ווֶען מֹשֶׁה רַבֵּינוּ הָאט אִיבֶּערְגֶעגֶעבְּן צוּ פַּרְעֹה דִי רֵייד פוּן דֶעם אוֹיבֶּערְשְׁטְן, אַז עֶר ווֶעט בְּרֶענְגֶען אוֹיף מִצְרַיִם דִי מַכַּת בְּכוֹרוֹת, הָאט עֶר אוֹיךְ אָנְגֶעגֶעבְּן דִי צַיְיט ווֶען דִי מַכָּה ווֶעט קוּמֶען, בַּחֲצוֹת – אִין מִיטְן דֶער נַאכְט; (נָאר צוּלִיבּ דֶעם ווָאס דִי אִצְטַגְנִינֵי (שְׁטֶערְן-זֶעעֶר) פַּרְעֹה קֶענֶען אַ טָעוּת הָאבְּן אִין דֶער פִּינְקְטְלֶעכְקַיְיט פוּן דֶער צַיְיט, הָאט מֹשֶׁה רַבֵּינוּ גֶעזָאגְט1 “כַּחֲצוֹת הַלַּיְלָה וגו’ ”, אַז דָאס ווֶעט פַּאסִירְן אַרוּם הַאלְבֶּע נַאכְט).
אִיז נִיט פַארְשְׁטַאנְדִיק: צוּלִיבּ ווָאס הָאט מֶען בִּכְלַל גֶעדַארְפְט אָנְגֶעבְּן פַּרְעֹה’ן דִי צַיְיט ווֶען מַכַּת בְּכוֹרוֹת ווֶעט זִיךְ אָנְהוֹיבְּן? עֶר הָאט דָאךְ גֶעקֶענְט זָאגְן סְתַּם – ווִי בַּיי דִי אַנְדֶערֶע מַכּוֹת – אַז דֶער אוֹיבֶּערְשְׁטֶער ווֶעט בְּרֶענְגֶען דִי מַכָּה אוֹיף מִצְרַיִם, נִיט אָנְגֶעבְּנְדִיק דֶערְבַּיי דִי צַיְיט. זֶעט מֶען דֶערְפוּן, אַז מַכַּת בְּכוֹרוֹת הָאט אַ סְפֶּעצִיעֶלֶע שַׁיְיכוּת מִיטְן זְמַן פוּן חֲצוֹת הַלַּיְלָה, אוֹיף אַזוֹיפִיל, אַז בִּכְדֵי צוּ אִיבֶּערְגֶעבְּן פַּרְעֹה’ן ווֶעגְן אָט-דֶער מַכָּה הָאט מֶען דֶערְבַּיי גֶעמוּזְט אָנְגֶעבְּן דֶעם זְמַן (מֶער נִיט צוּלִיבּ “שֶׁמָּא יִטְעוּ אִצְטַגְנִינֵי פַרְעֹה”, הָאט מֹשֶׁה גֶעזָאגְט “כַּחֲצוֹת הַלַּיְלָה וגו’ ”).
נָאךְ גֶעפִינֶען מִיר בַּיי מַכַּת בְּכוֹרוֹת, אַנְדֶערְשׁ ווִי בַּיי דִי אַלֶע אַנְדֶערֶע מַכּוֹת, א) בַּיי דֶער מַכָּה הָאבְּן דִי אִידְן גֶעדַארְפְט מַאכְן אַ בַּאזוּנְדֶערְן צֵייכְן אוֹיף זֵייעֶרֶע הַיְיזֶער – דֶעם דַּם מִילָה אוּן דַּם פוּן קָרְבַּן פֶּסַח2 “עַל שְׁתֵּי הַמְּזוּזוֹת וְעַל הַמַּשְׁקוֹף” – בִּכְדֵי דִי מַכָּה ווָאס ווֶעט קוּמֶען אוֹיף דִי מִצְרִיִּים זָאל נִיט שַׁאטְן דִי אִידְן. ב) דֶער אוֹיבֶּערְשְׁטֶער הָאט אָנְגֶעזָאגְט3: “וְאַתֶּם לֹא תֵצְאוּ אִישׁ מִפֶּתַח בֵּיתוֹ עַד בֹּקֶר”, אַז דִי גַאנְצֶע נַאכְט זָאלְן דִי אִידְן נִיט אַרוֹיסְגֵיין פוּן זֵייעֶרֶע הַיְיזֶער, ווָארוּם “מֵאַחַר שֶׁנִּתְּנָה רְשׁוּת לְמַשְׁחִית אֵינוֹ מַבְחִין בֵּין צַדִּיקִים לִרְשָׁעִים”4, ווִיבַּאלְד אַז סְ’אִיז גֶעגֶעבְּן גֶעווָארְן רְשׁוּת צוּם מַשְׁחִית, מַאכְט עֶר נִיט קֵיין אוּנְטֶערְשֵׁייד צְווִישְׁן אַ צַדִּיק אוּן אַ רָשָׁע, אוּן אוֹיךְ אִידְן הָאבְּן גֶעקֶענְט גֶעטְרָאפְן ווֶערְן פוּן דֶער מַכָּה.
וְלִכְאוֹרָה: אוֹיךְ פוּן דִי אַנְדֶערֶע מַכּוֹת הָאבְּן דִי אִידְן נִיט גֶעלִיטְן. דִי מַכּוֹת זַיְינֶען גֶעווֶען נָאר פַאר דִי מִצְרִיִּים. אִיז דָאךְ אוֹיךְ בַּיי דִי אִיבֶּערִיקֶע מַכּוֹת גֶעווֶען נִתְּנָה רְשׁוּת לְמַשְׁחִית, אוּן פוּנְדֶעסְטְווֶעגְן הָאבְּן דִי אִידְן נִיט גֶעדַארְפְט הָאבְּן קֵיין סְפֶּעצִיעֶלֶע בַּאווָארֶענִישְׁן צוּ בַּאשִׁיצְן זֵיי פוּן מַשְׁחִית – פַארְווָאס דַּוְקָא בַּיי מַכַּת בְּכוֹרוֹת הָאבְּן דִי אִידְן דָאס יָא גֶעדַארְפְט הָאבְּן? אוּן אִין ווָאס בַּאשְׁטֵייט דֶער חִילּוּק אוּן נוֹיטִיקַיְיט פוּן דִי צְווֵיי זַאכְן: א) לֹא תֵצְאוּ גו'. ב) דֶער צֵייכְן פוּן דַּם מִילָה וּפֶסַח.
