לקוטי שיחות חלק כב בהר בחוקותי

מְ'הָאט שׁוֹין פִיל מָאל גֶערֶעדטא ווֶעגְן סֶדְרוֹת הַמְחוּבָּרוֹת, אַז פוּן דֶעם ווָאס מְ'אִיז זֵיי מְחַבֵּר אִין אַן אוֹפֶן אַז זֵיי ווֶערְן אֵיין סֶדְרָה

[מֶען צֶעטֵיילְט בֵּיידֶע סֶדְרוֹת אוֹיף (בְּלוֹיז) שִׁבְעָה קְרוּאִים; אוּן נָאךְ מֶער: מְ'אִיז מְחַבֵּר דֶעם סוֹף פוּן דֶער עֶרְשְׁטֶער סֶדְרָה אוּן דִי הַתְחָלָה פוּן דֶער צְווֵייטֶער סֶדְרָה אִין אֵיין עֲלִיָּהב (מִיט דֶער זֶעלְבֶּער בְּרָכָה לְפָנֶיהָ וּבְרָכָה לְאַחֲרֶיהָ)],

אִיז דֶערְפוּן מוּכָח, אַז בֵּיידֶע סֶדְרוֹת הָאבְּן אִין זִיךְ אַ נְקוּדָּה מְשׁוּתֶּפֶת בְּתוֹכְנָן, ווָאס דֶערְפַאר קֶענֶען זֵיי נִתְחַבֵּר ווֶערְן.

דַארְף מֶען פַארְשְׁטֵיין: ווָאס אִיז דִי נְקוּדָּה מְשׁוּתֶּפֶת פוּן דִי סֶדְרוֹת – "בְּהַר" אוּן "בְּחֻקֹּתַי"?

וְאַדְּרַבָּה: ווִיבַּאלד, ווִי גֶערֶעדט כַּמָּה פְּעָמִיםג, אִיז דֶער שֵׁם הַסֶּדְרָה מְרַמֵּז אוֹיף אִיר תּוֹכֶן – וְלִכְאוֹרָה, דִי נֶעמֶען "בְּהַר" אוּן "בְּחֻקֹּתַי" בְּרֶענְגֶען אַרוֹיס אַ פַארְקֶערְטְן תּוֹכֶן:

"בְּהַר" – אוֹיף אַ בַּארְג – ווַיְיזְט אוֹיף הַגְבָּהָה, ווָאס אִין עֲבוֹדָה רוּחְנִית מֵיינְט עֶס, ווָאס אַ אִיד דַארְף זִיךְ לִפְעָמִיםד פִירְן מִיט אַ "בְּרֵייטְקַיְיט" אוּן תּוֹקֶף – וַיִּגְבַּהּ לִבּוֹ בְּדַרְכֵי ה'ה ; וּלְדוּגְמָא, ווֶען עֶס קוּמְט צוּ אַ נִסָּיוֹן, דַארְף עֶר זִיךְ שְׁטֶעלְן מִיט אַ שְׁטַארְקַיְיט אוּן עַזּוּת אוֹיף נִיט נִתְפָּעֵל ווֶערְן אוּן בַּיְישְׁטֵיין דֶעם נִסָּיוֹן – "עַז כַּנָּמֵר"ו.

דַאקֶעגְן "בְּחֻקֹּתַי (תֵּלֵכוּ)" – קִיּוּם פוּן חֻקִּים – אִיז פַארְבּוּנְדְן אוּן פָאדֶערְט בִּיטּוּל; חֻקִּים אִיז מֶען מְקַיֵּים דֶערְפַאר ווָאס "חֻקָּהז חָקַקְתִּי גְּזֵרָה גָזַרְתִּי" אוּן "אֵין לְךָ רְשׁוּת לְהַרְהֵר אַחֲרֶיהָ"ח – אַזוֹי הָאט דֶער אוֹיבֶּערְשְׁטֶער גֶעהֵייסְן פָאלְגְט מֶען דֶעם צִיוּוּי (כָאטשׁ מֶען ווֵייס נִיט דֶעם טַעַם, אָדֶער נָאכְמֶער – סְ'אִיז הֵיפֶּךְ הַשֵּׂכֶל וְטַעַם).

ווֶעט מֶען עֶס פַארְשְׁטֵיין בְּהֶקְדֵּם הַבִּיאוּר אִין דֶעם שֵׁם הַסֶּדְרָה (הָרִאשׁוֹנָה) – לוֹיט מִנְהַג יִשְׂרָאֵלט (ווָאס "תּוֹרָה הִיא"י ) – "בְּהַר". דְּלִכְאוֹרָה אִיז נִיט מוּבָן:

דֶער עִיקַר הַדְגָּשָׁה אִיז דָאךְ, לִכְאוֹרָה, אִין דֶעם ווָארְט "סִינַי" – דֶער אוֹיסְגֶעטֵיילְטֶער בַּארְג אוֹיף ווֶעלְכְן סְ'אִיז גֶעגֶעבְּן גֶעווארְן תּוֹרָהיא. הָאט מֶען גֶעדַארְפְט אָנְרוּפְן דִי סֶדְרָה מִיטְן נָאמֶען "סִינַי", אָדֶער עַל כָּל פָּנִים "בְּהַר סִינַי"יב (ווִי מִיר גֶעפִינֶען בַּיי נָאךְ סֶדְרוֹתיג, אַז זֵייעֶר נָאמֶען אִיז פוּן צְווֵיי ווֶערְטֶער);

ווִי פַּאסְט דֶער נָאמֶען "בְּהַר", ווָאס זָאגְט נִיט ווֶעגְן ווֶעלְכְן הַר עֶס רֶעדט זִיךְ דָא?

דִי שְׁאֵלָה אִיז נָאךְ שְׁטַארְקֶער ווֶען מְ'רֶעדט ווֶעגְן דֶער הוֹרָאָה אִין עֲבוֹדַת ה' ווָאס מֶען דַארְף אַרוֹיסְנֶעמֶען פוּן "הַר סִינַי". חַזַ"ליד זָאגְן, אַז דֶער טַעַם ווָאס מֶען הָאט אוֹיסְגֶעקְלִיבְּן דֶעם הַר סִינַי דַוְקָא צוּ גֶעבְּן אוֹיף אִים דִי תּוֹרָה, אִיז ווַיְיל "מַכִּיךְ מִכָּל טוּרַיָּא", עֶר אִיז נִידֶערִיקֶער פוּן אַלֶע בֶּערְג – ווָאס דָאס טְרָאגְט אִין זִיךְ אַ דָבָר וְהִיפּוּכוֹטו :

פוּן אֵיין זַיְיט ווַיְיזְט עֶס ווִי עֶס דַארְף זַיְין שִׁפְלוּת, "מַכִּיךְ"; אָבֶּער פוּן דֶער צְווֵייטֶער זַיְיט אִיז אוֹיךְ סִינַי – אַ הַר. ווַיְיל אַף עַל פִּי אַז עֶס מָאנְט זִיךְ פוּן אַ אִידְן דִי תְּנוּעָה פוּן שִׁפְלוּת, טָאר עֶס נִיט זַיְין אִין אַן אוֹפֶן אַז מְ'זָאל ווֶערְן ווִי אַן "אַסְקוּפָּה הַנִּדְרֶסֶת"טז חַס וְשָׁלוֹם, נָאר צוּזַאמֶען מִיט דֶער שִׁפְלוּת דַארְף זַיְין אַ תְּנוּעָה פוּן תּוֹקֶף וְהִתְנַשְּׂאוּת (כַּנַּ"ל).

אוּן דִי צְווֵיי עִנְיָנִים זַיְינֶען דֶער חִילּוּק צְווִישְׁן דִי צְווֵיי ווֶערְטֶער "בְּהַר" אוּן "סִינַי": "בְּהַר" ווַיְיזְט אוֹיף הִתְנַשְּׂאוּת וְתוֹקֶף הָאָדָם, מַה שֶּׁאֵין כֵּן "סִינַי" אַלֵיין – נִיט אוּנְטֶערְשְׁטְרַיְיכְנְדִיק דֶערְבַּיי אַז עֶס רֶעדט זִיךְ ווֶעגְן אַ הַר – ווַיְיזְט אוֹיף עִנְיַן הַבִּיטּוּל ("סִינַי" עַל שֵׁם הַסְּנֶהיז, ווָאס סְנֶה אִיז "שָׁפֵל מִכָּל הָאִילָנוֹת שֶׁבָּעוֹלָם"יח ).

אִיז דָאךְ מוּבָן, אַז פוּן דִי צְווֵיי עִנְיָנִים (הַגְבָּהָה וּבִיטּוּל), אִיז דֶער עִיקַר מַעֲלָה – בִּיטּוּל, נָאר דֶערְבַּיי בַּאווָארְנְט מֶען, אַז עֶס טָאר נִיט זַיְין בִּיטּוּל כְּאַסְקוּפָּה הַנִּדְרֶסֶת דוּרְךְ יֶעדֶער "פוּס", נָאר עֶס מוּז זַיְין אַ תְּנוּעָה פוּן תּוֹקֶף וְהַגְבָּהָה (לִפְעָמִיםיט ). וּכְמַאֲמַר חַזַ"לכ אַז אַ תַּלְמִיד חָכָם דַארְף הָאבְּן "אֶחָד מִשְּׁמוֹנָה בַּשְּׁמִינִית" (פוּן גַּאֲוָה), אָבֶּער נִיט מֶערֶער חַס וְשָׁלוֹם.

הַיְינְט ווִי פַּאסְט צוּ אָנְרוּפְן דִי סֶדְרָה מִיטְן נָאמֶען "בְּהַר" אַלֵיין – (בְּלוֹיז) הַגְבָּהָה, אוּן אוֹיסְלָאזְן דֶעם עִיקָר – "סִינַי" וּבִיטּוּל?

