עֶס שְׁטֵייט אִין סֵדֶר עוֹלָםא, אַז דִי מַחֲלוֹקֶת פוּן קֹרַח וַעֲדָתוֹ אוֹיף מֹשֶׁה וְאַהֲרֹן אִיז פָארְגֶעקוּמֶען נָאךְ דֶער מַעֲשֵׂה הַמְרַגְּלִים (אוּן בְּרֶענְגְט אוֹיף דֶעם אַ רַאְיָה פוּן דֶער טַעֲנָה פוּן דָּתָן וַאֲבִירָם: "אַף לֹא אֶל אֶרֶץ זָבַת חָלָב וּדְבַשׁ הֲבִיאוֹתָנוּ וגו'", אַז מֹשֶׁה רַבֵּינוּ הָאט זֵיי אַרוֹיסְגֶענוּמֶען פוּן מִצְרַיִם צוּ אוּמְבְּרֶענְגֶען זֵיי אִין מִדְבָּר כו', ווָאס דִי טַעֲנָה בַּאווַיְיזְט, אַז דֶעמָאלְט אִיז שׁוֹין גֶעווֶען נָאךְ דֶער גְזֵירָה "בַּמִּדְבָּר הַזֶּה יִתַּמּוּ")ב.
דַארְף מֶען פַארְשְׁטֵיין, פַארְווָאס הָאט קֹרַח אָפְּגֶעווַארְט מִיט זַיְין מַחֲלוֹקֶת בִּיז דַאן? דֶער צִיוּוּי פוּן דֶעם אוֹיבֶּערְשְׁטְן, אַז מֶען זָאל צוּנֶעמֶען דִי עֲבוֹדָה פוּן דִי בְּכוֹרִים אוּן זִי אִיבֶּערְגֶעבְּן צוּ אַהֲרֹן וּבָנָיו, אִיז גֶעווֶען בְּשַׁעַת מַתַּן תּוֹרָה אָדֶער מִשֶּׁהוּקַם הַמִּשְׁכָּןג, לְכָל הַדֵּעוֹת אִיז כְּהוּנָּה גְדוֹלָה דְאַהֲרֹן – ווָאס הָאט אַרוֹיסְגֶערוּפְן דִי מַחֲלוֹקֶת קֹרַח – גֶעווֶען בְּפּוֹעֵל בַּשְּׁמִינִי לְמִילּוּאִיםד, (דָאס הֵייסְט שִׁשִּׁי בְּסִיוָן מִיט אַ יָאר פְרִיעֶר, כ"ג אֲדָר, אָדֶער רֹאשׁ חֹדֶשׁ נִיסָן), אָבֶּער מַעֲשֵׂה הַמְרַגְּלִים אִיז גֶעווֶען אַ סַךְ שְׁפֶּעטֶער, אוּן אִיז פַארְעֶנְדִיקְט גֶעווָארְן עֶרְשְׁט אִין תִּשְׁעָה בְּאָב – אִיז פַארְווָאס הָאט קֹרַח נִיט גֶעקְרִיגְט אוֹיף מֹשֶׁה וְאַהֲרֹן בִּיז נָאךְ דֶער מַעֲשֵׂה הַמְרַגְּלִים?
אֲפִילוּ אוֹיבּ מְ'זָאל זָאגְן, אַז דֶער עִיקַר הַמַּחֲלוֹקֶת פוּן קֹרַח'ן אִיז גֶעווֶען אִיבֶּער דֶעם ווָאס אֱלִיצָפָן בֶּן עֻזִּיאֵל אִיז נִתְמַנֶּה גֶעווָארְן פַאר אַ נָשִׂיא אוֹיף דִי בְּנֵי קְהָתה, אִיז דָאךְ אוֹיךְ דִי הִתְמַנּוּת פוּן אֱלִיצָפָן גֶעווֶען אַ סַךְ פְרִיעֶר – בְּעֵת מֶען הָאט גֶעצֵיילְט דִי לְוִיִּים (ווָאס מִנְיַן בְּנֵי יִשְׂרָאֵל אִיז גֶעווֶען אָנְהוֹיבּ חוֹדֶשׁ אִיָּיר) – אָבֶּער קֹרַח הָאט זַיְין מַחֲלוֹקֶת אָנְגֶעהוֹיבְּן עֶרְשְׁט נָאךְ תִּשְׁעָה בְּאָב. מוּז מֶען זָאגְן, אַז מַחֲלוֹקֶת קֹרַח הָאט גֶעהַאט אַ פַארְבּוּנְד מִיט מַעֲשֵׂה הַמְרַגְּלִים.
דִי טַעֲנָה פוּן דִי מְרַגְּלִים – ווִי שׁוֹין גֶערֶעדטו – אִיז גֶעווֶען, אַז מֶען דַארְף זַיְין אָפְּגֶעזוּנְדֶערְט פוּן ווֶעלְט; אוּן דֶערִיבֶּער הָאבְּן זֵיי גֶעווָאלְט אִידְן זָאלְן בְּלַיְיבְּן אִין מִדְבָּר, בִּכְדֵי אַז ווֶעלְט זָאל זֵיי נִיט שְׁטֶערְן צוּ זֵייעֶר דְבֵיקוּת מִיט דֶעם אוֹיבֶּערְשְׁטְן דוּרְךְ לִימּוּד הַתּוֹרָה. אָבֶּער מֹשֶׁה רַבֵּינוּ הָאט זֵיי גֶעעֶנְטְפֶערְט, אַז הַמַּעֲשֶׂה הוּא הָעִיקָר אוּן דֶער תַּכְלִית הָעִילּוּי אִיז דַוְקָא דוּרְךְ מַעֲשֵׂה הַמִּצְווֹת בְּגַשְׁמִיּוּת.
דֶער חִילּוּק צְווִישְׁן תּוֹרָה אוּן מִצְווֹת אִיז: אִין תּוֹרָה, ווָאס אִיר עִנְיָן אִיז דָאךְ הֲבָנָה וְהַשָּׂגָה, זַיְינֶען פַארַאן פַארְשִׁידֶענֶע מַדְרֵיגוֹת: אֵיינֶער הָאט אַ קְלֶענֶערֶע הַשָּׂגָה אוּן אֵיינֶער הָאט אַ גְרֶעסֶערֶע הַשָּׂגָה; מַה־שֶּׁאֵין־כֵּן אִין מַעֲשֵׂה הַמִּצְווֹת, זַיְינֶען אַלֶע אִידְן גְלַיְיךְ: דִי מַעֲשֵׂה הֲנָחַת תְּפִילִּין ווָאס מֹשֶׁה רַבֵּינוּ הָאט מְקַיֵּים גֶעווֶען אִיז גֶעווֶען דִי זֶעלְבֶּע מַעֲשֶׂה ווָאס עֶס טוּט אַ אִישׁ פָּשׁוּט. חִילּוּקִים זַיְינֶען דָא אִין כַּוָּנַת הַמִּצְווֹת, אָבֶּער אִין מַעֲשֵׂה הַמִּצְווֹת זַיְינֶען אַלֶע אִידְן גְלַיְיךְ.
