ב"ה, כ"ה טבת, תשט"ו

ברוקלין.

הוו"ח אי"א נו"נ עוסק בצ"צ מוה"ר חיים שי'

שלום וברכה!

איך האב ערשט באקומען א בריף אין וועלכען מען שרייבט מיר אז די קהלה אדער די ליובאוויטשער שול אין וויניפּעג גייען קויפען א נייעם לאַט אדער איבערבויען דעם פריערדיקען בנין, און היות ווי אין וויניפּעג איז שווער מיט א מקוה, איז דאס א געלעגענהייט אז מען זאל דארט בויען אויך א מקוה.

היות אבער איך ווייס ניט קיינע פרטים אין דעם, ווענדע איך זיך צו אייך אז איר זאלט טאן וואס עס איז נאר מעגליך אין דעם, און ווען איך וועל באקומען א ידיעה פון אייך אז איך זאל שרייבען נאך וועמען אין דעם, זעלבסט פארשטענדליך אז איך וועל דאס טאן וואס פריער. און דער גרויסער זכות פון דעם ענין איז גאר ניט צו אפּשאצען און יעדער וואס קאן נאר טאן אין דעם דארף דאס באטראכטען ווי א הצלחה זאך וואס מען איז מסבב עם מלמעלה אז ער זאל קענען טאן אין א זאך פון הצלה פון א גאנצע עדה אידען צו בריינגען טהרה צו זיי וואס איז אויך מקרב די גאולה.

און איך האף צו הערען פון אייך א גוטע בשורה אז איר זייט גלייך צוגעטראטען צו דער ארבעט, און איך האף אז השם יתברך וועט געבען זיין הצלחה אין דעם און ערווארט פון אייך א גיכען ענטפער.

בברכה.

ג'רכב

מוה"ר חיים: שטיימן. אגרות נוספות אליו - לעיל ג'קנז, ובהנסמן בהערות שם.

וויניפעג . . מקוה: ראה לעיל אגרת ג'קפט.