אֵיינֶער פוּן דִי בִּיאוּרִים בְּזֶה:

דִי עֲבוֹדָה פוּן בִּיטּוּל "שִׁפְלוּת הָאָדָם"כא אִיז פַארְבּוּנְדְן מִיט "גַּדְלוּת הָאֵ־ל", עֶר אִיז בָּטֵל ווַיְיל עֶר פִילְט אַז דִי אֱמֶת'עֶ מְצִיאוּת פוּן אַלְץ אִיז אֱלֹקוּת.

אוּן דֶערְפַאר, אִיז דֶער אֱמֶת'ר בִּיטּוּל – ווֶען דֶער הֶעְדֵּר הַמְּצִיאוּת אִיז אוֹיף אַזוֹי פִיל, בִּיז מֶען פִילְט אֲפִילוּ נִיט אַז מְ'אִיז בָּטֵל; ווַיְיל דָאס אַלֵיין ווָאס מְ'פִילְט אַז מְ'אִיז זִיךְ מְבַטֵּל (פַארְן אוֹיבֶּערְשְׁטְן), אִיז אַ בַּאווַיְיז, אַז סְ'אִיז (נָאךְ) דָא אַ מְצִיאוּת ווָאס דַארְף בָּטֵל ווֶערְןכב. ווֶען מְ'הַאלְט בַּיי בִּיטּוּל אֲמִיתִּי, אִיז עֶר נִיט מַרְגִּישׁ (פִילְט) קֵיין זַאךְ אוֹיסֶער אֱלֹקוּת.

דָאס שְׁפִּיגְלְט זִיךְ אָפּ אִין הֲלָכָה בְּנִגְלֶה דְתוֹרָה:

מְ'הָאט שׁוֹין גֶערֶעדט אַמָאל בַּאֲרוּכָהכג אִין דֶעם חִילּוּק צְווִישְׁן אַן "עֶבֶד" אוּן אַ "שְׁלִיחַ", אַז כָאטשׁ "שְׁלוּחוֹ שֶׁל אָדָם כְּמוֹתוֹ"כד, ווָאס דָאס אִיז כּוֹלֵל (אוֹיךְ וְעִיקָר) דֶעם הֶעכְסְטְן אוֹפֶן אִין שְׁלִיחוּת, אַז דֶער שְׁלִיחַ בְּעֵת שְׁלִיחוּתוֹ ווֶערְט דִי מְצִיאוּת הַמְשַׁלֵּחַ,

[כְּיָדוּעַכה, אַז אִין עִנְיַן הַשְּׁלִיחוּת זַיְינֶען פַארַאן דְרַיי אוֹפַנִּים: א) דֶער מְשַׁלֵּחַ גִיט רְשׁוּת וְכֹחַ צוּם שְׁלִיחַ צוּ טָאן דִי פְּעוּלָּה בִּמְקוֹמוֹ, אָבֶּער דִי מַעֲשֵׂה הַשְּׁלִיחוּת אִיז זִיךְ מִתְיַיחֵס צוּם שְׁלִיחַ. ב) דִי מַעֲשֶׂה אִיז זִיךְ מִתְיַיחֵס צוּם מְשַׁלֵּחַ – עֶס הֵייסְט עֲשִׂיַּית הַמְשַׁלֵּחַ (דוּרְךְ דֶעם שְׁלִיחַ). ג) אַז (נִיט נָאר דִי עֲשִׂיַּית הַשְּׁלִיחַ אוּן זַיְין כֹּחַ הַמַּעֲשֶׂה זַיְינֶען זִיךְ מִתְיַיחֵס צוּם מְשַׁלֵּחַ, נָאר אוֹיךְ) דֶער שְׁלִיחַ גּוּפָא ווֶערְט דִי מְצִיאוּת הַמְשַׁלֵּחַ],

אַף עַל פִּי כֵן אִיז שַׁיָּיךְ צוּ אָפְּטֵיילְן דֶעם שְׁלִיחַ פוּן דֶעם מְשַׁלֵּחַ (ווָאס דֶערְפַאר זָאגְט מֶען "שְׁלוּחוֹ שֶׁל אָדָם כְּמוֹתוֹ" נָאר בְּשַׁיְיכוּת צוּם עִנְיַן הַשְּׁלִיחוּת, אָבֶּער נִיט אִין אַנְדֶערֶע עִנְיָנִים אֲפִילוּ בְּשַׁעַת מַעֲשֶׂהכו );

מַה שֶּׁאֵין כֵּן אַן עֶבֶד אִיז נִיט קֵיין מְצִיאוּת בִּפְנֵי עַצְמוֹ כְּלַל, כָּל מְצִיאוּתוֹ אִיז דִי מְצִיאוּת הָאָדוֹן. אוּן דֶערְפַאר – "מַה שֶּׁקָּנָה עֶבֶד (אַלְץ ווָאס דֶער עֶבֶד הָאט) קָנָה רַבּוֹ"כז.