אוּן דֶערִיבֶּער אִיז מַחֲלוֹקֶת קֹרַח גֶעקוּמֶען עֶרְשְׁט נָאךְ דֶעם עִנְיַן הַמְרַגְּלִים: קֹרַח הָאט גֶעוואוּסְט אַז אִין לִימּוּד הַתּוֹרָה שְׁטֵייעֶן מֹשֶׁה רַבֵּינוּ אוּן אַהֲרֹן הַכֹּהֵן אַ סַךְ הֶעכֶער ווִי אַנְדֶערֶע אִידְן. מֹשֶׁה רַבֵּינוּ אִיז דָאךְ גֶעווֶען דֶער מְקַבֵּל רִאשׁוֹן פוּן הַקָּדוֹשׁ בָּרוּךְ הוּא, דֶערְנָאךְ הָאט עֶר דִי תּוֹרָה גֶעלֶערְנְט מִיט אַהֲרֹן, דֶערְנָאךְ מִיט דִי בְּנֵי אַהֲרֹן, דַאן מִיט דִי זְקֵנִים, אוּן עֶרְשְׁט שְׁפֶּעטֶער מִיט אַלֶע אִידְןז, ווָאס דָאס מֵיינְט אוֹיךְ, אַז דֶער לִימּוּד הַתּוֹרָה פוּן מֹשֶׁה וְאַהֲרֹן אִיז גֶעווֶען נִיט בְּלוֹיז פְרִיעֶר אִין זְמַן נָאר אוֹיךְ הֶעכֶער אִין מַעֲלָה – בְּעֶרֶךְ דֶעם לִימּוּד הַתּוֹרָה פוּן אַלֶע אַנְדֶערֶע אִידְן. קֹרַח'ס טַעֲנָה "מַדּוּעַ תִּתְנַשְּׂאוּ" אִיז גֶעווֶען בַּנּוֹגֵעַ דֶעם מַעֲשֶׂה (שֶׁהוּא הָעִיקָר) פוּן מִצְווֹת מַעֲשִׂיּוֹת, ווָאס אִין דֶעם זַיְינֶען אַלֶע אִידְן גְלַיְיךְ. אוּן דֶערִיבֶּער הָאט עֶר זַיְין מַחֲלוֹקֶת אָנְגֶעהוֹיבְּן עֶרְשְׁט נָאךְ עִנְיַן הַמְרַגְּלִים: נָאךְ דֶעם ווִי דִי מְרַגְּלִים הָאבְּן גֶעווָאלְט אָפְּגֶעבְּן זִיךְ נָאר מִיט תּוֹרָה וַעֲבוֹדָה רוּחְנִית, פַארְבְּלַיְיבְּן אִין מִדְבָּר אוּן זַיְין אָפְּגֶעשְׁלָאסְן פוּן ווֶעלְט, אוּן אוֹיף דֶעם הָאט מֹשֶׁה רַבֵּינוּ גֶעעֶנְטְפֶערְט אִין נָאמֶען פוּן דֶעם אוֹיבֶּערְשְׁטְן, אַז מְ'מוּז דַוְקָא אַרַיְינְגֵיין אִין אֶרֶץ יִשְׂרָאֵל צוּ מְקַיֵּים זַיְין מִצְווֹת בְּגַשְׁמִיּוּת אוּן צוּלִיבּ דֶעם אִיז כְּדַאי צוּ פַארְלָאזְן דֶעם מִדְבָּר, דִי אָפְּגֶעשְׁלָאסְנְקַיְיט פוּן עִנְיָנִים גַּשְׁמִיִּים וואוּ מֶען קֶען הָאבְּן גְרוֹיסֶע הַשָּׂגוֹת, ווַיְיל הַמַּעֲשֶׂה הוּא הָעִיקָר – דַאן אִיז קֹרַח אַרוֹיסְגֶעקוּמֶען מִיט זַיְין טַעֲנָה: לָמָּה תִּתְנַשְּׂאוּ – ווָאס אִיז אַזוֹי דִי גְרוֹיסְקַיְיט פוּן מֹשֶׁה וְאַהֲרֹן, זֵייעֶר מַעֲלָה לְגַבֵּי אַלֶע אַנְדֶערֶע אִידְן אִיז דָאךְ נָאר אִין רוּחְנִיּוּת'דִיקֶע עִנְיָנִים אוּן אִין לִימּוּד הַתּוֹרָה, אָבֶּער אִין דֶעם עִיקָר, אִין מַעֲשֵׂה הַמִּצְווֹת בְּגַשְׁמִיּוּת, זַיְינֶען דָאךְ אַלֶע גְלַיְיךְח.
דֶערְמִיט ווֶעט ווֶערְן פַארְעֶנְטְפֶערְט נָאךְ אַ קַשְׁיָא: ווִי אַזוֹי הָאבְּן קֹרַח מִיט דִי "חֲמִשִּׁים וּמָאתַיִם נְשִׂיאֵי הָעֵדָה" גֶעקֶענְט מָאנֶען בַּיי מֹשֶׁה וְאַהֲרֹן "וּמַדּוּעַ תִּתְנַשְּׂאוּ" ווִיבַּאלְד אַז "כָּל הָעֵדָה כֻּלָּם קְדוֹשִׁים וּבְתוֹכָם ה'" – זֵיי אַלֵיין זַיְינֶען דָאךְ אוֹיךְ גֶעווֶען "נְשִׂיאֵי עֵדָה", אוּן אַזוֹי אוֹיךְ אִיז דֶער גַאנְצֶער שֵׁבֶט לֵוִי גֶעווֶען הֶעכֶער פוּן אַלֶע שְׁבָטִים (אוּן מִיט זֵייעֶרֶע טַעֲנוֹת הָאבְּן זֵיי דָאךְ נִיט גֶעמֵיינְט צוּ אוֹיפְגֶעבְּן זֵייעֶר אֵייגֶענֶע הֶעכֶערְקַיְיט, אַדְּרַבָּה, זֵיי הָאבְּן פַאר זִיךְ גֶעווָאלְט אוֹיךְ כְּהוּנָּה, ווִי סְ'אִיז מוּבָן פוּן דֶעם עֶנְטְפֶער פוּן מֹשֶׁה רַבֵּינוּ "וּבִקַּשְׁתֶּם גַּם כְּהֻנָּה") – אִיז ווִי אַזוֹי זַיְינֶען זֵיי גֶעקוּמֶען מִיט אַזַא טַעֲנָה ווָאס אִיז שׁוֹלֵל זֵייעֶר אֵייגֶענֶע מַעֲלָה?