דֶער חִילּוּק צְווִישְׁן מַכַּת בְּכוֹרוֹת אוּן דִי אִיבֶּערִיקֶע מַכּוֹת אִיז:
דִי אַנְדֶערֶע מַכּוֹת זַיְינֶען נִיט גֶעווֶען אִין אַזַא אוֹפֶן ווָאס קֶען הֵייסְן “נִתְּנָה רְשׁוּת לְמַשְׁחִית”. אֲפִילוּ דִי מַכּוֹת ווָאס הָאבְּן אָנְגֶערִירְט נִיט בְּלוֹיז מָמוֹנָם שֶׁל מִצְרַיִם נָאר אוֹיךְ זֵייעֶר לֶעבְּן – ווִי לְמָשָׁל עָרוֹב – אִיז דָאךְ אָבֶּער דֶער מַשְׁחִית גֶעווֶען בַּאגְרֶענִיצְט אִין דֶער הַשְׁחָתָה, עֶס הָאט זִיךְ דוּרְכְגֶעפִירְט דוּרְךְ אַ בַּאשְׁטִימְטֶע בַּאגְרֶענִיצְטֶע5 זַאךְ (צְפַרְדֵּעַ, כִּנִּים אוּן אַזוֹי ווַיְיטֶער). עֶר הָאט גֶעהַאט רְשׁוּת צוּ מַזִּיק זַיְין אָדֶער הַרְגֶ’ענֶען דִי מִצְרִיִּים נָאר אוֹיף דֶעם ווֶעג פוּן דֶער בַּאטְרֶעפְנְדֶער מַכָּה6. דֶערְפַאר אִיז דָאס נִיט “נִתְּנָה רְשׁוּת לְמַשְׁחִית”. דַאקֶעגְן בַּיי מַכַּת בְּכוֹרוֹת הָאט מֶען אִים גֶעגֶעבְּן רְשׁוּת – מֶען גֶעפִינְט נִיט קֵיינֶע הַגְבָּלוֹת אִין דֶעם אוֹפֶן ווִי צוּ טוֹיטְן דִי בְּכוֹרֵי מִצְרַיִם. אוּן ווִיבַּאלְד אַז “נִתְּנָה רְשׁוּת לְמַשְׁחִית”, הָאבְּן דִי אִידְן גֶעדַארְפְט אַ בַּאווָארֶענִישׁ, בִּכְדֵי עֶר זָאל נִיט מַזִּיק זַיְין אוֹיךְ אִידְן.
אַ טִיפֶערֶער חִילּוּק אִיז: דִי מַטָּרָה פוּן דִי מַכּוֹת אִיז בְּעִיקָר נִיט גֶעווֶען צוּ שְׁלָאגְן דִי מִצְרִיִּים, נָאר בִּכְדֵי מֶען זָאל ווִיסְן “כִּי אֲנִי הֲוָיָ’ ”, ווִי עֶס שְׁטֵייט אוֹיךְ בְּפֵירוּשׁ בַּיי אֵיינִיקֶע פוּן דִי מַכּוֹת7: “בְּזֹאת תֵּדַע וגו’ ”, “לְמַעַן תֵּדַע וגו’ ”, “בַּעֲבוּר תֵּדַע וגו’ ”. דֶערִיבֶּער הָאט מֶען דָאס נִיט גֶעדַארְפְט פַאר דִי אִידְן, ווַיְיל אִידְן הָאבְּן שׁוֹין אָן דֶעם גֶעהַאט דִי יְדִיעָה אִין אֱלֹקוּת8. אוּן אִין דֶעם גּוּפָא אִיז מְחוּלָּק מַכַּת בְּכוֹרוֹת פוּן דִי נַיְין מַכּוֹת: בַּא זֵיי אִיז דֶער גֶעשְׁלָאגֶענֶער אַלֵיין נִיט נֶאֱבָד גֶעווָארְן לְגַמְרֵי אוּן אוֹיךְ עֶר עַצְמוֹ הָאט גֶעהַאט דִי תּוֹעֶלֶת פוּן דֶער יְדִיעָה. בַּיי מַכַּת בְּכוֹרוֹת אָבֶּער אִיז גֶעווֶען וּמֵת כָּל בְּכוֹר גו’. דִי מַטָּרָה פוּן מַכַּת בְּכוֹרוֹת אִיז גֶעווֶען אוֹיךְ צוּ טוֹיטְן דִי בְּכוֹרֵי מִצְרַיִם, צוּ מְאַבֵּד זַיְין זֵיי לְגַמְרֵי – אוּן נִיט בִּכְדֵי זֵיי בְּעַצְמָם זָאלְן דוּרְךְ דֶעם ווִיסְן “כִּי אֲנִי הֲוָיָ’ ”. דֶערְפַאר הָאט מֶען דָא גֶעדַארְפְט בַּאווָארֶענֶען אַ מֶעגְלִיכֶע טַעֲנָה פוּן מִדַּת הַדִּין: “מַה נִּשְׁתַּנּוּ אֵלּוּ מֵאֵלּוּ”, מִיט ווָאס זַיְינֶען – בַּנּוֹגֵעַ צוּ דֶעם עוֹנֶשׁ (נִיט בַּנּוֹגֵעַ דֶער יְדִיעָה) – דִי אִידְן אַנְדֶערְשׁ פוּן דִי בְּכוֹרֵי מִצְרַיִם, ווַיְיל אוֹיךְ דִי אִידְן אִין מִצְרַיִם זַיְינֶען גֶעווֶען פַארְזוּנְקֶען אִין קְלִיפָּה9, “אֵלּוּ עוֹבְדֵי עֲבוֹדָה זָרָה וכו’ ”10; אוּן דֶערִיבֶּער אִיז גֶעווֶען אַן אָרְט, אַז דֶער שְׁלִיחַ פוּן מִדַּת הַדִּין, דֶער מַשְׁחִית, זָאל נִיט לָאזְן אוּנְטֶערְשֵׁיידְן צְווִישְׁן דִי מִצְרִיִּים אוּן אִידְן.
(הֲגַם סְ’שְׁטֵייט11: “וְעָבַרְתִּי וגו’ וְהִכֵּיתִי כָל בְּכוֹר וגו’ אֶעֱשֶׂה שְׁפָטִים אֲנִי הֲוָיָ’ ” – אוּן דִי חַזַ”ל12 לֶערְנֶען דֶערְפוּן אַרוֹיס: “אֲנִי וְלֹא מַלְאָךְ וכו’ אֲנִי הוּא וְלֹא אַחֵר”, אַז דִי מַכַּת בְּכוֹרוֹת הָאט דֶער אוֹיבֶּערְשְׁטֶער אַלֵיין גֶעבְּרַאכְט אוֹיף מִצְרַיִם, פוּנְדֶעסְטְווֶעגְן, אִיז דֶער מַשְׁחִית אוֹיךְ גֶעווֶען דֶערְבַּיי אוּן גֶעקָאנְט מְקַטְרֵג זַיְין13, אוּן צוּלִיבּ דֶעם הָאבְּן גֶעדַארְפְט זַיְין דִי בַּאווָארֶענִישְׁן, אַז דֶער מַשְׁחִית זָאל נִיט הָאבְּן קֵיין צוּטְרִיט).