ווַיְיל אַ שְׁלִיחַ אִיז אַ מְצִיאוּת בִּפְנֵי עַצְמוֹ, ווָאס אִיז זִיךְ מְבַטֵּל צוּם מְשַׁלֵּחַ, אוּן דֶערִיבֶּער אִיז אוֹיךְ בְּשַׁעַת זַיְין בִּיטּוּל בְּלַיְיבְּט אַן אָרְט פַאר זַיְין מְצִיאוּתכח ; מַה שֶּׁאֵין כֵּן אַן עֶבֶד דַארְף זִיךְ נִיט מְבַטֵּל זַיְין צוּם אָדוֹן – עֶר אִיז מִלְּכַתְּחִלָּה נָאר "רְכוּשׁוֹ וְקִנְיָנוֹ" פוּן דֶעם אָדוֹןכט, וּבְמֵילָא אִיז עֶר קֵיין מְצִיאוּת נִיט לְעַצְמוֹ כְּלַל.

דֶערְפוּן אִיז פַארְשְׁטַאנְדִיק, אַז ווֶען מֶען הַאלְט בַּיְים אֱמֶת'ן בִּיטּוּל צוּ אֱלֹקוּת, אִיז עֶס נִיט קֵיין סְתִּירָה צוּ תּוֹקֶף וְהַגְבָּהָה – ווַיְיל סְ'אִיז נִיט אַ תּוֹקֶף וְהַגְבָּהָה פוּן זַיְין מְצִיאוּת, נָאר דֶער תּוֹקֶף וְהַגְבָּהָה פוּן אֱלֹקוּתל.

וְעַל דֶּרֶךְ מַאֲמַר חַזַ"ללא בַּנּוֹגֵעַ צוּ אַן עֶבֶד – "עֶבֶד מֶלֶךְ מֶלֶךְ". ווָאס דָאס שַׁאפְט נִיט דֶעם גֶעפִיל פוּן יֵשׁוּת וְגַאֲוָה בַּיְים עֶבֶד, ווַיְיל דָאס אִיז נִיט זַיְין חֲשִׁיבוּת וְגַדְלוּת, נָאר דֶעם מֶלֶךְ'ס.

אוּן דֶערְפַאר ווֶערְט דִי סֶדְרָה אָנְגֶערוּפְן מִיטְן נָאמֶען "בְּהַר" אַלֵיין – ווַיְיל דִי שְׁלֵימוּת פוּן בִּיטּוּל אִיז, אַז זַייְעֶנְדִיק אַ "הַר" (דָאס הֵייסְט: ווֶען עֶר שְׁטֵייט מִיט אַ תּוֹקֶף וְהַגְבָּהָה), דַארְף מֶען גָארְנִיט בַּאווָארֶענֶען אַז דָא אִיז דוּרְכְאוֹיס אַ תּוֹקֶף דִּקְדוּשָּׁה (אוּן נִיט קֵיין אֵייגֶענֶע יֵשׁוּת חַס וְשָׁלוֹם); מְ'אִיז אוֹיף אַזוֹיפִיל בָּטֵל צוּ אֱלֹקוּת, אַז סְ'אִיז מֵעִיקָרָא נִיטָא קֵיין קָסַלְקָא־דַעְתָּךְ אוֹיף זַיְין מְצִיאוּת, וּבְמֵילָא דַארְף מֶען נִיט זָאגְן בְּפֵירוּשׁ אַז עֶס אִיז "(אַ) הַר (ווָאס קוּמְט ווַיְיל מְ'אִיז אִין אַן אוֹפֶן פוּן) סִינַי".

אוּן דָאס אִיז אוֹיךְ דֶער בִּיאוּר (בַּעֲבוֹדָה רוּחְנִית) פוּן דִי כַּמָּה אוֹפַנִּים ווִי מֶען קֶען מְתַאֵר זַיְין "הַר סִינַי":

בִּתְחִלַּת הָעֲבוֹדָה, ווֶען מְ'אִיז אַ מְצִיאוּת לְעַצְמוֹ, דַארְף זַיְין "סִינַי" אַלֵיין. עֶס קֶען נִיט זַיְין קֵיין עִנְיָן פוּן "הַר" וְהַגְבָּהָה, נָאר מֶער נִיט ווִי בִּיטּוּל אַלֵייןלב. ווִיבַּאלְד אַז עֶר אִיז אַ מְצִיאוּת לְעַצְמוֹ, אִיז עֶר נָאךְ נִיט שַׁיָּיךְ צוּ דֶער עֲבוֹדָה דְתוֹקֶף וְהַגְבָּהָה דִּקְדוּשָּׁה – ווַיְיל בַּיי אִים ווֶעט דָאס זַיְין תּוֹקֶף וְהַגְבָּהָה פוּן זַיְין יֵשׁוּת.