מוּז מֶען זָאגְן, אַז מִיט "וּמַדּוּעַ תִּתְנַשְּׂאוּ" הָאבְּן זֵיי נִיט גֶעמֵיינְט צוּ מְבַטֵּל זַיְין הִתְנַשְּׂאוּת בִּכְלַל, זֵיי הָאבְּן נָאר גֶעווָאלְט שׁוֹלֵל זַיְין דִי סָארְט הִתְנַשְּׂאוּת פוּן מֹשֶׁה רַבֵּינוּ, דָאס ווָאס עֶר אִיז גֶעווֶען בְּהִתְנַשְּׂאוּת פוּן אַ מֶלֶךְט. זֵיי הָאבְּן גֶע'טַעֲנֶה'ט: אֱמֶת טַאקֶע אַז עֶס זַיְינֶען פַארַאן חִילּוּקֵי מַדְרֵיגוֹת צְווִישְׁן אִידְן, אוּן אַז דִי גְרֶעסְטֶע בַּעֲלֵי מַדְרֵיגָה קֶענֶען אוּן דַארְפְן צוּלִיבּ זֵייעֶר הֶעכֶערְקַיְיט זַיְין נְשִׂיאִים אוֹיף דִי קְלֶענֶערֶע בַּעֲלֵי מַדְרֵיגָה, ווִיבַּאלְד אָבֶּער אַז "כָּל הָעֵדָה כֻּלָּם קְדוֹשִׁים", הָאבְּן דָאךְ אַלֶע מַדְרֵיגוֹת פוּן אִידְן אַן עֶרֶךְ אֵיינֶע צוּ דִי אַנְדֶערֶע – ווַיְיל דִי הֶעכֶערְקַיְיט פוּן אֵיינֶעם אוֹיף אַ צְווֵייטְן בַּאשְׁטֵייט דָאךְ נָאר אִין הַשָּׂגוֹת רוּחְנִיּוֹת, ווָאס אִיז אַ טָפֵל (לְגַבֵּי "הַמַּעֲשֶׂה הוּא הָעִיקָר"), אוּן אִין דֶעם עִיקָר זַיְינֶען אַלֶע גְלַיְיךְ כַּנַּ"ל – בְּמֵילָא, הָאט קֵיין אָרְט נִיט אַז מֹשֶׁה רַבֵּינוּ זָאל זַיְין אַ מֶלֶךְ, ווָאס דָאס אִיז אַ דֶערְהוֹיבְּנְקַיְיט שֶׁבְּאֵין עֲרוֹךְי ; ווִיבַּאלְד אַז אִין דֶעם עִיקָר זַיְינֶען אַלֶע אִידְן גְלַיְיךְ, קֶענֶען דָאךְ צְווִישְׁן זֵיי נִיט זַיְין אַזֶעלְכֶע חִילּוּקִים, אַז אֵיינֶער זָאל זַיְין בְּאֵין עֲרוֹךְ הֶעכֶער פוּן דִי אַנְדֶערֶעיא.
נָאךְ הָאבְּן זֵיי גֶעמֵיינְט מִיט זֵייעֶר טַעֲנָה ווֶעגְן דֶער מְלוּכָה פוּן מֹשֶׁה רַבֵּינוּ: דֶער פַארְבּוּנְד פוּן דִי אַנְשֵׁי הַמְּדִינָה מִיט זֵייעֶר מֶלֶךְ אִיז נִיט גְלַיְיךְ צוּ אַן אַנְדֶער פַארְבּוּנְד. לְדוּגְמָא – פוּן אַ תַּלְמִיד צוּ זַיְין רַב. דֶער פַארְבּוּנְד פוּן אַ תַּלְמִיד מִיט זַיְין רַב אִיז נָאר אִין דִי עִנְיָנִים (פוּן תּוֹרָה) ווֶעלְכֶע עֶר דַארְף פוּן אִים מְקַבֵּל זַיְין; אָבֶּער דֶער פַארְבּוּנְד פוּן דִי אַנְשֵׁי הַמְּדִינָה צוּם מֶלֶךְ אִיז אִין זֵייעֶר גַאנְצֶע מְצִיאוּת: נִיט נָאר בַּאקוּמֶען זֵיי פוּן אִים עִנְיָנִים ווָאס הָאבְּן צוּ טָאן מִיט מְלוּכָה, נָאר זֵייעֶר גַאנְצֶע מְצִיאוּת אִיז אוּנְטֶערְווָארְפְן דֶעם מֶלֶךְיב.
עַל־דֶּרֶךְ ווִי דִי גְמָרָא דֶערְצֵיילְטיג ווֶעגְן אֵיינֶעם ווָאס "מַחְוֶה בְּמָחוֹג קַמֵּי מַלְכָּא" (עֶר הָאט אִין דֶער אָנְווֶעזְנְהַיְיט פוּן מֶלֶךְ אָנְגֶעווִיזְן אוֹיף עֶפֶּעס מִיט אַ רֶמֶז), הָאט מֶען אִים דָן גֶעווֶען לְמִיתָה, ווַיְיל דֶערְמִיט הָאט עֶר אַרוֹיסְגֶעווִיזְן זַיְין אֵייגֶענֶע מְצִיאוּת אִין גֶעגְנְווַארְט פוּן מֶלֶךְ, ווָאס דָאס אִיז אַ מְרִידָה בְּמַלְכוּת. כָאטשׁ אַז דוּרְךְ "מַחְוֶה בְּמָחוֹג" הָאט עֶר נָאר אַרוֹיסְגֶעווִיזְן זַיְין מְצִיאוּת, אַן עִנְיָן ווָאס הָאט נִיט גֶעהַאט צוּ טָאן אוּן נִיט אָנְגֶערִירְט דִי עִנְיָנֵי הַמְּלוּכָה (נִיט ווִי דָאס ווָאס בַּיי אַ תַּלְמִיד טָאר נִיט זַיְין "מוֹרֶה הֲלָכָה בִּפְנֵי רַבּוֹ" – ווַיְיל דָאס הָאט צוּ טָאן מִיט דִי עִנְיָנִים ווָאס עֶר אִיז מְקַבֵּל פוּן דֶעם רַב) – פוּנְדֶעסְטְווֶעגְן אִיז עֶס שׁוֹין אַ מְרִידָה בְּמַלְכוּת. ווַיְיל מְלוּכָה דַארְף דוּרְכְנֶעמֶען דִי גַאנְצֶע מְצִיאוּת פוּן יֶעדֶערְן פוּן דִי בְּנֵי הַמְּדִינָה, אוֹיךְ אִין זֵייעֶרֶע פָּשׁוּט'עֶ זַאכְן, מַחְווּיֵי (בַּאווֶעגוּנְגֶען פוּן הֶענְט) וכו'.