אִין דֶעם אִיז גֶעווֶען צְווֵיי עִנְיָנִים: א) בִּכְלַל אִין אֶרֶץ מִצְרַיִם אִיז גֶעווֶען "נִתְּנָה רְשׁוּת", אָן הַגְבָּלוֹת – הֶעלְפְט נִיט קֵיין אוֹת, ווַיְיל אֵינוֹ מַבְחִין כו' אַלֶע גְלַיְיךְ – אִיז דִי עֵצָה נָאר לֹא תֵצְאוּ גו'. ב) אִין דִי הַיְיזֶער פוּן דִי אִידְן, ווָאס בַּיי דֶעם אִיז גֶעווֶען אַ הַגְבָּלָה14 "וּפָסַחְתִּי עֲלֵיכֶם", אִיךְ ווֶעל אִיבֶּערְשְׁפְּרִינְגֶען אִיבֶּער אַיְיךְ – אִיז דָאךְ נִיטָא דֶער רְשׁוּת לְמַשְׁחִית – בְּמֵילָא קֶען זַיְין הַבְחָנָה, אַן אוּנְטֶערְשֵׁייד צְווִישְׁן אִידְן אוּן מִצְרַיִם. אוּן דֶער אוּנְטֶערְשֵׁייד אִיז פַארְבּוּנְדְן מִיט דֶעם אוֹת.
עֶס אִיז אָבֶּער נָאךְ אַלְץ נִיט מוּבָן: ווִיבַּאלד אַז דִי טַעֲנָה פוּן מִדַת הַדִין, "מַה נִּשְׁתַּנּוּ אֵלּוּ מֵאֵלּוּ", הָאט גֶעהַאט אַן אָרט, איז ווי אַזוֹי הָאט דֶער "אוֹת" גֶעקֶענְט בַּאשִׁיצְן דִי אִידְן פוּן דֶער טַעֲנָה אוּן פוּן אִיר תּוֹצָאָה – מַכַּת בְּכוֹרוֹת? דֶער עֶנְטְפֶער אוֹיף דֶעם אִיז, אַז מַכַּת בְּכוֹרוֹת אִיז גֶעקוּמֶען פוּן אַזַא מַדְרֵיגָה אִין אֱלֹקוּת – "הַקָּדוֹשׁ בָּרוּךְ הוּא בִּכְבוֹדוֹ וּבְעַצְמוֹ" – ווָאס אִיז אִינְגַאנְצְן הֶעכֶער פוּן הִשְׁתַּלְשְׁלוּת, לְמַעְלָה פוּן מִדַּת הַדִּין אוּן בְּמֵילָא אִיז דַאמָאלְסְט לְגַמְרֵי קֵיין אָרְט נִיטָא פַאר טַעֲנוֹת פוּן מִדַּת הַדִּין. טַעֲנוֹת פוּן שֵׂכֶל קֶענֶען תּוֹפֵס מָקוֹם זַיְין אִין דִי מַדְרֵיגוֹת פוּן סֵדֶר הִשְׁתַּלְשְׁלוּת ווָאס זֵיי זַיְינֶען גֶעמָאסְטְן אוּן בַּאגְרֶענֶעצְט. אָבֶּער הֶעכֶער פוּן סֵדֶר הִשְׁתַּלְשְׁלוּת, ווָאס אִיז גֶעווֶען בְּשַׁעַת מַכַּת בְּכוֹרוֹת, אִיז דָארְט נִיט שַׁיָּיךְ קֵיין שֵׂכֶל'דִיקֶע טַעֲנוֹת.
אוּן דָאס אִיז דֶער בִּיאוּר אוֹיף דֶעם ווָאס מַכַּת בְּכוֹרוֹת אִיז גֶעווֶען בַּחֲצוֹת הַלַּיְלָה דַּוְקָא, ווַיְיל פּוּנְקְט אִין דֶער רֶגַע פוּן חֲצוֹת הַלַּיְלָה אִיז מֵאִיר דֶער אוֹר שֶׁלְּמַעְלָה מֵהִשְׁתַּלְשְׁלוּת, ווָאס דֶערְפַאר קֶען דִי רֶגַע מְחַבֵּר זַיְין דִי בֵּיידֶע הַאלְבֶּע נֶעכְט – חֶסֶד אוּן גְּבוּרָה. דִי עֶרְשְׁטֶע הַאלְבֶּע נַאכְט אִיז דֶער זְמַן פוּן מִדַּת הַגְּבוּרָה, ווָאס דֶערְפַאר זֶעעֶן מִיר, אַז דַאן ווֶערְט ווָאס ווַיְיטֶער אַלְץ פִינְסְטֶערֶער; דִי צְווֵייטֶע הַאלְבֶּע נַאכְט אִיז מֵאִיר מִדַּת הַחֶסֶד, אוּן דֶערִיבֶּער הוֹיבְּט דַאן אָן ווֶערְן אַלְץ לִיכְטִיקֶער אוּן לִיכְטִיקֶער – אוּן דִי רֶגַע פוּן חֲצוֹת פַארְאֵיינִיקְט בֵּיידֶע קֶעגְנְזַאצְן פוּן חֶסֶד אוּן גְּבוּרָה, ווַיְיל אִין אִיר אִיז מֵאִיר דֶער אוֹר ווָאס אִיז הֶעכֶער פוּן הִשְׁתַּלְשְׁלוּת. וְכַיָּדוּעַ, אַז דֶער ווָאס אִיז מְחַבֵּר צְווֵיי עִנְיָנִים הָפְכִיִּים מוּז עֶר אַלֵיין זַיְין הֶעכֶער פוּן בֵּיידֶע הַגְבָּלוֹת15.
דָאס מֵיינְט, אַז בַּיי מַכַּת בְּכוֹרוֹת הָאט מֵאִיר גֶעווֶען דִי עַצְמִיּוּת’דִיקֶע אַהֲבָה פוּן דֶעם אוֹיבֶּערְשְׁטְן צוּ אִידְן, אַזַא אַהֲבָה ווָאס אִיז הֶעכֶער פוּן אַלֶע טַעֲמִים אוּן אַלֶע חֶשְׁבּוֹנוֹת. אוּן מִצַּד דֶער אַהֲבָה עַצְמִית, אִיז אֲפִילוּ ווֶען שֵׂכֶל פְרֶעגְט “מַה נִּשְׁתַּנּוּ אֵלּוּ מֵאֵלּוּ”, “הֲלֹא אָח עֵשָׂו לְיַעֲקֹב”16 – זֵיי זַיְינֶען דָאךְ בֵּיידֶע גְלַיְיךְ – זָאגְט אָבֶּער דֶער אוֹיבֶּערְשְׁטֶער: “וָאֹהַב אֶת יַעֲקֹב וְאֶת עֵשָׂו שָׂנֵאתִי,” עֶר הָאט לִיבּ אִידְן – ווַיְיל זֵיי זַיְינֶען זַיְינֶע קִינְדֶער, “בָּנִים אַתֶּם לַה’ אֱלֹקֵיכֶם”17, אוּן דִי אַהֲבָה פוּן אַ פָאטֶער צוּ קִינְדֶער אִיז אַן עַצְמִיּוּת’דִיקֶע אַהֲבָה ווָאס קֶען נִיט אָפְּגֶעפְרֶעגְט אוּן נִיט אָנְגֶערִירְט ווֶערְן פוּן קֵיין שׁוּם שֵׂכֶל’דִיקְן טַעַם אוּן טַעֲנָה.