[וְיֵשׁ לוֹמַר דּוּגְמָא לְזֶה דֶער עֶרְשְׁטֶער אוֹפֶן אִין שְׁלִיחוּת; דֶער שְׁלִיחַ אִיז אַ מְצִיאוּת לְעַצְמוֹ, נָאר עֶר אִיז זִיךְ מְבַטֵּל אוּן עֶר טוּט אַ פְּעוּלָּה בְּמָקוֹם פוּן דֶעם מְשַׁלֵּחַ].

אַ הֶעכֶערֶער אוֹפֶן אִיז – "הַר סִינַי": דֶער אָדָם הָעוֹבֵד קֶען שׁוֹין הָאבְּן אַ גֶעפִיל פוּן "הַר" וְהַגְבָּהָה, ווַיְיל עֶר הַאלְט שׁוֹין בַּיי אַ בִּיטּוּל פְּנִימִי בִּיז אַז דֶער תּוֹקֶף אִיז נִיט זַיְינֶער, נָאר פוּן אֱלֹקוּת,

אָבֶּער אַף עַל פִּי כֵן מוּז עֶר נָאךְ הָאבְּן דִי בַּאווָארֶענִישׁ פוּן "סִינַי" – בִּיטּוּל – ווָאס פַארְהִיט אִים אַז עֶר זָאל נִיט אַרַיְינְפַאלְן אִין יֵשׁוּת. ווַיְיל דֶער בִּיטּוּל הָאט נָאךְ נִיט דוּרְכְגֶענוּמֶען כָּל מְצִיאוּתוֹ. עֶר הַאלְט בַּיי דֶער דַּרְגָּא ווָאס עֶר פִילְט נָאךְ ווִי עֶר אִיז זִיךְ מְבַטֵּל צוּם אוֹיבֶּערְשְׁטְן.

[וְעַל דֶּרֶךְ דִי הֶעכֶערֶע אוֹפַנִּים אִין שְׁלִיחוּתלג, אַז עֶר גִיט אִיבֶּער זַיְין כֹּחַ הַמַּעֲשֶׂה צוּם מְשַׁלֵּחַ בִּיז אַז דָאס ווֶערְט פַאררֶעכְנְט ווִי מַעֲשֵׂה הַמְשַׁלֵּחַ, אוּן נָאכְמֶער – דֶער שְׁלִיחַ גּוּפָא ווֶערְט דֶער מְשַׁלֵּחַ,

אַף עַל פִּי כֵן אִיז עֶס אַלְץ אִין אַן אוֹפֶן ווָאס מֶען קֶען אָפְּטֵיילְן דֶעם שְׁלִיחַ פוּן דֶעם מְשַׁלֵּחַ].

דֶער הֶעכְסְטֶער אוֹפֶן אִיז – "בְּהַר" אַלֵיין. דֶער בִּיטּוּל אִיז בִּשְׁלֵימוּת בִּיז אַז מֶען דַארְף נִיט דֶערְמָאנֶען אוּן בַּאווָארֶענֶעןלד אַז סְ'אִיז "סִינַי" – סְ'אִיז נִיטָא קֵיין אָרְט אוּן אֲפִילוּ אַ קָסַלְקָא־דַעְתָּךְ אוֹיף קֵיין אַנְדֶער מְצִיאוּת אוֹיסֶער אֱלֹקוּת.

אַף עַל פִּי אַז דֶער עִנְיָן פוּן "בְּהַר" אִיז גָאר אַ הוֹיכֶע דַּרְגָּא אִין בִּיטּוּללה – אִיז עֶס אָבֶּער אַ הוֹרָאָה פַאר יֶעדְן אִידְן בַּעֲבוֹדָתוֹ. ווַיְיל בַּאֲמִיתִּית הָעִנְיָן אִיז יֶעדֶער אִיד – אַ הַר, כָּל יִשְׂרָאֵל "מְלָכִים הֵם"לו.

ווֶען מֶען מָאנְט פוּן אַ אִידְן אַז עֶר זָאל הָאבְּן שְׁטַארְקַיְיט אִין אַן עִנְיָן פוּן אִידִישְׁקַיְיט, מֵיינְט עֶס נִיט אַז מֶען פַארְבּוֹיגְט חַס וְשָׁלוֹם אוֹיף זַיְין בִּיטּוּל ווַיְיל סְ'אִיז נִיטָא קֵיין אַנְדֶער בְּרֵירָה ווִי צוּ פַארְהִיטְן אִים פוּן רַע – נָאר דִי שְׁטַארְקַיְיט גּוּפָא אִיז (בִּפְנִימִיּוּת) דֶער תּוֹקֶף הַנֶּפֶשׁ הָאֱלֹקִית ווָאס אִיז אַ "חֵלֶק אֱלוֹקַה מִמַּעַל מַמָּשׁ"לז.