אוּן אַזוֹי אִיז עֶס אוֹיךְ גֶעווֶען בַּיי מֹשֶׁה רַבֵּינוּ, אַז דוּרְךְ זַיְין הִתְנַשְּׂאוּת הָאבְּן אִידְן בַּאקוּמֶען דוּרְךְ אִים נִיט בְּלוֹיז הַשָּׂגוֹת נַעֲלוֹת וְכַדּוֹמֶה, נָאר אוֹיךְ אַלֶע זֵייעֶרֶע עִנְיָנִים, בִּיז צוּ עִנְיָנִים פְּשׁוּטִים בְּיוֹתֵריד (אוּן דָאס זֶעלְבֶּע אִיז אוֹיךְ בַּיי אִתְפַּשְּׁטוּתָא דְמֹשֶׁה שֶׁבְּכָל דָּרָא וְדָרָאטו, בַּיי דִי נְשִׂיאִים, רָאֵשׁי בְּנֵי יִשְׂרָאֵלטז אַז אַלֶע אַנְשֵׁי דוֹרָםיז דַארְפְן מְקַבֵּל זַיְין זֵייעֶר חַיּוּת דוּרְךְ דִי נְשִׂיאִים)יח.
אוּן דָאס אִיז גֶעווֶען טַעֲנַת קֹרַח; "כִּי כָל הָעֵדָה כֻּלָּם קְדוֹשִׁים" – אִין דִי זַאכְן ווָאס אַלֶע אִידְן זַיְינֶען גְלַיְיךְ קְדוֹשִׁים, אִין קִיּוּם הַמִּצְווֹת "מַדּוּעַ תִּתְנַשְּׂאוּ"יט – פַארְווָאס אִיז בַּנּוֹגֵעַ דִי עִנְיָנִים ווָאס אַלֶע זַיְינֶען גְלַיְיךְ, דִי עִנְיָנִים פְּשׁוּטִים – דַארְפְן אוֹיךְ אִידְן מְקַבֵּל זַיְין זֵיי דוּרְךְ מֹשֶׁה רַבֵּינוּ?
אוֹיף דֶעם הָאט זֵיי מֹשֶׁה רַבֵּינוּ גֶעעֶנְטְפֶערְט: "בֹּקֶר וְיֹדַע ה' אֶת אֲשֶׁר לוֹ וְאֶת הַקָּדוֹשׁ וְהִקְרִיב אֵלָיו", אִינְדֶערְפְרִי ווֶעט דֶער אוֹיבֶּערְשְׁטֶער לָאזְן ווִיסְן "אֶת אֲשֶׁר לוֹ – לַעֲבוֹדַת לְוִיָּה, וְאֶת הַקָּדוֹשׁ – לִכְהֻנָּה"כ.
רַשִׁ"י זָאגְטכא דֶעם טַעַם פַארְווָאס מֹשֶׁה רַבֵּינוּ הָאט גֶעהֵייסְן ווַארְטְן בִּיז בֹּקֶר: א) זֵיי זָאלְן דֶערְווַיְילֶע קֶענֶען תְּשׁוּבָה טָאן; ב) צוּ ווַיְיזְן, אַז פּוּנְקְט ווִי דִי גְרֶענֶעצְן מִיט ווֶעלְכֶע דֶער אוֹיבֶּערְשְׁטֶער הָאט פַאנַאנְדֶערְגֶעטֵיילְט צְווִישְׁן עֶרֶב אוּן בּוֹקֶר קֶען קֵיינֶער נִיט צֶעשְׁטֶערְן, אַזוֹי קֶען קֵיינֶען נִיט מְבַטֵּל מַאכְן דָאס ווָאס "וַיִּבָּדֵל אַהֲרֹן לְהַקְדִּישׁוֹ קֹדֶשׁ קָדָשִׁים"כב.
דִי בֵּיידֶע טַעֲמִים פָאדֶערְן אַ בִּיאוּר: לוֹיטְן עֶרְשְׁטְן טַעַם אִיז דָאךְ אַוַדַּאי נִיט מוּבָן, פַארְווָאס מֶען הָאט גֶעדַארְפְט ווַארְטְן אַ גַאנְצֶע נַאכְט בִּיז בּוֹקֶר, מֶען קֶען דָאךְ תְּשׁוּבָה טָאן אִין אֵיין ווַיְילֶע, "בְּשַׁעְתָּא חֲדָא וּבְרִגְעָא חֲדָא"; אוּן אוֹיבּ אַנְדֶערֶע ווֶערְן נִיט בַּאלְד נִתְעוֹרֵר בִּתְשׁוּבָה – אִיז דָאךְ אִין דֶעם קֵיין שִׁיעוּר נִיטָא: אֵיינֶער טוּט תְּשׁוּבָה גְלַיְיךְ אוֹיפְן אָרְט, בַּיי אַ צְווֵייטְן קֶען עֶס גֶעדוֹיעֶרְן בִּיז בּוֹקֶר, אוּן בַּיי אַ דְרִיטְן נָאךְ לֶענְגֶער.
אוֹיךְ לוֹיטְן צְווֵייטְן טַעַם אִיז נִיט מוּבָן ווָאס הָאט מֶען גֶעדַארְפְט ווַארְטְן בִּיז אוֹיף צוּ מָארְגְן אִינְדֶערְפְרִי, סְ'ווָאלְט דָאךְ גֶעווֶען גֶענוּג צוּ ווַארְטְן בִּיז בַּיְינַאכְטכג, ווָאס דַאן זַיְינֶען פַארַאן דִי גְבוּלוֹת ווָאס טֵיילְן פַאנַאנְדֶער צְווִישְׁן בּוֹקֶר אוּן עֶרֶב?