דֶערְפַאר הָאט מֹשֶׁה רַבֵּינוּ גֶעדַארְפְט דֶערְמָאנֶען פַאר פַּרְעֹה'ן דִי צַיְיט ווֶען מַכַּת בְּכוֹרוֹת ווֶעט קוּמֶען, "כַּחֲצוֹת הַלַּיְלָה", צוּ מְרַמֵּז זַיְין אַז דָאס ווֶעט זַיְין אַ גִילּוּי פוּן לְמַעְלָה מֵהִשְׁתַּלְשְׁלוּת. ווָארוּם אָן דֶעם רֶמֶז אוֹיף דֶעם הֶעכֶערְן אוֹר ווָאלְט פַּרְעֹה וְחַרְטוּמָּיו נִיט גֶעקֶענְט גְלוֹיבְּן, אַז אַ מַכָּה, ווָאס אִיר מַטָּרה אִיז צוּ מְאַבֵּד זַיְין קְלִיפָּה, אוּן אִין דֶער צַיְיט ווָאס "נִתְּנָה רְשׁוּת לְמַשְׁחִית", זָאל נִיט אָנְרִירְן דִי אִידְן, כָאטשׁ "לֹא נִשְׁתַּנּוּ אֵלּוּ מֵאֵלּוּ". צוּלִיבּ דֶעם הָאט מֹשֶׁה רַבֵּינוּ גֶעזָאגְט "כַּחֲצוֹת הַלַּיְלָה", אַן אוֹר – הֶעכֶער פוּן הִשְׁתַּלְשְׁלוּת.
עֶס הָאט אָבֶּער גֶעמוּזְט זַיְין אַז אִידְן זָאלְן הָאבְּן אַן אוֹת. דֶער בִּיאוּר אִין דֶעם:
אַלֶע גֶ-טְלֶעכֶע הַמְשָׁכוֹת ווָאס קוּמֶען מִלְמַעְלָה ווֶערְן נִמְשָׁךְ נָאר דוּרְךְ דֶער עֲבוֹדָה פוּן אִידְן דָא לְמַטָּה. אוֹיךְ דִי גִילּוּיִים פוּן לְמַעְלָה מֵהִשְׁתַּלְשְׁלוּת, בִּיז דֶער אַהֲבָה עַצְמִית פוּן דֶעם אוֹיבֶּערְשְׁטְן צוּ אִידְן, מוּז מֶען דֶערְצוּ הָאבְּן עֲבוֹדָה – הֲגַם אַז זַייְעֶנְדִיק אַן עַצְמִיּוּת'דִיקֶע אַהֲבָה, אִיז זִי דָאךְ אַלֶע מָאל גַאנְץ, פוּנְדֶעסְטְווֶעגְן פָאדֶערְט זִיךְ עֲבוֹדָה לְמַטָּה בִּכְדֵי דִי אַהֲבָה זָאל זַיְין בְּגִילּוּי (אוּן זָאל נִתְקַבֵּל ווֶערְן בִּפְנִימִיּוּת) לְמַטָּה. אָבֶּער, דִי עֲבוֹדָה מוּז זַיְין עֶנְלֶעךְ צוּ דֶער הַמְשָׁכָה – אַן עֲבוֹדָה הֶעכֶער פוּן טַעַם וָדַעַת, דָאס הֵייסְט הֶעכֶער פוּן הִשְׁתַּלְשְׁלוּת כֹּחוֹת פְּנִימִיִּים בַּיי דֶעם אִידְן.
דֶערְפַאר אִיז אוֹיךְ דֶער צֵייכְן אוֹיף דִי אִידִישֶׁע הַיְיזֶער אִין דֶער נַאכְט פוּן מַכַּת בְּכוֹרוֹת בַּאשְׁטַאנֶען – דַּם מִילָה אוּן דַּם פֶּסַח, ווַיְיל זֵיי הָאבְּן אוֹיסְגֶעדְרִיקְט דֶעם פַארְבּוּנְד פוּן אִידְן מִיט דֶעם אוֹיבֶּערְשְׁטְן אִין אַן אוֹפֶן פוּן לְמַעְלָה מִטַּעַם וָדַעַת: דֶער כְּרִיתַת בְּרִית פוּן אַ אִידְן מִיט דֶעם אוֹיבֶּערְשְׁטְן דוּרְךְ מִצְוַת מִילָה אִיז אַ פַארְבּוּנְד ווָאס אִיז הֶעכֶער פוּן שֵׂכֶל (ווִי מִיר זֶעעֶן עֶס פוּן דֶעם ווָאס דִי מִצְוָה אִיז צוּ מָל זַיְין אַ אִידִישׁ קִינְד צוּ אַכְט טֶעג ווֶען עֶר אִיז נָאךְ לְגַמְרֵי נִיט קֵיין בַּר-שֵׂכֶל)18; אַזוֹי אִיז אוֹיךְ דִי מִצְוָה פוּן קָרְבַּן פֶּסַח גֶעווֶען דֶעמָאלְט אִין אַן אוֹפֶן פוּן מְסִירַת נֶפֶשׁ, הֶעכֶער פַאר טַעַם וָדַעַת, ווַיְיל דִי שֶׁעפְּסְן פַאר דֶעם קָרְבַּן פֶּסַח זַיְינֶען גֶעווֶען “תּוֹעֲבַת מִצְרַיִם”, דִי עֲבוֹדָה זָרָה פוּן מִצְרַיִם, אוּן דִי אִידְן הָאבְּן גֶענוּמֶען דֶעם שֶׁעפְּס, אִים גֶעהַאלְטְן פִיר טֶעג פַאר דִי אוֹיגְן פוּן דִי מִצְרִיִּים, אוּן גֶעזָאגְט אָפְן אַז זֵיי גֵייעֶן אִים שֶׁחְטְ’ן אוּן מַקְרִיב זַיְין פַאר דֶעם אוֹיבֶּערְשְׁטְן. אִיז דָאךְ דָאס אַן עֲבוֹדָה פוּן מְסִירַת נֶפֶשׁ בְּפּוֹעֵל.
אוּן דִי עֲבוֹדָה פוּן מְסִירַת נֶפֶשׁ בְּגִילּוּי, לְמַעְלָה מִטַּעַם וָדַעַת פוּן אִידְן, הָאט אוֹיךְ מִלְמַעְלָה אַרוֹיסְגֶערוּפְן בְּגִילּוּי דִי אַהֲבָה עַצְמִית לְמַעְלָה מִטַּעַם וָדַעַת, ווָאס דָאס אִיז דֶער גִּילּוּי פוּן חֲצוֹת הַלַּיְלָה.