אַ אִיד דַארְף ווִיסְן, אַז דִי נְשָׁמָה פוּן אַ אִידְן "הָאטלח מֶען אִין גָּלוּת נִיט פַארְטְרִיבְּן אוּן אִין שִׁעְבּוּד מַלְכִיּוֹת נִיט אִיבֶּערְגֶעגֶעבְּן", אוּן "ווָאס^לח עֶס אִיז נוֹגֵעַ צוּ . . תּוֹרָה וּמִצְווֹת וּמִנְהָגֵי יִשְׂרָאֵל הָאבְּן מִיר אִידְן אוֹיף זִיךְ נִיט קֵיין דֵעָה זָאגֶער".

"דִּינָא דְמַלְכוּתָא דִּינָא"לט אוּן "אַל תִּתְגָּרֶה בְּגוֹי קָטָן"מ – אָבֶּער ווֶען עֶס קוּמְט צוּ אַן עִנְיָן פוּן אִידִישְׁקַיְיט אִיז עֶר אַ "(עֶבֶד מֶלֶךְ) מֶלֶךְ", וּבְמֵילָא אִיז – אַדְּרַבָּה: נִיט נָאר ווָאס עֶר הָאט דֶעם תּוֹקֶף פוּן אַ מֶלֶךְ, נָאר נָאךְ מֶער – עֶר טָאר גָאר נִיט מוֹחֵל זַיְין עַל כְּבוֹדוֹמא, ווַיְיל סְ'אִיז נִיט זַיְין כָּבוֹד, נָאר סְ'אִיז כְּבוֹד הַמַּלְכוּת – פוּן מֶלֶךְ מַלְכֵי הַמְּלָכִים הַקָּדוֹשׁ בָּרוּךְ הוּא, ווֶעלְכֶער זָאגְט "וְשָׁכַנְתִּי בְּתוֹכָם"מב, נַפְשׁוֹ הָאֱלֹקִית ווֶעלְכֶע אִיז חֵלֶק אֱלוֹקַה מַמָּשׁ, חֵלֶק מִן הָעֶצֶםמג.

עַל פִּי כָּל הַנַּ"ל ווֶעט מֶען אוֹיךְ פַארְשְׁטֵיין דֶעם קֶשֶׁר פוּן "בְּהַר" אוּן "בְּחֻקֹּתַי": דִי צְווֵיי תְּנוּעוֹת אִין עֲבוֹדָה (ווָאס ווֶערְן אַרוֹיסְגֶעבְּרַאכְט אִין דִי נֶעמֶען) "בְּהַר" – תּוֹקֶף וְהִתְנַשְּׂאוּת, אוּן "בְּחֻקֹּתַי" – בִּיטּוּל, זַיְינֶען נִיט בִּסְתִּירָה זוֹ לְזוֹ, נָאר אַדְּרַבָּה: אֵיינֶע קוּמְט אַלְס תּוֹצָאָה פוּן דֶער צְווֵייטֶער:

ווִי גֶערֶעדט פְרִיעֶר, אִיז דֶער תּוֹקֶף וְהִתְנַשְּׂאוּת ווֶעלְכֶער ווֶערְט גֶעמֵיינְט מִיט "בְּהַר", אַ תּוֹצָאָה פוּן בִּיטּוּל אֲמִיתִּי, אַזַא בִּיטּוּל ווָאס לָאזְט גָארְנִיט קֵיין אָרְט אוֹיף אַ קָסַלְקָא־דַעְתָּךְ בְּאוֹפֶן אַחֵר, עֶס אִיז מִלְּכַתְּחִלָּה קֵיין סָפֵק נִיטָא אַז דֶער עֶבֶד אִיז מְצִיאוּת הָאָדוֹן.

אוּן אָט דִי תְּנוּעָה פוּן בִּיטּוּל ווֶערְט אַרוֹיסְגֶעבְּרַאכְט אִין "בְּחֻקֹּתַי", אִין דֶעם קִיּוּם הַמִּצְווֹת אִין אַן אוֹפֶן פוּן "חֻקִּים":

דֶער אַלְטֶער רֶבִּימד אִיז מְבַאֵר אַז "בְּחֻקֹּתַי" אִיז (אוֹיךְ) פוּן לָשׁוֹן חֲקִיקָה (אוֹיסְגֶעקְרִיצְט). דֶער אוֹיפְטוּ פוּן אוֹתִיּוֹת הַחֲקִיקָה בַּאשְׁטֵייט אִין דֶעם, ווָאס נִיט בְּלוֹיז זַיְינֶען דִי אוֹתִיּוֹת פַארְאֵיינְצִיקְט מִיט דֶער זַאךְ אוֹיף ווֶעלְכֶער זֵיי זַיְינֶען אוֹיסְגֶעקְרִיצְט

– ווָאס דִי מַעֲלָה אִיז פַארַאן אוֹיךְ בַּיי אוֹתִיּוֹת הַכְּתִיבָה ווֶעלְכֶע זַיְינֶען אַ צוּגֶעגֶעבֶּענֶע זַאךְ צוּם קְלַף –

נָאר אַז דִי אוֹתִיּוֹת זַיְינֶען גָאר קֵיין מְצִיאוּת נִיט פַאר זִיךְ, זֵייעֶר גַאנְצֶע מְצִיאוּת אִיז נָאר דִי זַאךְ אִין ווֶעלְכֶער זֵיי זַיְינֶען אוֹיסְגֶעקְרִיצְט,

בְּדוּגְמַת ווִי דִי גַאנְצֶע מְצִיאוּת פוּן דֶעם אוֹת "אַלֶ"ף" וכו' פוּן דִי לוּחוֹת הָאֶבֶן – אִיז גֶעווֶען דֶער אֶבֶן פוּן דִי לוּחוֹת.