אוֹיךְ דַארְף מֶען פַארְשְׁטֵיין, ווָאס אִיז טַאקֶע גֶעווֶען דֶער עֶנְטְפֶער אוֹיף דֶעם ווָאס קֹרַח הָאט גֶע'טַעֲנֶה'ט "מַדּוּעַ תִּתְנַשְּׂאוּ", ווִיבַּאלְד אַז "כֻּלָּם קְדוֹשִׁים" אוּן "הַמַּעֲשֶׂה הוּא הָעִיקָר". דוּרְךְ "קְחוּ לָכֶם מַחְתּוֹת" הָאט מֹשֶׁה רַבֵּינוּ לִכְאוֹרָה נָאר גֶעווָאלְט בַּאווַיְיזְן (אוּן בַּאווִיזְן) אַז קֹרַח אִיז נִיט גֶערֶעכְט אוּן אַז אַלְץ הָאט מֹשֶׁה גֶעטָאן בְּצִיוּוּי הַקָּדוֹשׁ בָּרוּךְ הוּא, דָאס הָאט אָבֶּער נִיט מְבַאֵר גֶעווֶען פַארְווָאס קֹרַח אִיז נִיט גֶערֶעכְט. (אוֹיךְ אִיז דִי מַעֲשֵׂה הַקְּטוֹרֶת לִכְאוֹרָה גֶעווֶען נוֹגֵעַ נָאר צוּ דֶער טַעֲנָה אוֹיף כְּהוּנַּת אַהֲרֹן, אָבֶּער נִיט בַּנּוֹגֵעַ דֶער טַעֲנָה אוֹיף דֶער מְלוּכָה־הִתְנַשְּׂאוּת פוּן מֹשֶׁה רַבֵּינוּ).
דַארְף מֶען זָאגְן, אז אִין דֶעם הֵייסְן ווַארְטְן בִּיז בּוֹקֶר, אִיז פַארַאן אוֹיךְ אַ בִּיאוּר פַארְווָאס קֹרַח אִיז אוּמְגֶערֶעכְט.
דֶער אַלְטֶער רֶבִּי אִיז מְדַיֵּיקכד דֶעם לָשׁוֹן "תְּשׁוּבָה וּמַעֲשִׂים טוֹבִים" ווָאס ווֶערְט אָפְט גֶעבְּרַאכְט אִין דִבְרֵי רַזַ"ל (אוּן נִיט – תְּשׁוּבָה וּמִצְוֹת) אוּן אִיז מְבַאֵר: מַעֲשֵׂה הַמִּצְווֹת קֶענֶען זַיְין אִין אַזַא אוֹפֶן אַז זֵיי זַיְינֶען נִיט "טוֹבִים" (מְאִירִים), זֵיי לַיְיכְטְן נִיט, – כָאטשׁ אַז אוֹיךְ דַאן זַיְינֶען זֵיי מִצְווֹת – זַיְינֶען חַזַ"ל מְדַיֵּיק צוּ זָאגְן "תְּשׁוּבָה וּמַעֲשִׂים טוֹבִים", דוּרְךְ רִיכְטִיקֶע תְּשׁוּבָה זַיְינֶען דִי מַעֲשִׂים טוֹבִים וּמְאִירִים.
אַ מָשָׁל אוֹיף דֶעם אִיז פוּן אֲבָנִים טוֹבוֹת ווָאס הָאבְּן אוֹיף זִיךְ בְּלָאטֶע, ווָאס דַאן אִיז נִיט נָאר ווָאס דִי אֲבָנִים טוֹבוֹת לַיְיכְטְן נִיט, נָאר אוֹיךְ אַז דוּרְךְ דֶער בְּלָאטֶע ווָאס אוֹיף זֵיי פַארְשְׁטֶעלְן זֵיי אוֹיף לִיכְטִיקַיְיט אוּן זַיְינֶען הֵיפֶּךְ הָאוֹר, כָאטשׁ אַז אוֹיךְ ווֶען זֵיי זַיְינֶען אִין בְּלָאטֶע הָאבְּן זֵיי אִין זִיךְ בְּהֶעְלֵם אַלֶע תְּכוּנוֹת פוּן אֲבָנִים טוֹבוֹת.
עַל־דֶּרֶךְ־זֶה אִיז אוֹיךְ אִין מִצְווֹת: עִנְיָנָם אִיז לְהוֹסִיף אוֹר בָּעוֹלָם. פַארַאן אָבֶּער אַמָאל ווָאס לְפִי שָׁעָה וּבְגִילּוּי זַיְינֶען זֵיי הֵיפֶּךְ עִנְיָנָם. דֶער לִימּוּד הַתּוֹרָה אוּן קִיּוּם הַמִּצְווֹת פוּן אַ רָשָׁע, אִיז נִיט נָאר ווָאס זֵיי מַאכְן נִיט לִיכְטִיק, נָאר אַדְּרַבָּה, זֵיי מַאכְן נָאךְ גְרֶעסֶער דֶעם חוֹשֶׁךְ אוּן הֶעְלֵם אִין ווֶעלְט, זֵיי זַיְינֶען מוֹסִיף חַיּוּת אִין קְלִיפּוֹתכה. אוּן נִיט נָאר דִי תּוֹרָה אוּן מִצְווֹת פוּן אַ רָשָׁע, נָאר אַזוֹי אִיז עֶס אוֹיךְ אִין תּוֹרָה אוּן מִצְווֹת שֶׁלֹּא לִשְׁמָהּ, צוּלִיבּ פְּנִיּוֹתכו. וּכְנִרְאֶה גַּם בְּמוּחָשׁ, אַז בְּשַׁעַת עֶס פֶעלְט דִי רִיכְטִיקֶע כַּוָּנָה אִין תּוֹרָה וּמִצְווֹת, קֶען דֶעם מֶענְטשְׁן דֶערְפוּן צוּקוּמֶען יֵשׁוּת אוּן גַאֲוָהכז, פִילְנְדִיק בַּיי זִיךְ דִי אֵייגֶענֶע מַעֲלָה ווָאס עֶר אִיז בַּיְיגֶעשְׁטַאנֶען שְׁווֶערִיקַיְיטְן אוּן הָאט מְקַיֵּים גֶעווֶען דִי מִצְוָה, וּבִפְרַט נָאךְ אוֹיבּ עֶר אִיז מְקַיֵּים אַ מִצְוָה בְּהִידּוּר. ווָאס דָאס אִיז גָאר דֶער הֵיפֶּךְ פוּן עִנְיַן הַמִּצְוָה: מִצְוָה אִיז פוּן לְשׁוֹן צַוְתָא וְחִיבּוּרכח, דוּרְךְ אַ מִצְוָה ווֶערְט מֶען בַּאהֶעפְט מִיטְן אוֹיבֶּערְשְׁטְן, אָבֶּער דוּרְךְ יֵשׁוּת אוּן גַאֲוָה ווֶערְט מֶען, רַחֲמָנָא לִצְלַן, אָפְּגֶערִיסְן פוּן דֶעם אוֹיבֶּערְשְׁטְן, דֶער אוֹיבֶּערְשְׁטֶער זָאגְטכט אוֹיף אַ בַּעַל גַּאֲוָה "אֵין אֲנִי וְהוּא יְכוֹלִים לָדוּר".
