכֹחַ לִמְחוֹת כִּבְיָכוֹל אוּן מְבַטֵּל זַיְין דֶעם גְּזַר דִּין שֶׁלְּמַעְלָה [וְעַל דֶּרֶךְ ווִי מֶען גֶעפִינְט עֶס דְרַיי מָאל דוּרְךְ תְּפִלַּת מֹשֶׁה אַלֵייןלט אוּן אַזוֹי ווִי תְּפִלָּתוֹ שֶׁל מֹשֶׁה הָאט גֶעהָאלְפְןמ מְבַטֵּל זַיְין מֶחֱצָה פוּן "וּבְאַהֲרֹן הִתְאַנַּף ה'" הָאט גֶעקֶענְט הֶעלְפְן תְּפִלַּת וַעֲשִׂיַּת הַצִּבּוּר מְבַטֵּל זַיְין דֶעם "גַּם בִּי הִתְאַנַּף הֲוָיָ'" אוּן "וַהֲוָיָ' הִתְאַנַּף בִּי" – אוּן ווִי מֶען גֶעפִינְט עֶס לְגַבֵּי תּוֹרָה, אַז דֶער אוֹיבֶּערְשְׁטֶער זָאגְט "נִצְּחוּנִי בָּנַי נִצְּחוּנִי"מא ].

פַארְווָאס הָאבְּן דָאס אִידְן טַאקֶע נִיט מְבַטֵּל גֶעווֶען? אוֹיף דֶעם אִיז דֶער פָּסוּק מְרַמֵּז "בְּעֶצֶם הַיּוֹם הַזֶּה", אַז "הַיּוֹם הַזֶּה" (דִי פְּטִירַת מֹשֶׁה אִין דֶעם טָאג) רִירְט אָן "בְּעֶצֶם" – אִין דֶעם עֶצֶם קִיּוּם פוּן אִידְן; ווַיְיל ווֶען מֹשֶׁה רַבֵּינוּ ווָאלְט אַרַיְינְגֶעפִירְט דִי אִידְן אִין אֶרֶץ יִשְׂרָאֵל, אוּן מַעֲשֵׂה מֹשֶׁה זַיְינֶען דָאךְ נִצְחִיִּיםמב, ווָאלְט שְׁפֶּעטֶער נִיט גֶעקֶענְט זַיְין דֶער עִנְיָן פוּן "גָּלִינוּ מֵאַרְצֵנוּ"מג, וּבְמֵילָא ווָאלְט דֶער עוֹנֶשׁ נִיט גֶעווֶען אִינֶעם אוֹפֶן פוּן "שָׁפַךְ הַקָּדוֹשׁ בָּרוּךְ הוּא חֲמָתוֹ עַל הָעֵצִים וְעַל הָאֲבָנִים"מד, נָאר אוֹיךְ דִי אִידְן גוּפָא חַס וְשָׁלוֹם. דֶערִיבֶּער הָאט גֶעמוּזְט זַיְין דֶער עִנְיָן פוּן "עֲלֵה אֶל הַר הָעֲבָרִים גו'".

דִי הוֹרָאָה פוּן דֶעם בַּעֲבוֹדָה בְּכָל אֶחָד וְאֶחָד:

בַּיי יֶעדְן אִידְן אִיז דָא בְּנַפְשׁוֹ פוּן דֶער בְּחִינָה פוּן מֹשֶׁה רַבֵּינוּ, ווִי דֶער אַלְטֶער רֶבִּי אִיז מְבַאֵר בַּאֲרוּכָה אִין תַּנְיָאמה. קֶען דָאךְ אַ אִיד טַעֲנֶה'ן: ווִיבַּאלְד אַז דֶער אוֹיבֶּערְשְׁטֶער ווִיל אַז אִיךְ זָאל לֶערְנֶען תּוֹרָה אוּן מְקַיֵּים זַיְין מִצְוֹת, טָא פַארְווָאס הָאט עֶר גֶעמַאכְט אַז דִי בְּחִינַת מֹשֶׁה שֶׁבְּנַפְשׁוֹ זָאל זַיְין בְּהֶעְלֵם, בִּיז מְ'קֶען מֵיינֶען אַז עֶס אִיז בְּתַכְלִית הַהֶעְלֵם חַס וְשָׁלוֹם, אוּן בְּגִילּוּי פִילְט מֶען בְּלוֹיז דֶעם נֶפֶשׁ הַבַּהֲמִית?

אִיז אוֹיף דֶעם דֶער עֶנְטְפֶער, אַז דָאס אִיז דִי טוֹבָה פוּן אַ אִידְן, ווַיְיל דַוְקָא דוּרְכְדֶעם ווֶערְט "בְּעֶצֶם הַיּוֹם הַזֶּה": דַוְקָא ווֶען סְ'אִיז דָא עֲבוֹדָה – אַ אִיד הָארֶעווֶעט אוֹיף בַּיְיצוּקוּמֶען דֶעם הֶעְלֵם וְהֶסְתֵּר ווָאס אִיז דָא אִין אִים אוּן אַרוּם אִים אִין ווֶעלְט בִּכְלַל – קוּמְט צוּם אוֹיסְדְרוּק דֶער "עֶצֶם" פוּן אַ אִידְןמו ; אוּן דֶעמָאלְט זֶעט מֶען ווִי דֶער גַאנְצֶער הֶעְלֵם וְהֶסְתֵּר אִיז בְּלוֹיז גֶעווֶען אַ הֲכָנָה צוּ דֶער עֲלִיָּה שֶׁלְּאַחֲרֵי זֶה: דִי גְאוּלָּה עַל יְדֵי בְּחִינַת מֹשֶׁה שֶׁבְּנַפְשׁוֹ, אוּן פוּן גְאוּלָּה פְּרָטִית צוּ דֶער גְאוּלָּה כְּלָלִית, ווָאס מֹשֶׁה הוּא גוֹאֵל רִאשׁוֹן הוּא גוֹאֵל אַחֲרוֹןמז.

(משיחת ש"פ האזינו תשכ״ז)