אוּן דָאס אִיז דֶער דִיּוּק אִין דֶעם נָאמֶען "חֻקִּים" – אֲפִילוּ לְגַבֵּי "גְּזֵרוֹת" (וְכַיּוֹצֵא בָזֶה): גְּזֵרָה מֵיינְט אַז דֶער קִיּוּם פוּן דִי מִצְווֹת ווֶערְט גֶעטָאן מִתּוֹךְ כְּפִיָּה, עֶר דַארְף זיךְ בְּרֶעכְן אוּן טָאן אַ מַעֲשֶׂה ווָאס הָאט נִיט קֵיין טַעַם;

"חֻקָּה" – ווָאס אִיז (אוֹיךְ) פוּן לְשׁוֹן חֲקִיקָה – ווַיְיזְט, אַז סְ'אִיז נִיטָא קֵיין שׁוּם כְּפִיָּה בַּיְים קִיּוּם הַמִּצְוָה. דֶער אָדָם אִיז בָּטֵל בְּתַכְלִית צוּם אוֹיבֶּערְשְׁטְן אוּן אִיז נִיט קֵיין מְצִיאוּת לְעַצְמוֹ (ווִי אוֹתִיּוֹת הַחֲקוּקוֹת אִין אַן אֶבֶן טוֹב), וּבְמֵילָא, טוּט עֶר אַלְץ ווָאס עֶס אִיז דֶער רָצוֹן הָעֶלְיוֹן.

ווָאס דָאס אִיז אוֹיךְ דֶער דִּיּוּק לְשׁוֹן חַזַ"ל^ח (בַּנּוֹגֵעַ צוּ קִיּוּם הַחֻקִּים) "אֵין לְךָ רְשׁוּת לְהַרְהֵר אַחֲרֶיהָ". ווָאס לִכְאוֹרָה הָאט גֶעדַארְפְט שְׁטֵיין "וְאַל תְּהַרְהֵר אַחֲרֶיהָ"מה ?

וְיֵשׁ לוֹמַר דֶעם בִּיאוּר בְּזֶה: "אֵין לְךָ רְשׁוּת לְהַרְהֵר אַחֲרֶיהָ" אִיז מַדְגִּישׁ, אַז בִּכְלַל דַארְף מֶען זַיְין אַ מְהַרְהֵר, צוּזַאמֶען מִיט (אָבֶּער נָאךְ דֶעם) "נַעֲשֶׂה" דַארְף זַיְין "וְנִשְׁמָע" (וְנָבִיןמו ), מְ'דַארְף ווֶעלְן פָארְשְׁן טַעֲמֵי הַמִּצְווֹת וכו', נָאר אִין דֶעם עִנְיָן – "אֵין לְךָ רְשׁוּת": דוּ הָאסְט שֵׂכֶל, אוּן דוּ דַארְפְסט עֶס נוּצְן, אָבֶּער אִין דֶעם סוּג מִצְווֹת הָאט מֶען דִיר נִיט גֶעגֶעבְּן "רְשׁוּת לְהַרְהֵר אַחֲרֶיהָ",

אוּן אוֹיךְ אִין דֶעם אִיז מֶען שׁוֹלֵל נָאר "לְהַרְהֵר":

קִיּוּם הַחֻקִּים דַארְף נִיט זַיְין אִין אַן אוֹפֶן ווָאס אִיז שׁוֹלֵל עִנְיַן הַשֵּׂכֶל הַהִתְבּוֹנְנוּת וְהַדְּרִישָׁה וְהַשְּׁאֵלָהמז וכו', נָאר אַדְּרַבָּהמח : מֶען גֶעפִינְט בְּמִדְרָשֵׁי רַזַ"ל בִּיאוּרִים ווִי חֻקִּים זַיְינֶען נִיט צִיוּוּיֵי הַשֵּׂכֶל, וְכַמָּה מֵהֶם זַיְינֶען – הֵיפֶךְ הַשֵּׂכֶל וכו'מט, נָאר אַף עַל פִּי כֵן דַארְף דֶער מֶענְטשׁ פּוֹעֵל'ן אוֹיף זַיְין שֵׂכֶל אַז עֶר זָאל נִיט מְהַרְהֵר זַיְיןנ מִלָּשׁוֹן מְהַרְהֵר אַחֲרֵי רַבּוֹ כו' הַשְּׁכִינָהנא – נִיט טְרַאכְטֶען אַז דָאס אִיז אַ חִסָּרוֹן אִין חֻקִּים לְגַבֵּי מִצְווֹת שִׂכְלִיּוֹת.