בְּהֶעְלֵם וּבִפְנִימִיּוּת אִיז עֶס אוֹיךְ דֶעמָאלְט תּוֹרָה וּמִצְווֹת, ווָאס דֶערְפאר ווֶערְט אָפְּגֶע'פַּסְקְ'נְט אִין שׁוּלְחָן עָרוּךְל, אַז אֲפִילוּ אַ רָשָׁע גָּמוּר דַארְף לֶערְנֶען תּוֹרָה אוּן גֶעווִיס דַארְף עֶר מְקַיֵּים זַיְין מִצְווֹת, אוּן כָאטשׁ אַז דֶערְווַיְילֶע אִיז עֶר דוּרְךְ זַיְין תּוֹרָה וּמִצְווֹת מוֹסִיף חַיּוּת אִין קְלִיפָּה, אִיז אָבֶּער שְׁפֶּעטֶער, ווֶען עֶר ווֶעט תְּשׁוּבָה טָאן – אוּן עֶר ווֶעט גֶעווִיס תְּשׁוּבָה טָאן, ווארוּם "לֹא יִדַּח מִמֶּנּוּ נִדָּח" – ווֶעלְן דִי נִיצוֹצוֹת הַקְּדוּשָּׁה פוּן זַיְין תּוֹרָה וּמִצְווֹת אַרוֹיסְגֶענוּמֶען ווֶערְן פוּן קְלִיפָּה אוּן אָנְהוֹיבְּן לַיְיכְטְן. אָבֶּער כָּל־זְמַן עֶר הָאט נִיט גֶעטָאן קֵיין תְּשׁוּבָה אִיז זַיְין תּוֹרָה וּמִצְווֹת – ווִי אַן אֶבֶן טוֹב ווָאס אִיז אִין בְּלָאטֶע, אוּן זֵיי מַאכְן נָאךְ גְרֶעסֶער דֶעם חוֹשֶׁךְ בָּעוֹלָם.
קֶען עֶר דָאךְ בַּיי זִיךְ טְרַאכְטְן: ווָאס אִיז אִים נוֹגֵעַ צִי זַיְינֶע מִצְווֹת זַיְינֶען לִיכְטִיקֶע צִי זֵיי זַיְינֶען פִינְסְטֶערֶע – דִי לִיכְטִיקַיְיט אָדֶער דֶער הֵיפֶּךְ, אִיז דָאךְ בְּלוֹיז אַן עִנְיָן ווָאס הָאט צוּ טָאן מִיט "גִילּוּיִים" – הַמְשָׁכַת הָעַצְמוּת אִיז דוּרְךְ מַעֲשֶׂה בְּפּוֹעֵל, הַמַּעֲשֶׂה הוּא הָעִיקָר, אוּן דוּרְךְ דֶעם מַאכְט מֶען אַ דִירָה לְעַצְמוּתוֹ; אוּן דֶער רָצוֹן הָעֶלְיוֹן אִיז דָאךְ (ווִי עֶס ווֶערְט אָפְּגֶע'פַּסְקְ'נְט אִין שׁוּלְחָן עָרוּךְ) אַז עֶר זָאל לֶערְנֶען תּוֹרָה אוּן מְקַיֵּים זַיְין מִצְווֹת – ווֶעט עֶר אַזוֹי טָאן. דָאס ווָאס עֶר אִיז מוֹסִיף חַיּוּת אִין קְלִיפּוֹת – אִיז עֶס נִיט זַיְין גֶעשֶׁעפְט, זַיְין עִנְיָן אִיז – "לְשַׁמֵּשׁ אֶת קוֹנִי"לא, צוּ טָאן דֶעם רָצוֹן הָעֶלְיוֹן, אוּן דֶער רָצוֹן הָעֶלְיוֹן אִיז, אַז אוֹיךְ עֶר זָאל מְקַיֵּים זַיְין תּוֹרָה וּמִצְווֹת.
אִיז דֶער עֶנְטְפֶער אוֹיף דֶעם, אַז דֶער רָצוֹן הָעֶלְיוֹן אִיז נִיט נָאר אוֹיפְן קִיּוּם הַמִּצְווֹת, נָאר אוֹיךְ אוֹיף כַּוָּנַת הַמִּצְווֹת. ווָארוּם אִין "דִירָה לוֹ בַּתַּחְתּוֹנִים" זַיְינֶען דָא צְווֵיי עִנְיָנִיםלב : מֶען דַארְף מַאכְן אַ דִירָה לְעַצְמוּתוֹ, אוּן אַז דֶער עֶצֶם זָאל דָארְט שְׁטֵיין בְּגִילּוּי, עֶס זָאל זַיְין אַ לִיכְטִיקֶע דִירָה, וּבִכְדֵי אַז דִי דִירָה זָאל זַיְין אַ לִיכְטִיקֶע דַארְפְן זַיְין לִיכְטִיקֶע מִצְווֹת, מִצְווֹת ווֶעלְכֶע בַּאלַיְיכְטְן אוּן אֵיידְלֶען אוֹיס דֶעם מֶענְטשְׁן מִיט דֶער ווֶעלְט ווָאס אַרוּם אִים.