דֶערְמִיט ווֶעט מֶען אוֹיךְ פַארְשְׁטֵיין דִי שַׁיְיכוּת פוּן דִי מַאֲמָרֵי חַזַ"ל בַּנּוֹגֵעַ דֶעם זְכוּת אִין ווֶעלְכְן אִידְן זַיְינֶען אוֹיסְגֶעלֵייזְט גֶעווָארְן פוּן מִצְרַיִם. אַמָאל זָאגְן חַזַ"ל19: "בִּזְכוּת הָאֱמוּנָה נִגְאֲלוּ אֲבוֹתֵינוּ מִמִּצְרַיִם", אַז דִי גְּאוּלָּה אִיז גֶעווֶען אִין זְכוּת פוּן דֶער אֱמוּנָה פוּן אִידְן אִין בְּשׂוֹרַת הַגְּאוּלָּה ("וַיַּאֲמֵן הָעָם וַיִּשְׁמְעוּ כִּי פָקַד ה' ")20, אוּן אַמָאל זָאגְן חַזַ"ל21 אַז זֵיי זַיְינֶען נִגְאָל גֶעווָארְן בִּזְכוּת דִי צְווֵיי דָמִים, דַּם פֶּסַח אוּן דַּם מִילָה, ("בְּדָמַיִךְ חֲיִי וגו' ")22. ווַיְיל דִי בֵּיידֶע עִנְיָנִים, סַיי אֱמוּנָה אוּן סַיי דִי דָמִים פוּן פֶּסַח אוּן מִילָה, זַיְינֶען הֶעכֶער פוּן טַעַם וָדַעַת.
אֱמוּנָה בִּכְלַל אִיז הֶעכֶער פַאר שֵׂכֶל אוּן בִּפְרַט דִי אֱמוּנָה פוּן אִידְן אִין דֶער גְּאוּלָּה זַייְעֶנְדִיק אִין גָּלוּת מִצְרַיִם. עַל פִּי טֶבַע אִיז גֶעווֶען אוּממֶעגְלֶעךְ אַז דִי אִידְן זָאלְן קֶענֶען בַּאפְרַיְיט ווֶערְן פוּן מִצְרַיִם, ווָארוּם “לֹא הָיָה עֶבֶד יָכוֹל לִבְרוֹחַ מִמִּצְרַיִם”23 – אֲפִילוּ אֵיין קְנֶעכְט הָאט פוּן דָארְט נִיט גֶעקֶענְט אַנְטְלוֹיפְן – אוּן מִכָּל-שֶׁכֵּן שִׁשִּׁים רִבּוֹא. דֶערְצוּ אִיז גְרִינְג צוּ פָארְשְׁטֶעלְן זִיךְ ווִי דִי אִידְן זַיְינֶען דַאן גֶעווֶען צֶעבְּרָאכְן פוּן קוֹשִׁי הַגָּלוּת וְהַשִּׁעְבּוּד בִּכְלַל, אוּן גָאר בַּאזוּנְדֶער דִי צֶעבְּרָאכְנְקַיְיט אוּן יִסּוּרִים פוּן גְּזֵירַת פַּרְעֹה אוֹיף דִי קְלֵיינֶע קִינְדֶער (ווָאס דִי טֶבַע בְּנֵי אָדָם אִיז צוּ מְווַתֵּר זַיְין אוֹיף אַלְץ, אַבִּי עֶס זָאל חַס וְשָׁלוֹם נִיט שַׁאטְן זַיְינֶע קִינְדֶער אוּן סְפֶּעצִיעֶל קְלֵיינֶע קִינְדֶער). אוּן נִיט קוּקְנְדִיק אוֹיף זֵייעֶר גְרוֹיסֶער צֶעבְּרָאכְנְקַיְיט, אוּן זֵייעֶר שְׁטְרֶענְגֶער אָפְּגֶעשְׁלָאסְנְקַיְיט אִין שְׁווֶערְן גָּלוּת פוּן מִצְרַיִם, הָאבְּן דִי אִידְן גֶעגְלוֹיבְּט מִיט אַן אֱמוּנָה פְּשׁוּטָה אִין דֶער בְּשׂוֹרַת הַגְּאוּלָה פוּן מֹשֶׁה רַבֵּינוּ, אַז דֶער אוֹיבֶּערְשְׁטֶער ווֶעט זֵיי בַּאפְרַייְעֶן אוּן אַרוֹיסְנֶעמֶען פוּן גָּלוּת.
הָאט דִי אֱמוּנָה פְּשׁוּטָה ווָאס אִיז לְמַעְלָה מִטַּעַם וָדַעַת אַרוֹיסְגֶערוּפְן אוֹיךְ לְמַעְלָה דִי אַהֲבָה עַצְמִית ווָאס הֶעכֶער פוּן טַעַם וָדַעַת, הֲגַם עַל פִּי שֵׂכֶל הָאט גֶעקֶענְט זַיְין אַ טַעֲנָה: "מַה נִּשְׁתַּנּוּ אֵלּוּ מֵאֵלּוּ". אָבֶּער, כַּנַּ"ל, בִּכְדֵי אַז דִי אַהֲבָה עַצְמִית, פוּן לְמַעְלָה מֵהִשְׁתַּלְשְׁלוּת, זָאל אַרָאפְּקוּמֶען אוּן ווִירְקְן דוּרְךְ סֵדֶר הִשְׁתַּלְשְׁלוּת, בִּיז עֶס זָאל פוּן אִיר קֶענֶען זַיְין בְּפּוֹעֵל מַמָּשׁ לְמַטָּה גְּאוּלַּת יִשְׂרָאֵל, הָאט אוֹיךְ בַּיי דִי אִידְן זֵייעֶר עַצְמִיּוּת'דִיקֶער פַארְבּוּנְד מִיט דֶעם אוֹיבֶּערְשְׁטְן גֶעדַארְפְט אַרָאפְּקוּמֶען בְּגִילּוּי אוּן ווִירְקְן אוֹיף זֵייעֶרֶע כֹּחוֹת פְּנִימִיִּים בִּיז אִין אַן עִנְיָן שֶׁל פּוֹעֵל. אוּן דָאס הָאבְּן דִי אִידְן גֶעטָאן דוּרְךְ זֵייעֶר עֲבוֹדָה אִין מִצְוַת פֶּסַח אוּן מִצְוַת מִילָה – דֶער פַארְבּוּנְד פוּן לְמַעְלָה מִן הַשֵּׂכֶל דוּרְכְגֶעפִירְט אִין עֲשִׂיָּה בְּפּוֹעֵל.