וְאַדְּרַבָּה חֻקָּה אִיז פוּן לְשׁוֹן חֲקִיקָה: ווֶען דֶער בִּיטּוּל צוּם אוֹיבֶּערְשְׁטן הָאט דֶער אִיד דֶערְגְרֵייכְט אַז עֶס אִיז בַּא עֶם אִין אַן אוֹפֶן פוּן חֲקִיקָה – סְ'אִיז נִיטָא קֵיין זַאךְ אוֹיסֶער אֱלֹקוּת (ווִי דִי אוֹתִיּוֹת הַחֲקִיקָה ווָאס זַיְינֶען אַ טֵייל פוּן אֶבֶן טוֹב) – אִיז דִי "מְצִיאוּת" הָאָדָם (זַיְין שֵׂכֶל וּמִדּוֹת כו') קֵיין סְתִּירָה נִיט צוּ זַיְין בִּיטּוּל. ווַיְיל דָאס אִיז גֶעווָארְן לְגַמְרֵי אוֹיס אֵייגֶענֶע מְצִיאוּת, נָאר דִי מְצִיאוּת פוּן אֱלֹקוּת.

דֶערְמִיט ווֶעט מֶען אוֹיךְ פַארְשְׁטֵיין דִי שַׁיְיכוּת פוּן דֶעם תּוֹכֶן (רוֹב) הַסֶּדְרָה – ווֶעגְן שְׂכַר הַמִּצְווֹת וְעוֹנְשָׁן – צוּם שֵׁם הַסֶּדְרָה "בְּחֻקֹּתַי", דְּלִכְאוֹרָה תָּמוּהַּ:

דֶער עִנְיָן פוּן חֻקִּים (בְּפַשְׁטוּת) אִיז, אַז מֶען אִיז זֵיי מְקַיֵּים בְּלוֹיז דֶערְפַאר ווָאס זֵיי זַיְינֶען צִיוּוּיֵי הַקָּדוֹשׁ בָּרוּךְ הוּא (כָאטשׁ מֶען ווֵייס נִיט זֵייעֶר טַעַם אוּן מֶען פִילְט נִיט קֵיין תּוֹעֶלֶת אִין זֵייעֶר קִיּוּם). ווִי פַּאסְן אַרַיְין דָא דִי הַתְחָלָה וְרוֹב הַסֶּדְרָה, דִי יִעוּדִים פוּן שְׂכַר הַמִּצְווֹת (אוּן לְהֵיפֶךְ – דִי עוֹנְשִׁים אוֹיף הֶעְדֵּר קִיּוּמָן) – ווָאס אִיז אַ זִירוּז אוֹיף קִיּוּם הַמִּצְווֹת מִצַּד דֶעם שְׂכַר ווָאס דֶער אָדָם בַּאקוּמְט?

אִיז דֶער בִּיאוּר אִין דֶעם: בְּשַׁעַת אַ אִיד אִיז בָּטֵל צוּם אוֹיבֶּערְשְׁטְן אִין אַן אוֹפֶן פוּן חֲקִיקָה – אַז סְ'אִיז נִיטָא קֵיין זַאךְ אוֹיסֶער אֱלֹקוּת (ווִי דִי אוֹתִיּוֹת הַחֲקִיקָה ווָאס זַיְינֶען אַ טֵייל פוּן דֶעם אֶבֶן טוֹב) – דַאן אִיז אוֹיךְ דֶער שְׂכַר הַמִּצְווֹת אַן עִנְיָן פוּן חֲקִיקָה:

דָאס ווָאס מִצְווֹת בְּרֶענְגֶען מִיט זִיךְ שְׂכַר, שַׁאפְט נִיט בַּיְים מֶענְטשְׁן אַ גֶעפִיל פוּן טָאן אַ מִצְוָה צוּלִיבּ זִיךְ אוּן זַיְין שְׂכַר וְתוֹעֶלֶת (ווָאס עֶר ווֶעט הָאבְּן טוֹב גַּשְׁמִי וְרוּחְנִי), נָאר בַּיי אִים דֶערְהֶערְט זִיךְ בְּלוֹיז דֶער "טוֹב" פוּן אֱלֹקוּת:

ווִיבַּאלְד דֶער אוֹיבֶּערְשְׁטֶער אִיז תַּכְלִית הַטּוֹב, בְּרֶענְגֶען זַיְינֶע מִצְווֹת גוּטְסְקַיְיט אִין אַלְץנב, בִּיז טוֹב גַּשְׁמִי כִּפְשׁוּטוֹ.

(משיחת ש"פ בהו"ב תש״מ)
לקוטי שיחות חלק כב בהר בחוקותי