אוּן דָאס אִיז גֶעווֶען דֶער עֶנְטְפֶער פוּן מֹשֶׁה רַבֵּינוּ אוֹיף טַעֲנַת קֹרַח וַעֲדָתוֹ: אֱמֶת טַאקֶע אַז הַמַּעֲשֶׂה הוא הָעִיקָר, אָבֶּער דֶער קִיּוּם פוּן מִצְווֹת דַארְף זַיְין אִין אַן אוֹפֶן פוּן "בּוֹקֶר", עֶס זָאלְן זַיְין לִיכְטִיקֶע מִצְווֹת, ווֶעלְכֶע זָאלְן בְּרֶענְגֶען צוּ "וְיוֹדַע הֲוָיָ'", צוּ יְדִיעַת וְגִילּוּילג אֱלֹקוּת. מֶען קֶען טַאקֶע מְקַיֵּים זַיְין מִצְווֹת אוֹיךְ אָן דֶער רִיכְטִיקֶער כַּוָּנָה, אָבֶּער דָאס זַיְינֶען נִיט קֵיין לִיכְטִיקֶע מִצְווֹת ("בֹּקֶר") אוּן זֵיי בְּרֶענְגֶען נִיט צוּ יְדִיעַת (גִּילּוּי) אֱלֹקוּת ("וְיוֹדַע הֲוָיָ'").
אוּן דָאס אִיז אוֹיךְ רַשִׁ"י מְרַמֵּז אִין דִי צְווֵיי טַעֲמִים פַארְווָאס מֹשֶׁה רַבֵּינוּ הָאט זֵיי גֶעהֵייסְן ווַארְטְן בִּיז "בֹּקֶר":
א) "שֶׁמָּא יַחְזְרוּ בָּהֶם", בִּכְדֵי זֵיי זָאלְן הָאבְּן שָׁהוּת צוּ תְּשׁוּבָה טָאן. אוּן כָאטשׁ אַז תְּשׁוּבָה קֶען מֶען טָאן בְּשַׁעְתָּא חֲדָא וּבְרִגְעָא חֲדָא, הָאט זֵיי אָבֶּער מֹשֶׁה רַבֵּינוּ מְרַמֵּז גֶעווֶען, אַז עֶס פָאדֶערְט זִיךְ אַ "בֹּקֶר"'דִיקֶע תְּשׁוּבָה, אַ לִיכְטִיקֶע תְּשׁוּבָה, ווָאס דַאן פּוֹעֵל'ט דִי תְּשׁוּבָה אַז דִי "מַעֲשִׂים" (מִצְווֹת) זָאלְן זַיְין "טוֹבִים". אוֹיךְ ווֶען זַיְין תְּשׁוּבָה קוּמְט פוּן יִרְאַת הָעוֹנֶשׁ, אִיז מֶען אִים מוֹחֵל אוֹיף זַיְינֶע עֲבֵירוֹת, דָאס אִיז אָבֶּער נָאךְ נִיט מְזַכֵּךְ דֶעם מֶענְטשְׁן; עֶר פַארְבְּלַיְיבְּט אִין זַיְין יֵשׁוּת. עֶס דַארְף זַיְין אַ לִיכְטִיקֶע תְּשׁוּבָה, בִּיז – תְּשׁוּבָה מֵאַהֲבָה רַבָּה, ווָאס דַאן דַוְקָא אִיז "זְדוֹנוֹת נַעֲשִׂים לוֹ כְּזָכִיּוֹת", עֶס ווִירְקְט אוֹיף דִי זְדוֹנוֹת מַמָּשׁ אוּן אַוַדַּאי אוֹיף דִי מִצְווֹת ווֶעלְכֶע זַיְינֶען גֶעווֶען אִין גָלוּת (ווִי "זְדוֹנוֹת") בְּתוֹךְ הַקְּלִיפּוֹת, אַז זֵיי זָאלְן נִתְהַפֵּךְ ווֶערְן לְזָכִיּוֹת, אָנְהוֹיבְּן מֵאִיר זַיְין.
ב) "בֹּקֶר, אָמַר לוֹ מֹשֶׁה גְּבוּלוֹת חָלַק הַקָּדוֹשׁ בָּרוּךְ הוּא בְּעוֹלָמוֹ כו'". מֹשֶׁה רַבֵּינוּ הָאט זֵיי מְרַמֵּז גֶעווֶען דִי מַעֲלָה פוּן לִיכְטִיקֶע מִצְווֹת אוֹיף דִי מִצְווֹת ווֶעלְכֶע זַיְינֶען בְּגָלוּת בְּתוֹךְ הַקְּלִיפּוֹת, כָאטשׁ אוֹיךְ זֵיי זַיְינֶען מִצְוֹת ה', מִיט דֶעם מָשָׁל פוּן עֶרֶב וּבוֹקֶר: עֶרֶב אוּן בּוֹקֶר זַיְינֶען בֵּיידֶע דֶעם אוֹיבֶּערְשְׁטְנְס בַּאשֶׁעפֶענִישְׁן, אוּן דַוְקָא פוּן דֶעם עֶרֶב מִיטְן בּוֹקֶר צוּזַאמֶען ווֶערְט "יוֹם אֶחָד", אוּן רַזַ"ל זָאגְןלד אַז דָאס אִיז יוֹם הַכִּפּוּרִים, אוּן פוּנְדֶעסְטְווֶעגְן אִיז עֶרֶב – פִינְסְטֶער, אוּן בּוֹקֶר – לִיכְטִיק.
אוּן אִין דֶעם אִיז אוֹיךְ דֶער עֶנְטְפֶער אוֹיף דֶער טַעֲנָה "וּמַדּוּעַ תִּתְנַשְּׂאוּ": אֱמֶת טַאקֶע אַז "כָּל הָעֵדָה כֻּלָּם קְדוֹשִׁים וּבְתוֹכָם הֲוָיָ'", אַז יֶעדֶער אִיד אִיז הֵיילִיק אוּן נִיט בְּלוֹיז מִצַּד זַיְין נְשָׁמָה נָאר אוֹיךְ מִצַּד זַיְין גוּף, אוּן דוּרְךְ זַיְין קְדוּשָּׁה הָאט עֶר בְּכֹחַ (דוּרְךְ זַיְינֶע מִצְווֹת) צוּ מַמְשִׁיךְ זַיְין עַצְמוּת – "וּבְתוֹכָם הֲוָיָ'", שֵׁם הָעֶצֶם – דָאךְ ווִיבַּאלְד אַז מִצְווֹת אִיז עִנְיָנָם, זֵיי זָאלְן לַיְיכְטְן, זֵיי זָאלְן זַיְין מַעֲשִׂים טוֹבִים וּמְאִירִים, אִיז א) דָא אַן עִילּוּי אוֹיךְ אִין מַעֲשֵׂה הַמִּצְווֹת פוּן מֹשֶׁה רַבֵּינוּ אוֹיף דִי מִצְווֹת פוּן אַלֶע אַנְדֶערֶע אִידְן, אוּן דֶער עִילּוּי אִיז אַן עִילּוּי שֶׁבְּאֵין עֲרוֹךְ. ב) מֶען דַארְף מְקַבֵּל זַיְין אַלֶע הַשְׁפָּעוֹת פוּן מֹשֶׁה רַבֵּינוּ, וְאִתְפַּשְּׁטוּתֵיהּ דִּילֵיהּ שֶׁבְּכָל דָּרָא וְדָרָא, נִיט בְּלוֹיז בַּנּוֹגֵעַ עֲבוֹדַת הַמּוֹחַ וְהַלֵּב, נָאר אוֹיךְ בַּנּוֹגֵעַ מַעֲשֵׂה הַמִּצְווֹתלה, וּבִפְרַט – אַז זֵיי זָאלְן זַיְין מַעֲשִׂים טוֹבִים וּמְאִירִים.