אוֹיפְן פָּסוּק "וַיְהִי בַּחֲצִי הַלַּיְלָה" בְּרֶענְגְט דִי מְכִילְתָּא צְווֵיי דֵעוֹת: א) "יוֹצְרוֹ חִלְּקוֹ" (דֶער בַּאשֶׁעפֶער הָאט דִי נַאכְט צֶעטֵיילְט); ב) "יוֹדֵעַ עִתּוֹתָיו וְשָׁעוֹתָיו הוּא חִלְּקוֹ" (דֶער ווָאס ווֵייסְט זַיְינֶע צַיְיטְן אוּן זַיְינֶע שָׁעוֹת הָאט צֶעטֵיילְט דִי נַאכְט). אוּן דֶער רַדְבַּ"ז אִיז מְבַאֵר24 דֶעם אוּנְטֶערְשֵׁייד פוּן דִי בֵּיידֶע דֵעוֹת: לוֹיט דֶער עֶרְשְׁטֶער דֵעָה הָאט דֶער אוֹיבֶּערְשְׁטֶער, ווָאס עֶר אִיז דֶער בַּאשֶׁעפֶער פוּן דֶער נַאכְט, אָפְּגֶעשְׁטֶעלְט אוֹיף אַ קוּרְצֶע ווַיְילֶע דֶעם גַּלְגַּל (דֶעם אַרוּמְקְרַיְיז פוּן צְבָא הַשָּׁמַיִם), מְבַטֵּל גֶעווֶען דֶעם עִנְיָן פוּן זְמַן, אוּן דָאס הָאט אָפְּגֶעטֵיילְט, אוֹיף אַ קֶענְטִיקְן אוֹפֶן, דִי עֶרְשְׁטֶע הַאלְבֶּע נַאכְט פוּן דֶער צְווֵייטֶער; לוֹיט דֶער צְווֵייטֶער דֵעָה הָאט מֶען דָא קֵיין נֵס נִיט גֶעדַארְפְט, נָאר דֶער אוֹיבֶּערְשְׁטֶער, ווָאס עֶר אִיז "יוֹדֵעַ עִתּוֹתָיו וְשָׁעוֹתָיו", הָאט עֶר מְצַמְצֵם אוּן מְכַוֵּן גֶעווֶען צוּ דֶער גֶענוֹיעֶר הַאלְבֶּער נַאכְט – הֲגַם אַז אַ מֶענְטשׁ קֶען עֶס נִיט בַּאווַיְיזְן – אוּן אִין אָט-דֶעם פִּינְקְטְלֶעכְן מָאמֶענְט הָאט עֶר גֶעשְׁלָאגְן דִי בְּכוֹרֵי מִצְרַיִם. ווָאס אִיז דֶער חִילּוּק בִּפְנִימִיּוּת פוּן דִי צְווֵיי דֵעוֹת? וּבְיִחוּד: צוּלִיבּ ווָאס הָאט מֶען גֶעדַארְפְט דֶעם נֵס פוּן יוֹצְרוֹ חִלְּקוֹ?
דֶער בִּיאוּר פוּן דִי בֵּיידֶע דֵעוֹת:
דָאס אִיז גֶעווִיס, אַז דִי הַמְשָׁכָה אִין דֶער צַיְיט פוּן מַכַּת בְּכוֹרוֹת אִיז גֶעקוּמֶען פוּן אַן אָרְט ווָאס אִיז הֶעכֶער פוּן הִשְׁתַּלְשְׁלוּת, ווִי פְרִיעֶר גֶערֶעדט בַּאֲרִיכוּת. דִי דֵעוֹת טֵיילְן זִיךְ אָבֶּער פַאנַאנְדֶער, אִין ווָאס פַאר אַן אוֹפֶן אִיז דִי הַמְשָׁכָה אַרָאפְּגֶעקוּמֶען לְמַטָּה. לוֹיט דֶער דֵעָה אַז “יוֹצְרוֹ חִלְּקוֹ”, אִיז אוֹיךְ לְמַטָּה דִי הַמְשָׁכָה גֶעווֶען בְּגִילּוּי אִין אַן אוֹפֶן פוּן לְמַעְלָה מִן הַטֶּבַע אוּן לְמַעְלָה מִן הַזְּמַן, ווַיְיל טֶבַע אוּן זְמַן זַיְינֶען נִיט קֵיין כֵּלִים צוּ אַזַא אוֹר שֶׁלְּמַעְלָה מֵהִשְׁתַּלְשְׁלוּת, הָאט דֶערִיבֶּער דֶער אוֹיבֶּערְשְׁטֶער אָפְּגֶעשְׁטֶעלְט דֶעם גַּלְגַּל, מְבַטֵּל גֶעווֶען זְמַן אוּן טֶבַע. לוֹיט דֶער צְווֵייטֶער דֵעָה, אִיז עֶס נִיט גֶעווֶען קֵיין בִּיטּוּל הַטֶּבַע, נָאר דִי הַמְשָׁכה פוּן לְמַעְלָה מֵהִשְׁתַּלְשְׁלוּת אִיז נִמְשָׁךְ אוּן נִתְגַּלֶּה גֶעווָארְן אִין דִי לְבוּשִׁים פוּן טֶבַע (עַל דֶּרֶךְ ווִי סְ’אִיז גֶעווֶען בַּיי דֶעם נֵס פוּן פּוּרִים). אוּן אִין דֶעם צְווֵייטְן אוֹפֶן אִיז פַארַאן אַ בַּאזוּנְדֶער מַעֲלָה, ווָאס טֶבַע גוּפָא אִיז דֶערְהוֹיבְּן גֶעווָארְן – טֶבַע אִיז גֶעווָארְן אַ כְּלִי צוּ לְמַעְלָה מִן הַטֶּבַע.
ווִיבַּאלְד אַז “אֵלּוּ וָאֵלּוּ דִּבְרֵי אֱלֹקִים חַיִּים”, זַיְינֶען אִין דֶעם גִּילּוּי פוּן חֲצִי הַלַּיְלָה גֶעווֶען בֵּיידֶע מַעֲלוֹת (נָאךְ הֶעכֶער ווִי אִין נֵס פוּן פּוּרִים): דֶער אוֹר שֶׁלְּמַעְלָה מֵהִשְׁתַּלְשְׁלוּת הָאט זִיךְ אָנְגֶעטָאן אִין טֶבַע אִין אַ פְּנִימִיּוּת (“יוֹדֵעַ עִתּוֹתָיו וְשָׁעוֹתָיו”), דֶער אוֹר הָאט אָבֶּער אוֹיךְ מֵאִיר גֶעווֶען דוּרְךְ טֶבַע בְּגִילּוּי (יוֹצְרוֹ חִלְּקוֹ).
דֶער טַעַם דֶערְפוּן אִיז: מַכַּת בְּכוֹרוֹת, דִי לֶעצְטֶע מַכָּה, אִיז גֶעווֶען דֶער אָנְהוֹיבּ פוּן יְצִיאַת מִצְרַיִם. ווָאס דֶער תַּכְלִית פוּן יְצִיאַת מִצְרַיִם אִיז מַתַּן תּוֹרָה, ווִי עֶס שְׁטֵייט25: “בְּהוֹצִיאֲךָ אֶת הָעָם מִמִּצְרַיִם תַּעַבְדוּן אֶת הָאֱלֹקִים עַל הָהָר הַזֶּה”, אוּן דֶער עִנְיָן פוּן מַתַּן תּוֹרָה אִיז דָאךְ צוּ מְחַבֵּר זַיְין מַעְלָה אוּן מַטָּה26, דֶער חִיבּוּר פוּן אֱלֹקוּת שֶׁלְּמַעְלָה מֵהַטֶּבַע מִיט טֶבַע, דֶערִיבֶּער אִיז אוֹיךְ בְּשַׁעַת מַכַּת בְּכוֹרוֹת גֶעווֶען דֶער גָּלוּי’דִיקֶער חִיבּוּר פוּן מַעְלָה מִיט מַטָּה דוּרְךְ בֵּיידֶע עִנְיָנִים צוּזַאמֶען – “יוֹצְרוֹ” אוּן “יוֹדֵעַ עִתּוֹתָיו וְשָׁעוֹתָיו”.