דִי הוֹרָאָה פַאר אוּנְז פוּן דִי צְווֵיי סֶדְרוֹת, שְׁלַח אוּן קֹרַח, אִיז:
פַארַאן אַזוֹינֶע ווָאס טַעֲנֶה'ן, אַז מַעֲשֵׂה הַמִּצְווֹת בְּפּוֹעֵל אִיז נִיט נוֹגֵעַ אוֹיף אַזוֹי פִיל, דֶער עִיקָר אִיז – עֶס זָאל זַיְין אַ אִידִישֶׁע הַארְץ, "רַחֲמָנָא לִבָּא בָּעֵי"לו ; פַארַאן אַזוֹינֶע ווָאס טַעֲנֶה'ן, אַז מֶען דַארְף הָאבְּן בְּלוֹיז מַעֲשֵׂה הַמִּצְווֹת, אָבֶּער לִימּוּד הַחֲסִידוּת אוּן עֲבוֹדָה שֶׁבְּלֵב אִיז נִיט אַזוֹי ווִיכְטִיק, ווַיְיל הַמַּעֲשֶׂה הוּא הָעִיקָר. לֶערְנְט אוּנְז דָא תּוֹרָה, אַז דֶער סֵדֶר הָעֲבוֹדָה דַארְף זַיְין נִיט ווִי שִׁיטַת הַמְרַגְּלִים, אַז מֶען קֶען יוֹצֵא זַיְין מִיט רוּחְנִיּוּת אַלֵיין, אוּן נִיט ווִי שִׁיטַת קֹרַח וַעֲדָתוֹ, אַז מֶען קֶען יוֹצֵא זַיְין מִיט מַעֲשֶׂה אַלֵיין, נָאר בֵּיידֶע זַאכְן מוּזְן זַיְין צוּזַאמֶען.
אוּן ווִי מֶען הָאט גֶעזֶען דִי הַנְהָגָה פוּן כְּבוֹד קְדוּשַּׁת מוֹרִי וְחָמִי אַדְמוּ"ר, דֶער בַּעַל הַשִּׂמְחָה פוּן י"ב תַּמּוּז, אַז עֶר הָאט זִיךְ מוֹסֵר נֶפֶשׁ גֶעווֶען אוֹיף בֵּיידֶע זַאכְן: עֶר הָאט גֶעלֵייגְט דִי גְרֶעסְטֶע כּוֹחוֹת, בִּיז צוּ מְסִירַת נֶפֶשׁ בְּפּוֹעֵל, אוֹיף עִנְיָנִים פוּן מַעֲשֶׂה, אַז אַ אִידִישׁ קִינְד זָאל לֶערְנֶען אַלֶ"ף בֵּי"ת; אַז אַ אִיד זָאל מְקַיֵּים זַיְין אֲפִילוּ נָאךְ אֵיין מִצְוָה (כָאטשׁ יֶענֶער אִיז נָאךְ לְגַמְרֵי נִיט גֶעווֶען שַׁיָּיךְ צוּ כַּוָּנַת הַמִּצְווֹת אוּן צוּ דֶער פְּנִימִיּוּת'דִיקֶער אוֹיסְאֵיידְלוּנְג ווָאס ווֶערְט דוּרְךְ אִיר, אוּן אֲפִילוּ פוּן מִצְווֹת בְּפּוֹעֵל אִיז עֶר נָאךְ אוֹיךְ גֶעווֶען ווַיְיט, דָאךְ הָאט זִיךְ דֶער רֶבִּי מוֹסֵר נֶפֶשׁ גֶעווֶען, אַז דֶער אִיד זָאל מְקַיֵּים זַיְין לְכָל הַפָּחוֹת אֵיין מִצְוָה); אוּן גְלַיְיכְצַיְיטִיק הָאט דֶער רֶבִּי גֶעלֵייגְט דִי גְרֶעסְטֶע כּוֹחוֹת אוּן זִיךְ מוֹסֵר נֶפֶשׁ גֶעווֶען צוּ פַארְשְׁפְּרֵייטְן תּוֹרָה, פְּנִימִיּוּת הַתּוֹרָה בִּיז צוּ עֲבוֹדַת הַתְּפִלָּה כִּדְבָעֵי.
אוּן דָאס אִיז דֶער ווֶעג ווָאס דֶער רֶבִּי הָאט אָנְגֶעווִיזְן פַאר אַלֶע ווָאס זַיְינֶען שַׁיָּיךְ צוּ אִים אוּן הוֹלְכִים בְּעִקְבוֹתָיו, אַז מֶען זָאל טָאן אִין בֵּיידֶע קַוִּים: פּוּנְקְט ווִי מֶען דַארְף טָאן אִין "הַמַּעֲשֶׂה הוּא הָעִיקָר", דַארְף מֶען אוֹיךְ זֶען, אַז דִי מַעֲשֶׂה זָאל זַיְין אַ רֵיינֶע אוּן אַן אֵיידֶעלֶע, ווָאס דָאס טוּט זִיךְ אוֹיף דוּרְךְ לִימּוּד פְּנִימִיּוּת הַתּוֹרָה אוּן עֲבוֹדַת הַתְּפִלָּה.
אוּן דוּרְךְ דֶער עֲבוֹדָה אִין בֵּיידֶע קַוִּים צוּזַאמֶען מַאכְט מֶען אַ דִירָה לוֹ יִתְבָּרֵךְ בַּתַּחְתּוֹנִים, אַ דִירָה אִין בֵּיידֶע זַאכְן: עֶס זָאל זַיְין אַ דִירָה לְעַצְמוּתוֹ אוּן אַז דֶער עֶצֶם זָאל זַיְין בְּגִילּוּי.
(משיחת ש״פ קרח תשכ"ב)
לקוטי שיחות חלק ד קרח