ווָאס דָאס הָאט מֶען אוֹיךְ גֶעזֶען בַּיי יְצִיאַת מִצְרַיִם בִּכְלַל: אוֹיךְ נָאךְ דֶער גְּאוּלָּה פוּן מִצְרַיִם אִיז דָאס לַאנְד מִצְרַיִם נִיט בָּטֵל גֶעווָארְן, זִי אִיז פַארְבְּלִיבְּן אַ מְלוּכָה אוֹיךְ שְׁפֶּעטֶער. אוּן פוּנְדֶעסְטְווֶעגְן, אִין דֶער זֶעלְבֶּער צַיְיט ווֶען מִצְרַיִם אִיז גֶעווֶען בְּתָקְפָּהּ אוּן "לֹא הָיָה עֶבֶד יָכוֹל לִבְרוֹחַ מִמִּצְרַיִם", זַיְינֶען אַרוֹיסְגֶעגַאנְגֶען שִׁשִּׁים רִבּוֹא, וֹיסֶער פְרוֹיעֶן אוּן קִינְדֶער – אוּן דָאס אִיז גֶעווֶען "בְּיָד רָמָה".
ווִי גֶעזָאגְט פְרִיעֶר, אִיז דֶער גִּילּוּי שֶׁלְּמַעְלָה מֵהִשְׁתַּלְשְׁלוּת בְּשַׁעַת יְצִיאַת מִצְרַיִם גֶעקוּמֶען דוּרְךְ דַּם מִילָה אוּן דַּם פֶּסַח. ווִיבַּאלְד אַז אִין דֶעם גִּילּוּי פוּן חֲצוֹת אִיז גֶעווֶען בְּגָלוּי דִי הִתְכַּלְלוּת פוּן מַעְלָה מִיט מַטָּה, מוּז מֶען זָאגְן, אַז אוֹיךְ דִי עֲבוֹדָה פוּן אֱמוּנָה אוּן מְסִירַת נֶפֶשׁ לְמַעְלָה מִטַּעַם וָדַעַת דוּרְךְ דַּם מִילָה וְדַם פֶּסַח אִיז גֶעווֶען אִין אַזַא אוֹפֶן, ווָאס הָאט דוּרְכְגֶענוּמֶען אוֹיךְ דִי כֹּחוֹת פְּנִימִיִּים, בִּיז צוּ דִי גָאר נִידֶערִיקְסְטֶע עִנְיָנִים27, ווָאס דֶערִיבֶּער הָאט עֶס אוֹיךְ לְמַעְלָה גֶע’פּוֹעֵלְ’ט, אַז דֶער גִּילּוּי שֶׁלְּמַעְלָה מֵהִשְׁתַּלְשְׁלוּת הָאט דוּרְכְגֶענוּמֶען אוֹיךְ דִי לְבוּשֵׁי הַטֶּבַע.
דִי עֲבוֹדָה פוּן בְּרִית מִילָה, ווִי שׁוֹין גֶערֶעדט בַּאֲרִיכוּת28, אִיז צוּ דוּרְכְנֶעמֶען דֶעם בָּשָׂר הַגַּשְׁמִי בִּיז “יְסוֹד סִיּוּמָא דְגוּפָא”29 אוּן דֶעם בָּשָׂר הַגַּשְׁמִי פַארְבִּינְדְן כִּבְיָכוֹל מִיט דֶעם אוֹיבֶּערְשְׁטְן אִין אַ “בְּרִית עוֹלָם”, לְמַעְלָה מִטַּעַם וָדַעַת. נָאךְ מֶערֶער אִיז גֶעווֶען קֶענְטִיק דֶער פַארְבּוּנְד שֶׁלְּמַעְלָה מִטַּעַם וָדַעַת מִיט גָאר נִידֶערִיק – אִין דֶער עֲבוֹדָה פוּן דַּם פֶּסַח; מְ’הָאט גֶענוּמֶען אַ שֶׂה, אַ זַאךְ ווָאס אִיז דְרוֹיסְן אֲפִילוּ פוּן דֶעם גּוּף הָאָדָם, – “סִיּוּמָא דְגוּפָא” אִיז נָאךְ אַלְץ אַ טֵייל פוּן מֶענְטשְׁן, אָבֶּער שֶׂה אִיז אַ זַאךְ ווָאס גֶעהֶערְט צוּ חֶלְקוֹ בָּעוֹלָם – אוּן נָאךְ נִידֶערִיקֶער – דֶעם שֶׂה הָאבְּן דִי מִצְרִיִּים גֶעמַאכְט פַאר זֵייעֶר עֲבוֹדָה זָרָה, אוּן אוֹיךְ דָאס הָאבְּן דִי אִידְן גֶעמַאכְט פַאר אַ כְּלִי צוּ דֶער מְסִירַת נֶפֶשׁ שֶׁלְּמַעְלָה מִטַּעַם וָדַעַת.
ווָאס דָאס אִיז אוֹיךְ ווָאס מִיר זֶעעֶן, אַז קָרְבַּן פֶּסַח אִיז אַנְדֶערְשׁ פוּן אַלֶע אַנְדֶערֶע קָרְבָּנוֹת30 דֶערְמִיט, ווָאס "שֶׁלֹּא בָא מִתְּחִלָּתוֹ אֶלָּא לַאֲכִילָה". אַלֶע קָרְבָּנוֹת אִיז מִצְוַת אֲכִילָה בַּיי זֵיי אַ מִצְוָה נוֹסֶפֶת צוּם עִיקַר הַקָּרְבָּן. אָבֶּער בַּיי קָרְבַּן פֶּסַח אִיז דֶער גַאנְצֶער קָרְבָּן צוּלִיב אֲכִילַת הַפֶּסַח. דָאס אִיז דֶער עִנְיָן פוּן קָרְבַּן פֶּסַח, אַז אִין עִנְיָנֵי אֲכִילָה, ווָאס אִין זֵיי אִיז דֶער אָדָם שָׁוֶה לַבְּהֵמָה31, זָאל זִיךְ אוֹיסְדְרִיקְן דִי אֱמוּנָה וּמְסִירַת נֶפֶשׁ שֶׁלְּמַעְלָה מִטַּעַם וָדַעַת.
מְ’הָאט שׁוֹין גֶערֶעדט כַּמָּה פְּעָמִים32, אַז אֲמִיתִּית עִנְיַן הַחֵרוּת אִיז, אַז נִיט נָאר דִי נְשָׁמָה זָאל זַיְין פְרַיי פוּן דִי הַגְבָּלוֹת פוּן גּוּף אוּן נֶפֶשׁ הַבַּהֲמִית, נָאר עֶס דַארְפְן אוֹיךְ בַאפְרַיְיט ווֶערְן דֶער גּוּף אוּן נֶפֶשׁ הַבַּהֲמִית, אוּן אוֹיךְ חֶלְקוֹ בָּעוֹלָם, פוּן דִי עִנְיָנִים ווָאס פַארְשְׁטֶעלְן אוֹיף אֱלֹקוּת – אוֹיךְ אִין זֵיי זָאל זִיךְ דֶערְהֶערְן דֶער גִּילּוּי הַנְּשָׁמָה.
אוּן דִי הֲכָנָה צוּם אֱמֶת’ן חֵירוּת – פוּן דֶער נְשָׁמָה, גּוּף וְנֶפֶשׁ הַבַּהֲמִית אוּן חֶלְקוֹ בָּעוֹלָם – אִיז גֶעווֶען גִּילּוּי הָאֱמוּנָה (גִּילּוּי הַנְּשָׁמָה), ווָאס הָאט זִיךְ אוֹיסְגֶעדְרִיקְט בִּיז אִין מִילָה (יְסוֹד סִיּוּמָא דְגוּפָא), אוּן אוֹיךְ אִין שֶׂה, דָּבָר שֶׁחוּץ מִמֶּנוּ (חֶלְקוֹ בָּעוֹלָם)33.
אוּן ווִיבַּאלְד אַז דֶער כֹּחַ אוֹיף אַרָאפְּקוּמֶען זֵייעֶר נִידֶערִיק נֶעמְט זִיךְ פוּן זֵייעֶר הוֹיךְ, אִיז דֶערְפוּן פַארְשְׁטַאנְדִיק, אַז ווִי הוֹיךְ סְ’אִיז דֶער כֹּחַ פוּן מִילָה ווָאס פּוֹעֵל’ט אוּן אִיז מְגַלֶּה אֱלֹקוּת אוֹיךְ אִין בָּשָׂר הַגַּשְׁמִי בִּיז “יְסוֹד סִיּוּמָא דְגוּפָא” – אִיז דֶער כֹּחַ פוּן קָרְבַּן פֶּסַח, נָאךְ הֶעכֶער – דֶערְמִיט, ווָאס עֶר אִיז מַמְשִׁיךְ אֱלֹקוּת אוֹיךְ אִין דֶעם דְרוֹיסְן פוּן מֶענְטשְׁן, אִין חֶלְקוֹ בָּעוֹלָם. אוּן דַּוְקָא דוּרְךְ דֶעם פִירְט זִיךְ אוֹיס אֲמִיתִּית עִנְיַן הַחֵירוּת, אוּן ווִי שׁוֹין גֶערֶעדט34, אַז כָּל-זְמַן דֶער “רְכוּשׁ גָּדוֹל”, חֶלְקוֹ בָּעוֹלָם, אִיז נָאךְ נִיט אַרוֹיס פוּן מִצְרַיִם, פֶעלְט עֶס אִין דֶער שְׁלֵימוּת פוּן חֵירוּת.
אוּן דֶערְפַאר גֶעפִינֶען מִיר, אַז דַּם מִילָה אִיז גֶעווֶען אַ הֲכָנָה, אַ צוּגְרֵייטוּנְג צוּ דַּם פֶּסַח, ווִי עֶס ווֶערְט דֶערְצֵיילְט אִין מִדְרָשׁ35, אַז בְּשַׁעַת אִידְן הָאבְּן גֶעווָאלְט עֶסְן דֶעם קָרְבַּן פֶּסַח אוּן מֹשֶׁה הָאט זֵיי גֶעזָאגְט אַז זֵיי מוּזְן זִיךְ פְרִיעֶר מָל זַיְין, הָאבְּן זִיךְ דִי אִידְן דַאן מָל גֶעווֶען. ווָאס אַ הֲכָנָה אִיז דָאךְ קְלֶענֶער ווִי דִי זַאךְ צוּלִיבּ ווֶעלְכֶע מֶען אִיז זִיךְ מֵכִין.
כִּימֵי צֵאתְךָ מֵאֶרֶץ מִצְרַיִם אַרְאֶנּוּ נִפְלָאוֹת. דִי גְּאוּלָּה הָעֲתִידָה בְּקָרוֹב ווֶעט זַיְין בְּדוֹמֶה צוּ יְצִיאַת מִצְרַיִם. פּוּנְקְט ווִי יְצִיאַת מִצְרַיִם אִיז גֶעקוּמֶען בִּזְכוּת הָאֱמוּנָה, ווָאס אִיז נִתְגַּלָּה גֶעווָארְן אוּן אַרָאפְּגֶעקוּמֶען אוֹיךְ אִין כֹּחוֹת פְּנִימִיִּים בִּיז אִין כֹּחוֹת הַיּוֹתֵר תַּחְתּוֹנִים (מִילָה), אוּן אוֹיךְ אִין עִנְיָנִים ווָאס אוֹיסֶער דֶעם מֶענְטשְׁן (פֶּסַח) – אַזוֹי ווֶעט אוֹיךְ דִי גְּאוּלָה הָעֲתִידָה קוּמֶען בִּזְכוּת הָאֱמוּנָה; אַז נִיט קוּקְנְדִיק אוֹיף דֶעם גְרוֹיסְן הֶעְלֵם וְהֶסְתֵּר פוּן אוּנְזֶער גָּלוּת ווֶעט מֶען מְעוֹרֵר זַיְין דִי אֱמוּנָה פְּשׁוּטָה אִין בִּיאַת הַמָּשִׁיחַ, אַז "הִנֵּה זֶה עוֹמֵד אַחַר כָּתְלֵנוּ"36, אַז אָט-אָט קוּמְט עֶר שׁוֹין, עֶר שְׁטֵייט שׁוֹין הִינְטֶער דֶער ווַאנְט. אוּן דִי אֱמוּנָה ווֶעט נִיט בְּלַיְיבְּן אִין אַן אוֹפֶן פוּן מַקִּיף, נָאר זִי ווֶעט נִתְגַּלֶּה ווֶערְן אִין דִי כֹּחוֹת פְּנִימִיִּים, אָנְהוֹיבְּנְדִיק פוּן הֲבָנָה וְהַשָּׂגָה, מִדּוֹת, בִּיז צוּ ווִירְקְן אוֹיף אַלֶע, אֲפִילוּ דִי נִידֶערִיקְסְטֶע כֹּחוֹת (מִילָה). אוּן דָאס קוּמְט דוּרְךְ לֶערְנֶען חֲסִידוּת בְּאוֹפֶן פוּן הֲבָנָה וְהַשָּׂגָה, חֲסִידוּת חַבַּ"ד37, ווָאס זִי אִיז מְגַלֶּה דִי אֱמוּנָה אוּן אִיז זִי מַמְשִׁיךְ אוֹיךְ אִין דִי כֹּחוֹת פְּנִימִיִּים חַבַּ"ד, בִּיז עֶס ווִירְקְט אוֹיךְ אוֹיף אַלֶע כֹּחוֹת, לְשַׁנּוֹת טֶבַע מִדּוֹתָיו. אוּן דָאס אִיז מֶען מַמְשִׁיךְ אוֹיךְ אִין חוּצָה (פּסח), ווָאס דִי הֲפָצַת הַמַּעְיָנוֹת חוּצָה, ווֶעט בְּרֶענְגֶען – כְּהַבְטָחַת מַלְכָּא מְשִׁיחָא – דֶעם "אָתֵי מַר", בְּקָרוֹב מַמָּשׁ.
(מלוקט משיחות אחש"פ תשכ״א ותשכ״ב)
